دو بلوچ لاشاں سرٹیفکٹ لوٹیت

دو بلوچ لاشاں سرٹیفکٹ لوٹیت۔۔۔

۔۔۔۔۔۔۔جاوید بلوچ۔۔۔

بلوچ ءِ نام ءَ کارمرز کنوکیں سیاسی گلّانی دیم دیریں کہ پُریں بوتگ۔ اشیی ءِ درور بازیں جاگہاں بلوچاں دیستگ انت کہ کسے ءَ دو سال ءُ نیم ءِ ٹیکہداری ءَ وت ءَ پیش داشتگ ءُ کسے ءَ بجٹ ءِ وھد ءَ وتی بلڈ پریشر بُرز ءُ جھل کُتگ۔۔۔۔

ھمے سبب انت کہ گوادر ءِ مُلا موسی موڈ بہ بیت یا آل اپوزیشن پارٹیزانی بلوچستان ءِ دگ ءُ شھر بندیں ہرتالانی جار۔ لس بلوچ ءَ اشانی ھمکوپگ بوھگ وتی جاگہءَ۔ نی لس بلوچ نودربر اِشانی اسمبلی ءُ اسمبلی ءَ ڈن ءِ کُتگیں ترانانی سوشل میڈیا ءَ شِنگ کنگ ءَ شِزار انت ءُ اشاں گِندیت ءُ اِسکپ کنت۔

بلے نودربر جاہے ناں جاہے۔ وڑے ناں وڑے انگت کمو  گہتر اِت انت۔ آہاں کموکیں لس بلوچ بوھگ ءُ نودربر بوھگ ءِ درد پِر اَت۔ وتی وانگ ءِ جنجال، وتی بزگی ءَ ھوار انگت کمیں بلوچ اِت انت ءُ چندیں وھد پیسر لس بلوچ نودربر ءِ وڑ ءَ بلوچ ءِ لاش ھم لس بلوچ لاش ات انت۔ بلے نی وَ روچ پہ روچ نودربری کارڈ انچو ارزان ءُ پولِنگ بوان اِنت کہ پیشانی ءِ سرا نبشتہ کنگءِ باریگ ھم  پَش نہ کپتگ کہ کسے زانگ بہ دنت کہ اے کجام نودربر گلّ ءِ باسکے ءُ کجام واجہ ءُ ٹیکہدارانی مردم انت۔ ھرکس پدر ءُ ساپ زائر انت۔

اے نودربر سیاست ءِ برکت انت کہ ناں ایوک ریاست ءِ جوڑ ءُ کمک کُتگیں مافیا ءُ ٹیکہدار بلوچ ءِ راہشونی ءِ جار ءَ جن انت ءُ باڑہ ءِ سرا نودربر دار انت۔ بلکیں نی لاش ءُ پریس کلبانی دیم ءَ داشتگیں اکس ھم بلوچانی نہ انت بلکیں نودربر گَلّانی ئیگ انت۔

چندیں روچ پیسر یک بلوچ زھگے ءِ لاش ءَ داں سے روچ شہید فدا چار راہ تربت ءُ دگہ دو شپ ءُ دو روچ شال ءَ ایر بوت۔ اے کودکیں زھگ ءَ بلوچ نودربر گلّے ءِ سرٹیفکٹ دئیگ بوتگ ات ءُ اپوزیشن نودربر گلّاں بھر پمیشکہ نہ زُرت کہ بلکیں مئے نام جھل مہ بیت۔ چیاکہ مارا ھم سرٹیفکٹ گون ءُ باندہ اگاں مارا لاشے گون بہ بیت گڑا پدا کے دَر کئیت؟

ھمے وڑ ءَ زی شال ءِ پریس کلب ءِ دیم ءَ (کہ اود ءَ یک دہکےءَ گیش انت بیگوائیں بلوچانی کہول ءُ گَل زہرشانی کنگ ءَ انت) دو بیگوائیں بلوچانی آجوئی ءَ پہ توار چِست بوھگ ءَ اَت ءُ اے دوئیں اکساں ھم یک نودربر گَلّے ءِ سرٹیفکٹ گون اَت پمیشکہ باز دگہ گَلّاں یا ھاموشی برجم داشت یا اگاں کمو سوشل میڈیا ءَ بیان دات بلے اے سرٹیفکٹ پر وتءَ محفوظ کُت کہ مئے نام جھل مہ بیت۔

نی اے رواج دیم ءَ روان انت ۔۔۔۔ پیسر ءَ روانک ءُ بیاناں سرٹیفکٹ گون اَت۔ نی بلوچ ءِ نام ءَ نودربر سیاست ءِ سوبمندی انت کہ اکس ءُ لاشاں ھم سرٹیفکٹ گون۔

پَش کپت ھما بلوچ گوں وتی لاش ءُ اکساں کہ آ ھچ گَل ءَ ھوار نہ اِنت۔ ناں آئی ءِ زہرشانی ءَ را سرٹیفکٹ رسیت۔ ناں اکس ءُ لاشاں۔۔۔۔۔ نی بائد بلوچ نودربر گَل وتی نوکتریں ورژناں زوت زوت ءَ دیم ءَ بیار اَنت تاکہ پہ لس بلوچ ءَ بازیں ورائیٹی دستیاب بہ بیت ءُ ایندگہ بلوچ ھم وتی اکس ءُ لاشاں سرٹیفکٹ دات بکن انت۔ بے سرٹیفکٹ ءَ ایریں لاش ءُ داشتگیں اکس شہید فدا چوک ءُ شال پریس کلب ءَ بے تام انت۔