پہ ردی نہ!
لوٹیت کہ گُشاں ھرچی بوتگ پہ ردی بوتگ، ھرکسءَ کُتگ پہ ردی کُتگءُ ھرکسی گوما بوتگ، ھم ردی بوتگ۔
بلے...
کیچءِ تپتگیں دلبندءَ ایریں لاشاں اے زاھر کُت کہ پہ ردی نہ۔ ردی کنگءَ پد پدا آ سانحہ ودی نہ بوتیں۔ کئی کوشءَ ردی منّئے، ملکنازءِ، حیاتءِ، تاج بی بیءِ، رامِزءِ یا شالءَ گورنر ہاؤس ءِ دپءَ ماں ایمبولینسءَ دوئیں تِپلاں کہ مرُدگی جاھءَ سپر کناں اَتکگ اَنت پہ انصاف لوٹءَ؟
لوٹیت کہ نبشتہ کناں کہ ھو اے پہ ردی بوتگ بلے نبشتہ کنگءَ ساری جار اَتک کہ دگہ لہتے ساھ پہ مدامی واستہ کید کنگ بوتگنتءُ گُشگ بوھگءَ اِنت کہ پہ ردی بوتگ اَنت۔ گُڈا مناں برازیلءِ بربط نواز ءُ آزمانکار پاؤلو کونیلہوءِ ھما گپ یاد اَتک کہ "یک ردی ے پدا دوبر کنگ بہ بیت گُڈا آ ردی ردی ے نہ بوتیں بلکیں آ یک ساپءُ سنگیں اِیں فیصلہ ے منّگ بوتیں."
اگاں ردی ے بوتیں تاں شہید حیاتءِ ھشت اِیں تیراں پدا کس نہ سُرپت۔ اگاں ردی ے بوتیں تاں لاشاں شالءَ سپر نہ کُت پہ انصاف لوٹءَ بلکیں انصاف وت اَتکگّ اَت پہ آھاں۔ اگاں ردی ے بوتیں اے لُنجیں شپ کسءَ بےواب نہ کُتنت۔ اگاں ردی ے بوتیں تاں بلوچستان نہ جُمب اِنت۔ ردی نہ!
No comments:
Post a Comment