بلوچی مھر ءُ راجدوستی لوٹ ایت

نبشتانک: بلوچی مھر ءُ راجدوستی لوٹ ایت

نبشتہ کار: شاری بلوچ

دنیا ءِ ھر وڑیں گُلامیں راجاں آیانی جِند ءِ راجی زُبان ماں وانگجاہ ءُ دربرجاھاں وانینگ نہ بیت اِنت چی ءَ کہ دُژمن ءِ مُدام ھمے جُھد بیت کہ گُلامیں راج ءِ راجی زُبان لگتمالی ءِ آماچ بہ بیت یا دائمی گار ءُ بیگواہ ئِے بہ کن آں پمیشکا دُژمن گلامیں راج ءِ پدریچ ءَ وتی زورگِریں زُبان ءُ وتی دْروگیں راجدپتر ءَ وانین ایت کہ گُلامیں راج ءِ پدریچ کم کم ءَ مجگی گُلام جوڑ بہ بیت۔ گُلام ءِ ورناھیں نودربر وتی جِند ءِ گْوست ءُ راجدپتر ءَ بے ھیال بہ بنت۔ اگاں ما بلوچ ھورت چاری بہ کن ایں گُڑا ما یکپارگی سرپد بہ ایں کہ بلوچ راج ھم یک مجگی گُلامے کہ آئی ءَ وتی راجی زُبان ءَ بے کساس ڈالچار کُتگ۔ مرچاں ھر بلوچے ءَ بچار کہ گپ ءُ تران ءِ وھد ءَ ھم وتی راجی زُبان ءِ زگریں گالاں ڈالچار کنان ءَ ھندی ءُ پارسی ءِ گالاں جاہ دنت کسے گْوش ایت “من نہ سمجھ اِت”، “من ءَ پتا نہ اِنت” ءُ “من مصروف آں”

بزاں اے مجگی گلام ءَ اے سما ھم نہ انت کہ تو وت یک بلاھیں راجے ئے، تو یک شاھگانیں زُبانے ءِ واھُند ئے۔ تو وتی زُبان ءِ”پھمگ، سرپد بوگ ءُ زانگ” ءِ وڑیں سے سے ئیں زگریں گالاں ڈالچار کن ئے ءُ بزگیں ھندی ءِ یکیں گال “سمجھگ” ءَ زور ئے! زاناں اے سمجھگ بلوچی گالے؟ مارا جیڑگ لوٹ ایت کہ ما چی ءَ وتی راجی زُبان ءِ زگریں گالاں وت لگتمال ءُ ڈالچار کنگ ءَ ایں! باید انت ما وتی راجی زُبان ءِ زگریں گالاں کارمرز بہ کن ایں کہ ھمے لگتمال ءُ ڈالچار بوتگیں گالاں ھاٹیگ بہ رس ایت۔ ما بہ گْوش ایں “من نہ پھم اِت یا سرپد نہ بوتگ آں”، “من ءَ سما نہ اِنت” ءُ “من دزگٹّ آں” نَیکہ ما ھندی، پارسی ءُ سرائیکی ءِ گالاں ماں وتی شھدیں زُبان ءَ ھوار بہ کن ایں چی ءَ کہ ما پیش ءَ گُلام ایں ءُ مئے راجی زُبان گار ءُ بیگواھی ءِ آماچ اِنت۔

بلوچی مئے وتی راجی ءُ ماتی زُبان اِنت، ما ایشی ءَ ابرامی ونت کن ایں، سرپد بَہ ایں۔ تو وت بلوچے ئے تھنا اشتاپ مہ کن، پہ بلوچ ءَ بلوچی دربرگ ءَ دو روچ لگ ایت۔ بچار ما پہ پارسی، ھندی ءُ انگریزی ءِ دربرگ ءَ دہ سال جن ایں بلے پہ وتی راجی زُبان ءِ پھمگ ءُ دربرگ ءَ دو یا سے روچ لگ ایت، بزاں مارا تھنا درونت وانگ لوٹ ایت۔ ما لوٹ ایں کہ شُما ھر یک راجی زُبان ءِ بلاھیں نبشتہ کار ءُ زُبانزانت جوڑ بِہ بَہ اَت۔

وھدے کہ تو درونتاں سرجمی ءَ وان ئے گُڑا تو جُھد بہ کن کہ دزھُورکی ءَ گالرِداں نبیسّان ءُ وتی ردیاں راست بہ کن ئے۔ اگاں تو ھمے داب ءَ جُھد بہ کن ئے گُڑا تو زیت بلد بہ ئے بلے اشتاپ مہ کن، ھر چیزے نبشتہ کن ئے گُڑا آئی ءَ دو رند ءَ وت وان ءُ آئی ءِ ردیاں بہ کش چہ ردیانی راست کنگ ءَ تو بلوچی نبشتہ بلد بہ ئے۔ اگاں تو دگرے ءِ نبشتانکے وان ئے گُڑا آئی ءَ ھم پہ ردیانی چارگ ءِ جُھد بہ کن بزاں یک انچیں درشاندابے ءَ کہ تو وت اُستادے ئے تو یک نودربرے ردیاں راست کنگ ءَ ئے۔ پہ راجی زُبان ءِ دربرگ ءَ مھر ءُ دلبڈی لوٹ ایت، مارا راجدوستی ءِ مارشت ودی کنگ لوٹ ایت۔ اگاں ما پیسر درونتاں وان ایں گُڑا ما راجی زُبان ءَ سے روچ ءِ تہ ءَ زبر ءُ بلد بہ ایں۔

دومی ما بے ھال مہ بَہ ایں کہ بلوچی زُبان ھم راج ءِ وڑ ءَ زیردست اِنت پمیشکا پہ بلوچی زُبان ءِ دیمروئی ءَ ھچ وڑیں سرکاری آسراتی نیست انت، ناں کہ مئے راجی زُبان ماں وانگجاھاں وانینگ بیت ءُ نَیکہ پہ زُبان ءِ دیمروئی ءَ بلوچی روتاک ءُ شریں گِندگُشی چینلے ھست پمیشکا ما دْراہ راجدوستیں بلوچ وت ماں وت وتی راجی زُبان ءَ وانگ ءُ وانینگ ءَ ایں کہ بلوچ راج ءِ تہ ءَ مئے شھدیں زُبان ءُ راجی پجّار بلوچی ءِ وانگ ءُ دربرگ البار بہ بیت۔ البت پہ اے درگت ءَ یونیورسٹی ءُ کالجانی بلوچ نودربراں سک جُھد کنگ لوٹ ایت۔ باید اِنت بی ایس او ءِ نودربر وٹس ایپی وانگجاھاں اڈ بہ کن اَنت ءُ راج ءِ نودربراں راجی زُبان ءَ درونتاں وانین اَنت۔ ھمے داب ءَ ھر نودربرے پیسبُک ءُ وٹس ایپی دربرجاھاں اڈ کنان ءَ وتی سْیاد ءُ وارساں ھم بلوچی وانگ ءُ دربرگ ءِ سکین دنت چی ءَ کہ راج ءِتہ ءَ راجدوستی ءِ مارشتانی ودی کنگ ءَ بلوچی وانگ ءُ دربرگ اَلمی انت انچوشکہ راجی زُبان ءِ زُبانزانت واجہ ڈاکٹر ناگُمان گْوش ایت “داں وھدے کسے زُبان دوست مہ بیت آ راجدوست بیت نہ کنت” پمیشکا پہ بلوچ راج ءِ یکجاہ، یکمُشت ءُ تپاکی ءَ بلوچی وانگ ءُ وانینگ سک اَلمی اِنت۔

بلوچی مئے وتی راجی پجّار اِنت، بلوچ راج ءُ بلوچی شالا دیمروئی بہ کنات۔