ما ھم فاشسٹ انت

ما ہم فاشسٹ انت

۔۔۔۔۔خلیفہ برکت۔۔۔۔۔

دوہمی جنگِ عظیم ءِ وہد ءَ کہ جرمنی پولینڈ ءِ سرا اُرش کَنت گُڈا جرمن فوج آ وہد ءَ پولینڈ ءِ یہودیاں سک جنت۔ یک یک ءَ اِشاں پٹیت ءُ جنت۔بلے ہمدا یک شہرے ءِ توک ءَ یک بلاہیں موسیقارے بیت کہ پیانو جنت۔ آ ہم یہودی یے بیت نو جرمن فوج ءَ ہمے کمانڈ رستگ کہ دُرستیں یہودیاں بہ جن ات۔بلے چو کہ اے موسیقار شہر ءِ ناموریں پیانسٹے ءُ آئی ءِ فن ءَ چاگرد ءِ مردماناں بہ کساس تاہیر داتگ پمیشکا لس مہلوکءِ توک ءَ کہ کرسچن موجود اِتاں اِشاں اے موسیقار ءِ رکینگ ءِ سک باز جُہد کُت۔ موسیقار ءِ جان ءِ رکینگ ءِ ھاترا باز مردُم ءَ جان ہم قُربان کُت اَنت بلے موسیقار چہ جرمن فوج دست ءَ رکینت۔ 

وہدے کہ جرمن فوج ءَ اے شہر سرجم ءَ وتی دست ءَ کُت گڈا اِشاں یک ہم یہودی یے معاف نہ کُت یا تو دزگیر کُت اَنت یا کہ کُشت اَنت۔ ہمے وہد ءَ اِشاں پیانسٹ یک بیلڈنگے ءِ اپارٹمنٹءَ چیر دات کہ ہئودا دگہ کس نیست اَت۔ 

رند ءَ سرجمیں شہر جرمن فوج ءَ تباہ کُت شہر ءِ مہلوک ءَ نقل مکانی کُت ءُ چہ شہر ءَ در کپت اَنت دگہ ہند ءُ دمگاں شُت اَنت ۔شہر ءَ تہنا ہمے پیانسٹ پشت کپت گوں وتی پیانو ءَ چہ شُد ءُ تُن بزگی ءُ بہ وسی بمب ٹوپانی آواز ءَ سک آزاب اَت بلے آئیءَ ھردیں زندگ بوگ واستہ اِچ وس نہ دیست گُڈا آئی ءَ ہمے پیانو جت ءُ ہمے ساز ءُ زیمراں آئی را زندگ بوگءِ سکین دات۔آخر ءَ جرمن فوج فیصلہ کنت کہ نو اے شہر ما تباہ  کُتگ ادا نندگ ءَ ھچ فائدہ نیست۔ آ چہ شہر ءَ درکپگ ءِ فیصلہ کن انت دراہگ ءِ گُڈی روچ ءَ جرمن فوجی جہازانی بمب ءُ ٹوپانی آواز قیامت کن اَنت ہمی روچ ءَ پیانسٹ ہم سک بیزار بیت ءُ ءَ پیانو ءِ دیم ءَ نند اِیت ءُ جان ءَ امینچو کہ آٹیگ مان اَت گوں وتی دُرستیں طاقت ءُ قوت پیانو جنت۔

 سہتے ءَ انچو گُمان بیت کہ پیانوءِ آواز چہ بم ءُ ٹوپانی آواز ءَ چہ زور آور تِریں۔ پیانو ءِ آواز چہ زمین ءَ ءُ بم ٹوپانی آواز چہ آزمان یکیں دومی ءَ گوں تُردیاں میڑیتگ اَنت۔ ہمے وہد ءَ کَش ءُ کراں چہ جرمن فوجی ٹولی ءِ گوازگ ءَ بیت ہمدا یک فوجءِ آفیسرےءِ گوشاں پیانو ءِ آواز کپ ایت۔ آ اجب حیران بیت کہ آواز چہ کُجا پیداک اِنت۔ اے ہمے آواز ءِ رندگیری ءَ کنان کنت ءُ روت ہما بیلڈنگ ءَ سر بیت ہمدا آئی ءِ فوجی برانز گِر اَنت کہ صاحب  ما انوں رواں اے ھرکس اِنت ما اِشی ءَ تیراں گوں دُرشاں بلے آفیسر اِشاں مکن کنت۔ آ وت تہنا روگ ءِ فیصلہ کنت۔ آ میزان میزان ءَ ہمے آواز ءِ رندگیری ءَ کنانءَ بیلڈنگ ءِ توک روان کنت داں ہمودا سر بیت انچو کہ آ ہمے کمرہ ءَ پچ کنت ءُ تُپنگ ءَ پہ پیانسٹ ءِ نیمگ ءَ ٹال کنت بلے پیانسٹ پیانو گوں بےسما اِنت کہ مرگ منی سرون ءَ اوشتاتگ ۔ ہمے وڑا ءَ یک شل ءَ گوں وتی طاقت ءُ قوت ءَ پیانو جنان کنت آفیسر گیٹ ءِ دیم ءَ اوشتاتگ ءُ ہمے سازانی توک گار اِنت۔ پیانسٹ ءِ ساز گُشئے آئیءِ اندرءَ وپتگیں بکال ءَ را بیہار دیگ اَت اَنت ءُ آئی ءِ روح ءِ اندر ءَ یک نوکیں انسانے ودی کنگ اَت اَنت۔ آفیسر ءَ سک باز زیادہ تاہیر پیداک اَت۔ آ لوٹگءَ اَت کہ داں کہ من زندگاں ہمے وڈا پیانو ءِ آواز روان کنان بہ کنت۔

جہل ءِ فوج حیران اَت کہ پیانو ءِ آواز ہما وڑا روان اِنت ءُ مئے صاحب ہم گار اِنت۔ آئی ہم ھچ تِرک توار نیست ہمدا فوجی شش ءُ پنچ ءِ توک ءَ بنت کہ بیلڈنگ تہا بُرو ایں صاحب ءِ حال ءَ بہ گریں اگاں نہ ودار بکن انت ہمے دمان ءَ پیانو ءِ آواز ھلاس بیت ءُ سہتے ءَ پد تیرانی آواز بیت جہل ءَ اوشتاتگ ایں فوج گل ءَ بال بنت ءُ صاحب کہ کئیت تُرندیں پاداں گوں سُلوٹ ءِ کن انت ءُ رونت۔ اے جرمن فوج ءِ آخری ٹولی  بیت کہ شہر ءَ در کپیت۔ شہر چہ بمب ءُ ٹوپانی ءُ دنز ءُ دُتانی توک ءَ گار اِنت نہ مردمے اَست نہ ساہ دار گواہ اِنت بس یکیں پیانسٹ گوں وتی پیانو ءَ پشت کپتگ۔(فوجی آفیسر وتی تیر دیوار جتگ اِتاں)۔

نوٹ: انچو گُشنت کہ دنیا ءِ تاریخ ءَ جرمن فوج بدنام ءِ زمانہ فوج بوتگ کہ آئی چہ بدکردار تر ایں فوج انگت تک نہ بوتگ ءُ آ وہد ءَ جرمن قوم یک فاشسٹ ایں قومے ءِ نام ءَ زانگ بوتگ ءُ روچءِ مروچی ہمے گپ ءِ سرا  سک پشومانی ءِ اظہار کن اَنت۔ 

بلے بیا کہ بژن ءِ گپ اِش اِنت کہ مئے قوم کہ وتارا سیکولر پاپولر لبرل باریں دگہ چنچو لر و بر گُشیت بلے حال چہ جرمنی فاشسٹ ایں فوج چہ گنتر ایں۔