دی بلوچ نیشنل اِسٹرگل اِن پاکستان: اِیمرجِنس اینڈ ڈائمنشنز: دومی بھر

دی بلوچ نیشنل اِسٹرگل اِن پاکستان: اِیمرجِنس اینڈ ڈائمنشنز: دومی بھر

(The Baloch National Struggle In Pakistan: Emergence And Dimensions)

نبشتہ کار : جان مھمد دشتی

چاپ : دو ھزار بیست (2020)

۔۔۔۔۔ماران بلوچ۔۔۔۔۔                         

اولی بھر ءِ وانگ ءِ ھاتر ءَ شما اد ءَ کِلِک بکن اِت

برطانیہ وھدے کہ ہندوستان ءٙ دو ٹکر ءٙ بھر کنت، دو ملک ہندوستان ءُ پاکستان جوڈ بنت۔۔۔۔ پاکستان ءٙ انگریز ھمئے ھاتر ءٙ جوڈ کن انت تاکہ اے خِطہّ ءِ تہا آئی ءِ مفادانی دیمپان ءٙ بہ کنت۔۔۔۔پاکستان چونکہ نزوریں مُلکے بیت آئی ءِ  واستہ survive کنگ مشکل بیت اگاں وتی نوکیں ریاست ءٙ مظبوط مہ کنت۔۔۔۔ھمئے ھاتر ءٙ پاکستان ءِ گورنمنٹ وتی کوشست ءٙ بِندات کنت کہ بلوچستان ءٙ پاکستان ءٙ ھوار بہ کنت۔۔۔ قائداعظم، خان آف کلات خان احمد یار خان ءٙ گوں اے ھوالہ ءٙ گپ ءُ تران کنت کہ بلوچستان گوں پاکستان ءٙ ھوار بہ بیت۔۔۔پد ءَ خان آف کلات بلوچستان ءِ اسمبلی ءٙ اے جیڑہ ءِ سر ءٙ گپ ءُ تران کنت بلے اے ھوالہ ءٙ چہ اود ءٙ اے پیسلہ بیت کہ ما پاکستان ءٙ گوں ھوار نہ بہ ایں، بلوچستان کدی ھم برصغیر ءِ بھر نہ بوتگ ءُ بلوچستان ءِ تہ ءِ ریاست انگریز ءِ وھد ءٙ ھم آزات بوتگ اٙنت، بلوچستان ءِ وتی یک پجارے ءُ اے خِطہ ءِ تہا یک بلائیں اھمیت ءِ است۔۔۔ھمئے ھاتر ءٙ بلوچستان کدی ھم پاکستان ءٙ گوں ھوار نہ بیت۔۔۔۔۔پاکستان ءُ برطانیہ ءٙ اے پیسلہ منظور نہ بیت ءُ وتی طاقت ءٙ چہ بلوچستان ءٙ گوں پاکستان ءٙ گوں ھوار کنگ ءِ جھد ءٙ بِندات کن انت۔۔۔ بازیں پروپیگنڈا ءٙ رٙند پاکستان ءِ گورنمنٹ وتی فوج ءٙ دیم دنت ءُ بلوچستان ءِ سر ءٙ اُرش کنت ءُ 28March 1948 ءٙ پہ زور بلوچستان ءٙ قبضہ کنت۔۔۔

پاکستان ءِ نام نِہاد سیاسی مردم ھمئے داوا ءَ  کن انت کہ پاکستان اسلام ءِ نام ءٙ جوڈ کنگ بوتگ، ھمئے ھاتر ءٙ بلوچستان ءِ واستہ الّم اِنت کہ پاکستان ءِ اسلامی نظریہ ءِ منوگر بہ بیت۔۔۔۔ ما اگاں بلوچ ءِ گْوست ءٙ بِچاراں گُڈا بلوچ ءٙ وتی سٙرجمیں راجدپتر ءٙ دٙری حاکمیت نہ منّ اِتگ، ھرچ وھد ءٙ دری طاقتانی دیم ءَ اُوشتاتگ۔۔۔۔وھدے کہ اوگانستان ءِ حاکم بلوچستان ءِ سر ءٙ اُرش کن انت گُڈا "خان میر نصیر خان" بامردی اے اُرش ءِ جواب ءٙ دنت ءُ اے جنگ ءٙ اوگانستان ءِ فوج شکست وارت۔۔۔ایشی ءَ ابید انگریز 1839 ءٙ وھد ءِ اولی رند ءٙ بلوچستان ءٙ  وتی تسلط  ءٙ ھارگ لوٹ ایت ءُ کلات ریاست ءٙ حکم دنت کہ انگریز ءِ حاکمیت ءٙ بِہ منّ ایت گڈا خان آپ کلات میر مھراب خان انگریز ءِ حکم ءٙ نہ منّ ایت، گڑا انگریز بلوچستان ءِ ھلاپ ءٙ جنگ ءِ جار ءٙ جنت ءُ پہ زور بلوچستان ءِ سر ءٙ قبضہ کنت، اے جنگ ءِ تہا خان میر مھراب خان گوں وتی ھمراھاں شھید کنگ بیت۔۔۔ اِد ءٙ چہ زانگ بیت کہ بلوچستان ءِ مھلوک ءُ ھاکماں کدی ھم وتی سرزمین ءِ سر ءٙ دری مردمانی قبضہ گیریت قبول نہ کتگ۔۔۔۔ھمئے وڈ ءٙ پاکستان ءِ 1948 ءِ اُرش ءُ قبضہ ءٙ رند ھم ھمئے رنگ ءٙگندگ بیت، مزنیں مھلوکے ءٙ پاکستان ءِ ھِلاپ ءٙ بغاوت کت ءُ ھما بغاوت روچ ءِ مروچی ھم گندگ ءٙ کئیت۔۔۔۔

اٙگاں ما بلوچ نیشنلسٹ سیاست ءٙ بہ چاریں گڑا اے 1920 چہ شریں دروشمی ءٙ زاھر بیت وھدے میر یوسف عزیز مگسی ءُ میر عبدلعزیز کُرد بلوچ ءٙ یکجا کنگ ءِ جھد ءٙ کن انت ءُ پدا "انجمن اتحاد بلوچاں" جوڈ کن انت، بازیں رسالہ ءِ ھم دیما کار انت تاکہ چہ آیاں بلوچ نیشنل مواد شنگ کنگ بہ بیت ءُ بلوچ ءٙ  وتی وجود ءِ پھازگ ءِ ھاتر ءٙ شعور دیگ بہ بیت۔۔۔۔انگریز ءُ کلات ءِ ھاکمانی نیمگ ءَ چہ مہ کن کٙنگ بنت بلے آ کجام ھم دروشم ءٙ وتی جھد ءٙ برجم دار انت۔۔۔۔پدا ما را غوث بخش بزنجو ءُ میر گل خان نصیر ءِ رنگیں سیاسی سروک رس ایت ءُ ما گِندیں اے مُدام پہ بلوچ ءٙ جھد کن انت ءُ بلوچ ءٙ سیاسی ءُ زانتی شعور دے انت ءُ مزاھمت ءِ سِکین ءٙ دے انت۔۔۔۔۔  

پاکستان وتی بنداتی روچاں بلوچ ءِ سر ءٙ ظلم ءُ بربریت ءٙ بِندات کنت ءُ بلوچ ءِ وسائل ءِ لُٹ ءُ پل کنگ ءٙ ابید دگہ اِچ وڈیں Interest ئِے نہ بیت۔۔۔۔ ھمئے ظلم ءِ ھلاپ ءٙ بلوچ ءِ مزنیں مھلوک ءِ پاکستان ءِ ھلاپ ءٙ جنگے جار ءَ جنت ءُ بازین ءِ سیاسی ھوالہ ءٙ بلوچ ءِ واستہ وتی جھد ءٙ بِندات کنت۔۔۔ بلے پاکستان ءٙ ھٙردو دوست نہ بنت ءُ پہ زور وتی طاقت ءَ چہ آیاں جنت ءُ زندانیگ کنت۔۔۔۔پِرنس کریم ءِ بغاوت ءِ چیزے سال رند میر نوروز خان ریاست ءِ ھلاپ ءَ جنگ کنت ءُ پاکستان ءٙ مزنیں کچے ءٙ تاوان دٙنت۔۔۔۔بلے ریاست مزنیں جنگ ءٙ رند میر نوروز خان ءٙ گوں ھمراھاں دھوکا دنت ءُ قران ءِ نام ءٙ آیاں رٙد دنت ءُ بابا نوروز خان ءٙ تا ھیات زندان ءٙ بند کنت ءُ آ دگہ ھمراھاں1960 ءَ پاھو دنت۔۔۔ میر نوروز خان 1964 ءٙ زندان ءِ تھا وپات کنت۔۔۔۔۔ بلے اے بلوچ ءِ آخری جنگ نہ بیت بلکہ بلوچ وتی حق ءِ ھاتر ءٙ مسلسل یک دروشمی ءٙ پاکستان ءِ ھلاپ ءٙ مزاھمت کنت۔۔۔پدا بھٹو ءِ دور ءَ بزاں کہ 70s ءٙ مارا نواب خیر بخش مری ءِ دروشم ءٙ تحریک ءِ سروک گندگ ءٙ کئیت کہ 70s ءٙ بلوچ سر ءٙ ظلم ءِ ھلاپ ءَ جنگ کنت۔۔۔بلے گپ اِیش انت کہ بلوچ ءِ بد بھتی اِنت کہ مدام سرکار ءِ ھلاپ ءٙ  کہ مزاھمت ئِے کتگ بس وتی ٹکّ ءٙ تک محدود بوتگ، یکجہتی گندگ ءٙ نہ یتکگ، برے مریاں تھنا جنگ کتگ ءُ برے مینگل ءُ زہریاں ءُ اے جنگ تھنا یک جاہ ءٙ گندگ اتکگ اٙنت۔۔۔مرچی بلوچ ءِ تحریک  یکیں تحریک اِنت کہ اِیشی ءِ تھا ما تپاکی گندگ ءٙ اِنت کہ سرجمیں بلوچستان ءٙ بلوچ یکیں دروشم ءٙ مزاھمت کنگ انت۔۔۔۔

ھمئے رنگ ءٙ ما وتی شائر ءُ نبشتہ کاراں گِند ایں کہ مدامی وتی شائری ءِ تھا بلوچ ءِ زلم ءِ کسھاں کار انت ءُ وتی قلم ءٙ چہ بلوچ ءِ ھلاپ ءٙ انگریز ءِ زلم بہ بیت یا کہ مرچی پاکستان ءِ رنگ ءٙ پہ زور مسلط بوتگیں شمشیر بہ بیت، مُدام بلوچ نبشتہ کاراں بلوچ ءِ بزگی قلم بند کُتگ۔۔۔۔۔۔بہ زان کہ اے بلوچ ءِ ابرم ءِ تھا انت کہ وتی دشمن ءِ ھلاپ ءٙ مزاھمت کنگ، انچو کہ مئے نبشتکار مدام وتی قلم ءِ دروشم ءٙ اے ناسوریں ریاست ءِ ھلاپ ءٙ مزاھمت کنگ ءٙ انت۔۔۔۔۔

ھمئے رنگ ءٙ 1967 ءٙ بلوچ راجدپتر ءِ یک جوانتریں گل ءِ جوڈ بیت، بہ زاں کہ BSO "بلوچ وٙانِندہ گٙل"، BSO ءِ سیاست بلوچ ءِ سر ءٙ باز اسر کنت، "بلوچ وٙانِندہ گٙل" دگنیا ءِ مٹ بوتگیں حالاتانی مطابق سیاست کنت، بلوچ ءٙ سرپد کنگ ءِ جھد کنت کہ ترا وتی زمینے، وتی زبانے، وتی دود ءُ ربیدگے ، وتی سائل ءُ وسائلانی رکینگ ءِ ھاتر ءٙ اے ریاست ءِ دیم ءَ اوشتگی انت ءُ وتی وجود منّارینگی اِنت، بہ زاں کہ بلوچ ءٙ وتی مڑیانی رکینگ ءِ ھاتر ءٙ سیاست ءٙ بھر زورگی اِنت۔۔۔۔BSO مزنیں رنگے ءٙ ریاست ءٙ چہ تعلیمی ادارہ ءِ لوٹ کنت ءُ تعلیمی ادارھانی تھا بلوچ وانندھاں پولیٹیسائز Politicise کنت ءُ وتی حقانی ھاتر ءٙ جھد کنگ ءِ سِکین ءٙ دنت، BSO شہید حمید بلوچ ءِ رنگیں ورنا جوڈ کنت کہ پاکستان ءِ بلوچ دشمن پالیسیانی ھلاپ ءٙ وتی سینگ ءٙ مِک کنت ءُ وتی جان ءٙ نٙدر کنت۔۔۔۔BSO چیزے سال ءِ تھا سرجمیں ایشیا ءٙ نامدار بیت ءُ بلوچ ءِ سیاست ءِ مستریں بھر جوڈ بیت۔۔۔۔

اے ریاست ءِ مستریں دروگ ھمیش انت کہ وتی مھلوک ءٙ گُش ایت کہ اے ریاست اسلام ءِ نام ءٙ جوڈ کنگ بوتگ ءُ سرجمیں راج کہ اے ریاست ءِ تھا ھوار انت آیاناں نہ منّگ ءُ اے سابت کنگ کہ اسلام ءِ نام ءٙ دُرسیں راج یک بہ بنت تاکہ ریاست شرّیں رنگی ءٙ کسانیں راجانی لُٹ ءُ پُل ءٙ بہ کنت۔۔۔ اے ریاست ءِ مستریں جیڈہ Identity crises اِنت، ریاست ءٙ کدی ھم کسانیں راج تسلیم نہ کُتگ انت ءُ ریاست ءِ ودی بوگ ءِ روچ ءٙ بہ گر تا مروچی اے ریاست مزنیں راجانی تسلط ءٙ اِنت ، بِزاں کہ گونڈیں راج مدام وتی وجود ءِ منّارینگ ءِ ھاتر ءٙ جھد ءَ انت۔۔۔۔ ھمے سٙوٙب اِنت کہ اے ریاست ءِ جیڈہ اچ بر گیش ءُ گیوار نہ بنت ھما وھد ءَ کہ سرکار ءُ اِسٹیبلشمنٹ کسانیں راجاں تسلیم بہ کنت ءُ آیان ءٙ وتی زمینے، وتی زبانے، وتی دود ءُ ربیدگے، وتی سائل ءُ وسائلانی سر ءٙ پیسلہ کنگ ءِ حق بہ بیت اگاں ناں گڈا اے ملک ءِ جیڈہ کدی ھم شر نہ بنت ءُ بلوچ وتی وجود ءِ پھازگ ءِ ھاتر ءٙ مدام وتی جھد ءٙ برجم دار ایت۔