کوٹیِ بلوچستان
۔۔۔۔۔۔رگام بلوچ۔۔۔۔
کوٹی ءِ اے کُنڑ ءَ گندئے؟ اِدا سڑِتگیں سیاست ءِ بوه اِنت، وتپرستی، زرپرستی، موکہ پرستی ءِ پمپلیٹ سیاست ءِ گوش، چم، لُنٹ ءِ سرا درتکگ اَنت ۔۔۔۔۔!
کوٹی ءِ اے کُنڑ ءَ هم بوه یے پونز ءَ کپگ ءَ اِنت ناں؟
هاها اِدا گوستگیں روانک ءُ هڑتالانی پمپلیٹ سوچگ بوتگ اَنت ۔۔۔۔ بلے اے بوہ پمپلیٹانی نہ اَنت ۔۔۔۔ کُشتگیں مردُمانی جونانی بوہ اَنت ۔۔۔ شرّی ءَ بوه چِن ۔۔۔ ھون ءِ بوه بیت، ارس ءِ بوه بیت، گُٹگیر کُتگیں واهگانی بوه بیت۔۔۔۔۔ پدا کم کم ءَ بِچار آه ءُ پریاتانی توار گوشاں کپیت ۔۔۔۔ جون پاد کاینت، کُکّار کن اَنت، آه ءُ هیسکارگ جن اَنت ۔۔۔۔ پدا دست بنداں ءُ گریونت ۔۔۔ ترا پُرس اَنت " کئ لاش اتکگ؟ اے بری پمپلیٹ کئ نام ءَ اَنت؟
آؤدا بل بیا کوٹی ءِ سیمی کُنڑا بِچار ۔۔۔۔۔ ادا ھم چیز یے ءِ بوه اِنت ۔۔۔۔۔ بلوچیت، ایمانداری، مڑاہداری، میار جہلی، بیر گیری ھاھاھا اے درسُتانی بوہ انت ادا ۔۔۔۔۔ درُست سُچگ ءَ اَنت ۔۔۔۔ آؤدا چار ۔۔۔۔۔ بلوچ ءِ تمردی دُهت دیئگ ءَ اِنت ۔
ءُ کوٹی ءِ چارمی کُنڑا بِچار ۔۔۔۔ وت بوہ چن، چے ئے بوہ انت؟ چے سُچگ ءَ اِنت؟ هِچ هاهاها۔۔۔۔۔۔ اِدا سوچوک نِشتگ ۔۔۔۔ بِچار کندگ ءَ اِنت، کہکہ جنگ ءَ اِنت ۔۔۔۔ آئی ءَ چار باکس یے گونیں ۔۔۔۔ باریں کئی لوگ ءَ، کئی بلوچیت ءِ سوچگ ءِ جیڑگ ءَ اِنت!
بِچار ڈیل یے روک کُت ۔۔۔۔ اِشیں کُشت ئے۔۔۔۔۔ اشیں کندگ ءَ اِنت ۔۔۔۔۔!
تو جیڑگ ءَ ئے کوٹی ءِ میان ءَ کئے اِنت؟
هُرت بِچار ۔۔۔۔ بلوچ نِشتگ، وانگیں، ھیران اِنت، پُلگ بوتگ، شُدیک اِنت، گریوگ ءَ اِنت، گنوک بوهگ ءَ اِنت، سر ئے کہ پر بوهگ ءَ نہ ایں ۔۔۔۔ سئیگ نہ بیت، یک نیمگی ءَ چے شهماتے وارت، پُشت ءَ چاریت چپّی نیمگ ءَ چے لٹ یے وارت، چپ ءَ چاریت دیما چے لگت یے وارت۔۔۔۔ بِچار چوں زُکّرِتکگ، برھّنگ اِنت، بے وس اِنت ءُ اے ترس ءَ واب اوں کپگ ءَ نہ اِنت کہ اے بری شھمات کُجام نیمگ ءَ چے لگیّت، اے بری کئے برگ بیت، کئی لاش کپیت۔
No comments:
Post a Comment