رُمبیتگ مکران جُمبتگ شال

رُمبیتگ مکران جُمبتگ شال

الطاف بلوچ

مکران بلوچستانءِہما دمگاں ہوار بوتگ کہ اودا کہ کشت ءُ کوش ءُ جنَگ ءُ پروشگ ءِ وئیل اے رنگ ءَ نہ بوتگ چوشکہ مرچی بوہگا انت سالانی سرا کزا یک رندے مردمے ءِِ جنَگ ءُ کُشَگ ھال دیمءَ اتکگ بلے چیزے سال انت مکران ءَ بے ایمنیءِ آس یے روک انت ،جنَگءُ کُشَگ ، دزی ءُ ڈنگی ،اغواہ برائے تاوان ہمک روچی کارے جوڑ بوتگ،

چشیں روچ نیست کیچ ، پنجگورءُ گوادرءَ مردمانی جنئگ ءُ کشئگ ءِ حال دیما نئیت ، تیوگیں مکران ءَ ملٹریءُ پیرا ملٹریءِ فورسز ءِ  بےحساب چیک پوسٹ جوڑ کنگ بوتگ انت بلے ایشی ءَ ابید مہلوکءِ جان ءُ مالءِ پہریزگ ءَ ہچ وڑیں گام گیج زورگ بوہگا نہ انت ، گوستگیں ہفتگ ءَ بلیدہ ءَ فورسز ءَ بی ایس او ءِ رہشون ظریف رند ءِ لوگ ءِ سرا بیڑ برتگ ات ، آئی ءِ برات خلیل رند دزگیر کنگ ءُ پولیس ءِ تیر گواری ءَ ظریف رند ءِ برات زتک رامز خلیل شہید ءُ دومی برات زتک ءُ یک زالبولے ٹپی بوتگ ات چریشی ءَ پد کہول ءِ مردماں لاش چہ بلیدہ ءَ زرت ءُ تربت ءَ شہید فدا چوک ءِ سرا اتک ءُ نندانک جت ، اے درگت ءَ آل پارٹیز کیچ ءِ رہشون  ہم شہید بوتگیں چک ءِ وارثانی نندانکءَ ہوار بوتاں ، آہانی لوٹ ہمیش ات کہ ذمہ واریں  پولیس کارندہانی ہلاپ ءَ کاروائی کنگ بہ بیت ءُ سبب دیما آرگ بہ بیت کہ پولیس ءَ چھاپہ پرچا جتگ؟ بلے کیچ ءِ انتظامیہ ءُ پولیس ءِ نیمگا جوانیں گام گیج زورگ نہ بوت ءُ آہانی لوٹ مننگ نہ بوتاں ، آہاں لاش زرتءُ دیم پہ کوئٹہ ءَ رہ گپت انت ، اے وھد ءَ شہید بوتگیں رامزءِ کہول ءِ  مردماں لاش گون انت ءُوزیر اعلیٰ ہاوس ءِ دیما نندانک اش جتگ ءُ نشتگ انت ، اے پہ بلوچستانءِ سرکار ءَ مزنیں شرمءِ گپے کہ یک کہولےءَ انصاف نہ رستگ ءُ آہاں لاش بڈ ءَ جتگ ءُ کوئٹہءَ شتگ انت ءُ وزیراعلیٰ ہاؤس ءِ دیما نشتگ انت ءُ انصاف لوٹگ ءَانت۔ دومی نیمگا پولیس ءُ فورسز ءِ اے رنگیں کاروائیاں ہمے زانگ بیت کہ سرکار ءُ انتظامیہ ءِ ہچ وڑیں رٹ نیست ہرچی کہ فورسز ءِ دل لوٹ ایت آ کنت ، لہتے روچ پیسر تربت ءَ دگہ یک وئیل یے ءَ تاج بی بی نامیں زالبولے فورسز ءَ بے گناہ ءَ جت ءُ شہید کت بلے سرکار ءِ نیمگا ہچ وڑیں رد عمل یے دیما نہ اتک ، چیزے روچ ءَ سیاسی گلاں جاک ءُسلوات کت دگانی سرا زہرشانی کت بلے ہچ نہ بوتگ۔

 چو کیچ ءِ وڑا  پنجگور ءَ ہم جاور نگیگ انت ، پنجگورءَ سے ءُ چار بے گناہیں ورناہاں ہوار پنچ ءُ شش مردم بے گناہءَ کشئگ بوتگ بلے کس نہ زانت کشندہ کئے انت؟ چہ کجا کیتءُ کجا روت گوں سلاہاں سر عام چکریت انچو سیکورٹی ءَ ابید  سلاہ بندیں گینگ  ءَ کس جست نہ کنت ، تربت  ءَ ہم  ہمک روچ  ہمے رنگیں وئیل ءُ واقعہ ہمک  روچ پیش  کائینت بلے گرءُدار کنوک نیست ، حیات بلوچ ءِ کوشءُ ڈہنک ءَ بی بی ملک نازءِ سرا تیر گواری کنگ ءُ آئیءِ کسانیں چکءِ ٹپی بوہگ ءُ آئیءِ بیران بوہگ بلوچستان  ءِ  راجدپترءِ بد تریں وئیلاں یکے ،ہمے وڑا پنجگور ءَجلیل سنجرانی ، قدیر ،سفیر ءُ آہانی کماشءِ بےگناہءَ جنئگ ءُ کشئگ ہما دلپدریں وئیلاں یکے کہ اے وئیلاں چاگردءِ ہمک مردم پدرہینتگ  ءُ  زدگ کتگ۔ پارلیمنٹ ءَ نشتگیں بلوچ سیاسی رہشونانی ہچ وڑیں کرد نیست ،پنجگورءَ کشت ءُ کوشی ءِ گیش بوتگیں وئیلاں پد پنجگورءِ مہلوکءِ جوانیں رد عمل یے دیم اتک۔ مہلوک دگانی سرا دراتکگءُ  زہرشانی یے درشان کت دومی روچ ءَ  پنجگورءِ ایم پی اےءُ صوبائی وزیر میر اسد بلوچءَ اسمبلی ءِ فلورءَ وتی گشتانک ءَ جام کمال ءُ صوبائی سرکار بیہار دات  ءُ گشت اگاں پنجگورءَ ایمنی جاورانی گر ءُ دار کنگا سرکارءَ وتی کرد ادا نہ کت ما پارلیمانی سیاست ءَ یلہ دیاں، چوناہ ءَ  آئیءَ کوہ ءَ رؤگ  ءِ  بیہار دئیگ ءَ ات بلے آ روچ ءَ پد اسد بلوچ پدا بے توار انت نہ آئیءَ پارلیمانی سیاست ءِ یلہ دئیگ ءِ جار جت ءُ نہ کہ چہ وتی وزارت ءَ استعفیٰ یے دات ،مکرانءَ ہردیں کہ چشیں وئیل ءُ واقعہ یے پیش کئیت ،سیاسی گلانی رہشون چو واجہ اسد بلوچ  ءَ  دنیا ءَ سر ءَ زورانت بلے چیزے روچ گوزگ ءَ پد  درست وتی دپ ءَ دوچ انت۔

 

گوستگیں یک ماہے ءِ  نیام ءَ کیچ ءُ پنجگورءَ سلاہ بندیں مردمانی تیرگواری  ءَ کساس دہ ءُ دوازدہ مردم جنئگ بوتگ ،پولیس ، انتظامیہ ءُ پیراملٹری فورسز ءِ موجودگی اے سلاہ بندیں ٹولی عام مردم ءَ ٹارگٹ کن انت بلے زانگ نہ بیت  جنوک کئے انت ،فورسز اے سلاہ بندیں ٹولیانی دیمءَ لاچار ءُ بے بس انت،پولیس ، لیویزءُ ایف سیءَ ہمنچو چیک پوسٹ جوڑ کتگ ہمک گام ءِ سرا لس مہلوک گرگ ءُ دارگ بیت ، چیکنگ کنگ بیت بلے اے کشندہاں کس دزگیر کت نہ کنت گوں سلاہاں تر انت  ءُ  مہلوک جن انت ءُ کش انت ،اے ٹولیانی دستاں سلاہ کیا داتگ ءُ آہاں مہلوکءِ جنئگ ءُ کشئگءِ واکءُ اختیار کیا داتگ؟ ایشی ءِ زمہ وار کئے انت؟ ایشیءَ دراہ زان انت بلے بس انت اے گوں سلاہاں سرعام ترانت چرآہاں کسی جانءُ مال محفوظ نہ انت اے سلاہ بندیں ٹولی یک منصوبہ یے ءِ درچ ءَ منظم کنگ بوتگ انت سیاسی جد ءُ جہدءِ کاؤنٹر کنگ ءِ واستہ اے رنگیں پندل سازگ بوہگا انت داں کہ ہچ کس پہ وتی حقانی ھاترا توار چست کت مہ کنت اگاں کسے بلوچ ءُ بلوچستانءِگپ ءَ جنت گڑا آئی آسر ہمے بیت ،

 

گوستگیں سال ءَ  کیچ  ءِ دمگ ڈہنکءَ چیزے سلاہ بندیں مردم ڈُنگی ءِ نیتءَ لوگےءَ پترتاں ملک ناز نامیں زالبولےءَ مزاحمت کت ، ڈنگانی تیرگواری ءَ ملک ناز شہید ءُ آئی کسان سالیں چک برمش ٹپی بوت ،آئی ءِ کہول ءِ مردماں کشندہے دزگیر کت ءُ  پولیس ءِ دست ءَ دات رند ءَ  زانگ بوت اے سمیر سبزل نامیں مردے ءِ  گنگ ءِ مردم انت آ طاقتوریں ادارہانی کمک  ءُ پشت ءُ پناہیءَ بے گناہیں مردماں جن انت ءُ کش انت ، اے وئیل  ءِ ہلاپ  ءَ کیچ ءَ  ہوار بلوچستان گیشتریں دمگاں زہرشانی ءِ سببءَ سمیر سبزل دزگیر کنگ بوت بلے چیزے وھد ءَ پد آ بے گناہ ثابت کنگءُ یلہ دئیگ بوت۔ بلوچستانءَ  سیکورٹی فورسزءَ ہمنچو واک ءُ اختیار دئیگ بوتگ آ سرکار ءِ رٹ ءَ ہم نہ من انت لس مہلوک ءَ بل وزیر ءُ گزیراں ہم کم شرپ کن انت۔ تیوگیں بلوچستان ءَ آئین ءُ قانون ءَ ھوار انسانی حقاں پادمال کنگا انت بلے مجال نہ انت سرکار ، سیاسی پارٹی  ءُ منتخب نمائندہ گپے بہ جن انت ، اگاں بلوچستانءِ  سرکار ءُ سیاسی گلاں وتی کرد ادا نہ کت گڑا بلوچستانءَ ہمک روچ رامز خلیل ،حیات بلوچءُتاج بی بی ءِ وڑیں ہزاراں زالبول ءُ ورناہ سرعام تیر گواری کنگءُ کشئگ بنت۔

کوئٹہءَ پاکستان میڈیکل کمیشن ءِ نیمگا میڈیکل کالجاں آن لائن ٹیسٹ ءِ ہلاپ ءَ زہرشانی کنوکیں نودربرانی سرا پولیسءَ لٹ ءُ کٹ ءُ تیر گواری کت ، بازیں نودربرے دزگیر کنگ بوت ، پولیسءِ تیر گواری ءَ بازیں نودربر ٹپی بوت ،یک ٹپی بوتگیں نودربرے ھانی بلوچ بیران بوت ، ھانی بلوچ سردار بہادر خان ویمن یونیورسٹی ءَ بی ایسءِ نودربرے ات ،  بلوچستان ءَ پہ وتی حقانی ھاترا زہرشانی کنوکیں نودربر آیف آئی آر ءُ بندیگ کنگ بنت ،ہانی بلوچ ءِ کوش ءِ ذمہ وار استیں سرکار انت ، سرکار ءِ ردیں پالیسانی سبب ءَ نودربر وھدے دگانی سرا درآہگ ءُ زہرشانی کنگا لاچار انت ،دومی نیمگا سرکارءِ گشئگ ءِ سرا پولیسءُفورسز نودربرانی سرا لٹءُلٹ کاری کن انتءُ نودربراں جن انت پروش انت۔

کوئٹہ ءَ ھانی بلوچ ءُ کیچ ءَ تاج بی بیءِ کوش پہ بلوچءُ بلوچستان ءَ  نوکیں گپے نہ انت ،چشیں وئیل ءُ واقعہ دیمترا ہم بنت بلے بلوچ  ءِ راہ گیشیت  ءُ تچک بیت ءُ جہد گیش مھکم بیت۔