ریڈیو پاکستان گوادر پرچا پُرسیگ انت؟

        جاوید بلوچ                        

اے بیست ءُ یکمی کرن ءَ ھم ریڈیو ءَ وتی ارزشت برجم داشتگ ءُ یک مزنیں بستارے داریت۔ ھاس بلوچستان ءِ وڑیں جاگہاں کہ ادا اے دہر ءَ ھم بُنکی آسراتی نیست انت گڑا لئین، (بجلی) انٹرنٹ یک مزنیں گپے۔ بلوچستان ءِ گیشتر دمگاں ریڈیو مرچی ھم نہ ایوک جوانیں وڑے ءَ گوشدارگ بیت بلکیں ایوک یکّیں آسراتی انت پہ سرپدی، ھال ءُ وشنودی ءَ۔ چیاکہ بلوچستان یک پراہ ءُ شائیگانیں سرڈگارے ادا آبادی دور دور ءُ گِستا انت۔ ادا ریڈیو ءِ برکت ءَ ءُ ھاس بی بی سی ءِ اردو ءِ شنگ کاریانی سببءَ کوچگی دمگانی مہلوک چہ ھستیں مُلکی ءُ جہانی جاورھالاں بہ گِر داں سرپدی ءِ سنچءَ شھری مردماں ھم دیمتر بوتگ انت۔ مئے کوچگ ءِ مردم نہ ایوک میان استمانی سیاست ءُ چست ءُ ایراں زانت کار ءُ سرپد بوتگ انت بلکیں شھری مردماں چہ پدمنتگی ءَ ابید ھم گیشتر وتی ھمروچی ایں نیادانی تہ ءَ ھمے ھال ءُ اھوالانی سر ءَ گپ ءُ دیوان ھم کُتگ اِت۔

بلے جہانی سرمایہ دار ءُ زر دارانی وتی نَپ ءُ سیت بنت۔ ھمے نپ ءُ سیتانی دیم ءَ بی بی سی ءِ اردو شنگ کاری چہ ریڈیو ءَ ھلاس ءُ بند کنگ بوت انت۔ ھالانکہ بی بی سی وت ءَ ھئیالانی آجوئی ءُ سرپدی ءِ ارزانی ءَ رَسینگ ءُ شنگ کنگ ءِ منوگر لیک ایت بلے مروچی آئی ءِ لکھانی گوشداروک چہ سرپدی ءَ چورہ انت ءُ آ پہ زَر ءِ پڑ ءَ سرپدی ءُ ھالانی کار ءُ بار ءَ ڈیجیٹل میڈیا ءَ محدود انت۔

بلوچستان ءِ تیاب دپی دمگ ءُ مکران ءِ دشت ءِ دمگاں بی بی سی ءِ بند بوھگ ءَ پد ریڈیو پاکستان گوادر پہ سرپدی، لبزانک ءُ بلوچی مراگشانی واستہ لکھانی مردماں پہ مزنیں وسیلہ یے بوتگ۔ ھورماڑہ داں پسہ بندن، دشت ءُ کلاچ ءِ دمگءِ مردمانی وشی ءُ سرپدی ءِ وسیلہ بوتگ۔ بلے دیر انت چو بی بی سی ءِ اردو شنگ کاریانی وڑ ءَ بیگواہ انت۔ برے ھست اوں گڑا نیستی ءِ بروبر۔ بے لئینی ءُ بے جنریٹری ءَ ریڈیو پاکستان گوادر ءِ بلوچی مراگش بے توار انت۔ کول ءِ گوشداروکانی ءَ ھر وھد ءَ ریڈیو ءَ پُرس داشتگ۔

دل جان شاہ کہ وت ریڈیو پاکستان گوادر ءَ مراگش ھم کنت۔ آئی ءَ بی بی سی ءِ شنگکاریانی بند بوھگ ءِ سرا دشت ءَ یک ڈاکیومینٹری یے جوڑ کتگ ات۔ اے ڈاکیومینٹری ءِ تہ ءَ مردمانی انٹریوزاں لوٹ بی بی سی ءِ اردو شنگ کاریانی دوار پچ کنگ ئیگ ات بلے آ وَ برتانیہ ءِ سرکار ءِ دست ءَ انت۔ ریڈیو گوادر کہ پاکستان سرکار ءِ دست ءَ انت اے ھم چورہ انت۔ 

ریڈیو ءِ مراگش کنوکیں مہماندارانی گِلہ ھمیش انت کہ آ ھردیں ریڈیو ءِ گیٹ ءَ پُتر انت گڑا آہاں ھمے پسو رَسیت کہ لئین نیست۔۔۔۔۔ اگاں پہ کزاہ لئین بہ بیت ھم گڑا ھچ گیرنٹی نیست کہ مراگش ءِ وھد ءَ کدی ھم شُت کن انت۔ ءُ گوشداروک گیشتر انچو دلپروش انت کہ مرچاں گیشتراں 93 ءِ فریکوینسی ءِ سرا آئگ یل داتگ۔ چیاکہ آ ھردیں ریڈیو پاکستان گوادر ءِ چینل ءَ گِر انت گڑا ادا ھِندی ءُ عربی توار وَ کاینت بلے بلوچی ءِ توار گار اِنت۔ 

ریڈیو ءِ گیشتر مہماندار ءُ مراگش کنوکاں برے برے دراجیں مُدتے ءَ پد وت ھم یات نہ کنت کہ آہانی گُڈی مراگش کدی بوتگ۔ ءُ ھردیں آہاں چیکے دئیگ بیت آ اے پنچ ءُ ہشت سدیں کلدار والا چیک ءَ گِند انت یک برے ھئیران بنت کہ اے کجام ماہ ءِ ءُ کجام پروگرام ءِ چیک انت۔ اگاں اے مراگش کنوکانی دست ءَ بیت انت گڑا آہاں چیک واتر اسلام آباد ءَ دیم داتگ اِت انت ءُ پہ ریڈیو پاکستان ءَ چندہ داتگ اِت انت کہ ریڈیو ءَ وتی جاور شر بہ کُتین انت۔

ریڈیو پاکستان گوادر ءِ جاور چُش انت پرچا؟

یکے وَ مستریں سبب ریڈیو پاکستان گوادر ءِ جنریٹر انت کہ 2018 ءَ چی ھراب انت ءُ زر نیست کہ شر کنگ بہ بیت ءُ دومی سبب اِش کہ اے یک سرکاری ءُ ریاستی ادارگے۔۔۔۔ سرکاری ادارگ چوش کہ جنگل ءُ کوچگے ءَ کپتگیں اسکولانی ھال انت کہ یک سیاسی سفارشی استادے وتی ڈیوٹیءَ ھمودءَ کنت ءُ وت پدا دگہ کاروبارے بندات کنت۔ اسکول بند انت بلے آئیءِ پگار کئیت۔ ھمے وڑ ریڈیو پاکستان گوادر ءِ ھال بیتگ۔ ادا کارمستر گیشتر ڈنی ءُ درآمد بوتگ انت۔ آ ایوک دو یا سے روچ گوادر ءَ نِشتگ انت ءُ زرّ (ریڈیو ءِ ماہ ءِ بجٹ) بھر ءُ بانک کُتگ۔ گیشتر وت زُرتگ کمو کمو وتی جھل ءِ مردماں وارینتگ پدا سجّیں ماہ ءَ گار بوتگ انت۔

جُست کنوک پمیشکہ کس نہ بوتگ کہ ریڈیو ءِ سیادی گوں زبان، لبزانک ءُ مہلوک ءَ انت۔ درآمدانی دل پرچا درد بہ کنت اگاں بلوچی شنگاری مہ بنت؟

ءُ وتی ھما کہ اسلام آباد ءُ کوئٹہ ءَ نِشتگ انت بزاں کہ نمائندگ۔۔۔۔ 

آہاں گپ کُتگ ات اگاں ادا ٹیکہ ءُ ٹینڈر بوت انت یا پہ آہاں ذاتی نپ ءُ سیتے بیت انت۔ چیاکہ ایم پی اے، ایم این اے ءُ سینئٹر ءَ وتی بیانانی واستہ پہ باڑہ ءِ سرا مردم داشتگ کہ آ مردم اشانی نالائکی ءُ نابودی ءَ ھم لائکی ءُ بودی پیش دار انت ءُ روتاک ءُ سوشل میڈیا ءَ شنگ کن انت۔ اے نمائندگاں چے کار کہ دشت ءِ یک اسکولے ءَ استاد نیست، پانوان ءُ گنز ءَ آپ نیست یا سیائجی ءِ میتگ ءَ نادرہ جاہ بند انت۔ یا لبزانکی مراگش نہ بوھگ ءَ انت۔

درآمدانی ءُ دگہ مردمانی دست ءَ ریڈیو مرچی ایوک پُرس دارگ ءِ کابل انت۔ ریڈیو پاکستان گوادر ءَ کساس 30 ءَ گیش جاگہ ھالیگ انت۔ بلے گوادر ءِ ورناہانی نام ءَ سیاست کنوک پمیشکہ ھاموش انت کہ آہانی ٹارگٹ جند ءِ نوکری گِرگ ات ءُ سرجم بوت نی چیا گپ بہ کنت؟ ءُ نمائندگ گوادر ءِ پمیشکہ گپ نہ کنت کہ وتی بستار ءَ سرپد انت کہ اسلام آباد ءَ آیانی بستار چی انت؟ پدا یک تُرسے اِش انت اگاں اے وڑیں ادارگاں سرپد ءُ زانت کاریں مردم بیا انت گڑا پدا گوادری، تربتی ءِ لئیب آسر بیت۔۔۔۔

ریڈیو پاکستان گوادر ءَ وتی ھما دہر ھم دیستگ انت کہ ادا بلوچی زبان ءُ لبزانکءِ نامی ءُ کواسیں مردماں مراگش کتگ۔ واجہ سبا دشتیاری ءُ امام بکش امام ءِ ریکارڈنگے ھم مرچی در نئیت کہ کمپیوٹر زنگاں گپتگ انت۔ ریڈیو ءَ وتی جاگہ نہ بوھگ ءِ سبب ءَ ناں شریں اسٹوڈیوے نام ءَ انت ءُ ناں ماڑی یے۔

گوادر ءِ یک جیڑہ یے اِش انت گوادر ءِ مسال چو لسبیلہ ءُ بارکھان ءِ وڑ ءَ انت چیاکہ اودءِ ھم جام ءُ سردار کیھتران گوستگیں باریں چنچو سالاں نمائندگ انت۔ اود ءَ ھم پریس کلب ءَ بگر داں وانگ ءُ زانگ ءِ ادارگ ءُ جان سلامتی ءُ ھر خاندان ءِ تہ ءَ آہانی باڑہ ءِ سرا داشتگیں مردم ھست انت۔ گیشتر لاسی ءُ گیشتر کیھتران جام ءُ سردار ءِ (پہ وت گَلائی) سیاد انت۔ پدا لہتیں مردم دیم ءَ صحافی، ایکٹویسٹ ءُ سیاسی ءُ چاگردی مردم انت بلے آہانی اسل کار جام ءُ سردار کیھتران ءِ نمک ھلاری کنگی انت۔ گوادر اے دوئیں ضلعاں کمیں انگت دیم ءَ تر انت کہ ادا لبزانک ازم ءِ پڑ ءَ ھم چُشیں مردم داشتگیں ھست کہ آہانی چو ہاتھی ءِ وڑ ءَ پیشدارگ ءِ دنتان دگر ءُ ورگ ءِ دگر انت۔

پمیشکہ گوادر ءَ ایوک ریڈیو پاکستان گوادر نہ انت کہ زوال ءُ بدھال انت ھر نیم ءَ بہ چار انچش انت۔

بلے امیت ءُ اوست ھمیش انت ریڈیو پدا یک روچے وتی وشیاں گندیت ءُ پدا بلوچی ءِ مراگش پیسری وڑ ءَ برجا بنت۔۔۔۔