کوٹا فیکٹری ءِ اولی سیزن ءِ سر ءَ چمشانکے

کوٹا فیکٹری ءِ اولی سیزن ءِ سر ءَ چمشانکے

                             اے آر عطاء

کوٹا فیکٹری 2019 ءَ جوڑ بیتگیں ویب سیریزے کہ آ انڈیا ءِ نودربرانی تہا سک نامدار اِنت. کوٹا فیکٹری انڈیا ءِ مزن شہر راجستان ءِ کسانیں دمگ 'کوٹا' ءِ بابت ءَ اِنت.

 کوٹا ھما جاہ انت کہ اود ءَ ھر سال لکّانی ھساب ءَ نودربر ملک ءِ کُنڈ کنڈ ءَ چہ کوچنگ کلاس وانگ ءِ ھاتر ءَ کئیت. آ کالجاں داخلہ زور انت ءُ کوچنگ کلاس گر اَنت دانکہ شریں وڑی ءَ انٹری ٹیسٹے تیاری ءَ کُت بہ کن انت. نی جُست ایش انت کہ 'کوٹا' انڑسٹریل ایریا ءِ نہ انت کہ اود ءَ فیکٹری ھست، گڑا اے ویب سیریزے نام پرچہ 'کوٹا فیکٹری' اِنت؟ اے جُست ءِ پسہ ءِ واست ءَ ویب سیریزے چارگ الّمی انت.

من کہ کوٹا فیکٹری چار اِتگ داں ایشی ءِ ھر کردار منی کِرّ ءَ موجود اِنت ءُ کوٹا ءِ پیمیں جاہ ھم ھست. مئے بلوچستان ءَ چہ ھم بازیں نودربرے پہ کوچنگ کلاس ءِ ھاترا شال ءَ رؤت ءُ ایشانی تہا وڑ وڑیں نودربر ھست. اے درائیں نودربر کوٹا فیکٹری ءِ تہا گندگ بنت.  اے ویب سیریز ءَ کہ تو چار ئے داں ھمے سما کن ئے کہ اے منی سر ءَ جوڑ بیتگ. اے ویب سیریز ءَ ناں تہنا کوٹا ءِ وانگی چاگرد پیش داتگ بلکیں مئے وانگی چاگرد ھم گندگ ءَ کئیت.

اے ویب سیریز ءَ وانگ ءَ گوں بندوکیں گیشتر جیڑہ پدّر کتگ. آہانی تہا ایجوکیشین ءِ کاروبار کہ چوں کوچنگ سینٹر competetion ءَ انت ءُ چہ دومی ءَ دیم روگ ءِ جھد ءَ اِنت. کوچنگ سینٹر یا کہ دگہ پرائیوٹ ادارہانی مارکیٹنگ strategy چی انت؟ اے دْراہ پیش دارگ بیتگ انت. تعلیمی ادارہانی تہا چے پیمیں ٹیچر وانینگ ءَ انت ءُ آ گوں نودربراں چے وڑ deal کن انت؟ دگہ وشیں چیزے ایش انت کہ چوں نودربر ہاسٹل زندگی ءَ وت ءَ را ٹھین انت، اود ءَ گوں چے وڑیں سنگتاں دُچار کپ اَنت. اے دراہ ویب سیریزے تہا گندگ بنت.

کوٹا فیکٹری ءِ اولی سیزن کہ چہ (TVF)The Viral Fever ءِ نیمگ ءَ شنگ بیتگ، آئی ءِ درائیں کار پہ نودربراں ستا کرز انت. کوٹا فیکٹری ءِ یک مول ءُ مراد ءِ Indian Information Technology(IIT) ئیگ اِنت کہ اے درستی 5,000 انجینیرنگ سیٹ(Seat) انت بلے اے سیٹانی واست ءَ 700,000 ءَ چہ گیش نودربر چکاس دنت، اے چہ گرانتریں چکاساں یکے.

کوٹا فیکٹری ءِ یک مستریں شری ءِ ایش انت کہ ایشی ءِ تہا 50 درسد کارکنوک کوٹا ءَ شُتگ ءُ IIT ءِ تیاری اِش کتگ. سیریز ءِ creator‌ کہ Saurabh Khanna اِنت آئی ءَ IIT وانگ ءِ ہمراہی ءَ وانینتگ ھم. Jeetandar ‌Kumar کہ سیریزے تہا جیتھو بئیا(Jeetu Bhaiya) ءِ کردار ءَ کنگ انت آ ھم وت IITian ئے. اے گپاں چہ زانگ بیت کہ ھما مردم آہاں وت اے دراھیں چیز دیتگ انت، مار اتگ انت ءُ پد ءَ تامر ءِ دروشم ءَ دیم ءَ آؤرتگ انت، چینچو  وش ندارہ کشی اِش کتگ.

ویب سیریز کہ بندات بیت اولی در ءَ ویبپ پانڈے(Vaibhav Pandey) کہ آ ویب سیریزے مستریں کردار اِنت گوں پت ءِ ہمراہی ءَ کوٹا ءِ شر تریں کوچنگ سینٹر 'مھیشوری'(Maheshwari) ءَ داخلہ زیرگ ءَ روگ ءَ انت بلے مھیشوری لیٹ آھگ ءِ سوب ءَ نہ زور اِیت ئِے ءُ آ پروڈیجی(Prodigy) ءَ ھمے ارادہ ءَ داخلہ زیر ایت کہ آئی ءِ یک سال ءِ پہ نندگ ءَ زوال مہ بیت ءُ آ دومی سال ءَ مھیشوری ءَ داخلہ زیر ایت. آ کہ وتی ہاسٹل کمرہ ءَ رؤت آ گوں نوکیں سنگتاں دُچار کپ ایت. اولی سنگت ءِ نام 'مینا' انت کہ آ چہ انچیں کہولے ءَ انت کہ آئی ءِ مالی جاور نگیگ انت بلے آ گوں وانگ ءَ ھب ءُ واہگ باز دار ایت.  دگہ سنگتے کہ آئی ءِ نام 'اُدے'(Uday) انت آ زر ءَ چہ سیریں کہولے ءَ سیالی کنت ءُ آ پہ زور IIT وانگ ءَ روان داتگ ئے، 'اُدے' یک جاھے گُش ایت کہ نی من واتر لوگ ءَ شُت ھم نہ کن آں پرچہ کہ مردم گُش انت کہ IIT ءَ سلیکٹ نہ بیتگ ءُ تتکگ.

 ویب سیریزے ہر کیریکٹر جِتا یک ارزشتے دار ایت ءُ یک پہ یک ءَ ایشانی بابت گپ نہ بیت. اے درائیں کیریکٹر گوں یکے دومی ءَ چون وھد گواز این انت ایشی ءِ چارگ ءَ شما را الّم وشی رس اِیت.

جیتو بھیا(Jeetu Bhaiya) کہ یک جوانیں ٹیچرے ءَ ابید نودربراں زندے اے دگہ جیڑہ ءُ جنجالاں سر ءُ سوج کنت. ویب سیریزے ءِ جند سیاہ ءُ اسپیت(Black &White) اِنت بلے ازمکاراں گوں وتی ازمکاریاں رنگ مان کتگ.

کیمرہ اینگل کہ آہانی تہا لہتے ڈرون شاٹ ھم مان انت ویب سیریز گیشتر زیبا کتگ ئے. باپشتی زیمر، سنیماٹوگراپی، ردکاری دراہ بے درور انت. دگہ جوانیں چیزے ویب سیریزے ڈائیلاگ انت کہ ہر ڈائیلاگ وت مزنیں گپ کنت ءُ پشدری معنی ءِ دار ایت. ازمکاراں ڈائیلاک شوکیں وڈی ءَ گُشتگ انت.

نی ما کا ایں ویب سیریزے نزوریانی نیمگ ءَ. مستریں نزوری کہ من سما کتگ آ ایش انت کہ وہدے چارمی episode ءَ 'ورتیکا' کئیت ءُ اولی گندگ ءَ ویبپ(Vaibhav) ءَ گوں آئی ءَ مہر بیت، اد ءَ چہ پلاٹ دگہ نیمگے ءَ تر اِیت ءُ love triangle ءِ جوڑ بیت، کسہ وتی اسل مقصد ءَ چہ گسر بیت. وانگ کم ءُ مہر گیشتر بیت.

گُڑ سر ءَ من ھمے گُشگ لوٹ آں کہ نودربر ایشی ءَ یک رندے الّم ءَ بہ چار انت پرچہ کہ اے گوں نودربراں سیالی کنت. اے ویب سیریزے اولی سیزن شما را یوٹیوب ءَ مفت ءَ چہ TVF ءِ چینل ءَ دست کپ ایت.