اے بَری کار محمد بن قاسم ءَ ھراب کُت انت
۔۔۔۔۔جاوید بلوچ۔۔۔۔۔
مزنی اوں سکیں مزنیں جنجالے۔ مردم پہ مزن بوھگ ءَ ھر ھما کار ءَ کنت کہ آئی ءَ ضمیر ءُ راستی بلّے توری ءَ مہ مَن انت۔ ءُ پدا دگہ مردم ترا بار بار مزن بوھگ ءِ احساس ءَ بدینت وَ گنتر۔ چُشیں جاگہ ءَ مردم چُش وَ گُشت نہ کنت کہ من چُش نہ آں کہ چُش شما منی بابت ءَ جیڑ اِت، مردم گُش انت نی مغرور انت ءُ اگاں چُش بہ گُش ئے کہ ھو بھئی من مزن آں وت گلائی یے بیت پمیشکہ مردم انچیں انچیں حرکت ءُ کار کنت کہ مہ گُشیت اوں کہ من مزن آں ءُ مزنی ءِ داتگیں سوگات ءَ چہ دَر ھم مہ اِت۔
کسہ چُش انت کہ مئے نصاب ءِ تہ ءَ ونتگیں دو مردم بیچارگ انچین انت کہ اے گیشتر بلوچ، سندھی، پٹھان ءُ بازیں لفٹ ءُ پروگریسو پنجاپیانی کرا ھم آ چمّاں گوں بہ چارگ نہ بنت کہ آ چماں گوں نصاب ءِ تہ ءَ وانینگ بنت۔ یکے واجہ کائدازُم ءُ دومی مہم بن کاسم۔۔۔۔ اشاں چہ نصاب ءَ ڈن وڑ وڑیں نام دینت ءُ لہتیں بے منطق ءُ بے شون اِشکُتگیں گپاں لہتیں راجدپتری راستی انت ھم کہ جیڑگ ءَ پَر ماینت۔
ھئیر اے بَری منی کار محمد بن قاسم ءَ ھراب کُت انت۔ نہ زاناں محمد بن قاسم ادا چنچو میاریگ اِنت بلئے میاری بوھگ انچیں نامے کہ کس ءَ پہ وت ءَ شات نہ بیت انچو من ءَ ھم۔ بیت کنت کہ اے ھر جاگہ ءُ ھر ادارگ ءِ جیڑہ بہ بیت بلئے گوادر ءَ زندگ ءُ زائری انچش انت۔
اسل ءَ یکے وَ گوادر سکّیں کسانیں شھرے ءُ دومی مئے مردم گیشتری چہ ھستیں سیاسی رِپک ءُ ہنراں نہ سرپد انت پمیشکہ ادا گیشتر ٹولی ءُ ادارگاں ترا یکیں وڑیں مردم دست کپ انت ءُ انچو سما بیت ادا اسپیس سک باز انت ءُ مکابلہ کم انت پمیشکہ چو "کیچ ءِ چنال ءِ سائگ ءَ" تو بیا وتی ازم ءَ ہنر ءَ پیشدار من وتی۔ تو من ءَ مہ گُش من ترا نہ گُشاں وتی لاپ ءَ گِریں وتی وتی کدّءِ ھساب ءَ ءُ جاگہ یے اگاں بھر ءُ بانک ءِ باریگ کئیت گڑا اود ءَ ھما ھساب ءَ بھر کن اِنت۔ گوادر ءَ ھر ادارگ ءَ فرد شرّیں شرّیں دست کپیت۔ وانندگ، کمٹڈ، زانتکار، بلوچ، راہشون ءُ کمکار بلے ادارگی دروشم ءَ "کمپرومائز کرنا پڑتا ہے" ءُ بس۔
محمد بن قاسم والا کسّہ ءَ پیش یک دگہ گپے۔ چُشیں بازیں درور ھئیر مُچ انت بلے یکے کہ تازگ اِنت ءُ من ءَ انی یات ھم پیداک انت آ اِش کہ یک وٹساپ گروپے ءَ من گون اِت انت گڑا نہ کن ئے یک روچے یکے ءَ گوادر ءِ یک سرکاری افیسرے ءِ توسیپ ءَ یک پوسٹے کُت ءُ آ توسیپ ءِ تہ ءَ نیو ٹاؤن نامیں اسکالرشپ ءِ ذکر اَت۔ اے اسکالر شپ ءِ بابت ءَ چیروکائی ما اِشکُتگ اَت بلئے منی پجاروکیں کم چہ کم کراچی، شال، تربت شاہ دربر جاہ ءُ پنجاپ ءِ شاہ دربرجاہاں وانوکیں نودربراں سد نودربر ءِ کساس نودربر من زانتگ ات کہ آہانی تہ ءَ کدی ھم کسے ءَ نام نہ گِپتگ ات کہ چُشیں اسکالر شپے ھست ءُ اے اے بُنیاد ءَ آہاں رَسگ ءَ اِنت یا کدی یک سمسٹرے ءِ زَر رستگ انت۔ گڑا من ھمے پوسٹ ءِ جواب ءَ گروپ ءَ ھمے جُست کُت کہ کسے سرپدی دات کنت کہ اے نیوٹاؤن اسکالرشپ اے وھد ءَ کے کے ءَ رَسگ ءَ اِنت ءُ اشییءِ واستہ کابل بوھگ ءِ چی شرت انت؟
ترُک ءُ نُک ءُ لاپی پُر مُشکی چُک۔۔۔۔۔
ھرام بات ھچ پسو نئیتک پدا من ھمے جُست اردو ءِ تہ ءَ نبشتہ کُت ءُ دیم دات۔۔۔۔۔ ھاھاھا نی من چارگ ءَ آں ماشاء اللہ گُش ئے زاناں گروپ ءِ گیشتر مردم(پدا ھما مردم کہ گوادر ءِ مزنیں مردم، بزاں چاگردی گُشاد کار، ورناہ ءُ نودربرانی کمک کار، راہشون، اھوالکار، ٹیلنٹڈ ءُ کمٹڈیں مردم) ودار ءَ انت کہ کے اشییءِ پسوءَ دنت ءُ چی دنت۔۔۔۔
من چاران آں پِلانی سین۔ پِلانی سین، پِلانی ھم سین۔۔۔۔ درستاں سین ءُ ریڈ کُت بلئے انگت تُرُک ءُ نُک۔۔۔۔۔۔۔
نی باری اتک منی مزنی ءِ کہ ادا وَ کس من ءَ بئے کنگ ءَ نہ انت۔ اگاں کس ءَ ھچ مہ زانت ایں ھاس پِلانی زی آں کہ کونڈُک دئیاں کجا انچیں موہ یے بہ رسیت ما پہ بیان ءُ میانے بہ دئیں۔۔۔۔ آہاں ھم ھچ نہ گُشت۔ مطلب سرپدی ءَ سرپد آں بلئے کے وتی دپار ءَ جور کنت۔ ءُ پدا من ءَ کہ یکے وَ دپار نہ رستگ دومی منی نی انا ءِ جیڑہ انت کہ کس ءَ من ءَ بئے نہ کُت پشلی ءَ گروپ ءَ لفٹ کن(سیاسی زبان ءَ بائیکاٹ) لفٹے کن۔ لفٹ بھئی۔
نی کایاں محمد بن قاسم ءَ۔ اے سنگت ءَ اوں شَر نہ کُت۔ دگہ یک ادارگے ءَ انچو بزاں استاد لوٹیت۔ گوستگیں یک چکرے ءَ ھم ادارُکی استاد زورگ ءِ جار بیتگ ات گڑا من باریں وتی چنچو ڈاکیومنٹسانی نکل، چنچو اکس کشت ءُ گوں یک درخواستے ءَ ءُ پدا ہپدہ گریڈ والاہی ءِ کرّا دستخط ءُ مہر جنگ ءَ رند جم کُت انت گڑا من ءَ انٹریو ءَ چہ پیش گُشگ بوت کہ ترا سیادی داروکیں ڈپارٹمنٹ نیست ءُ اے سبجکٹانی وتی مردم اتکگ انت تو تکلیپ مکن۔ من تکلیپ نہ کُت ءُ آ پوٹو کاپی ءُ اکسانی زَر وتی جم نہ کُتگیں مالانی زکوٰت کُت آں۔ بلئے رند ءَ مالوم بوت کہ چُش نہ انت۔۔۔۔۔ انگریزی والا کمیونکیشن اسکلز وانین ایت ءُ اسلامیات والا بلوچی۔۔۔۔ اگاں کسے کہ وانینت کنت۔
اے رندی ناں فوٹو کاپی کشت ناں اکس ءُ ناں اٹیسٹ مہ ٹیسٹ۔ یک سی وی یے آ ھم ادارگ ءِ جندئے پرنٹر ءَ چہ۔ یک درخواستے دوزاوے ءَ نبشتہ کُت ءُ جم کُت۔ انٹریو ءِ روچ بیت۔ من روگ ءَ آں مطالعہِ پاکستان ءِ وانینگ ءَ۔ لہتیں منی وڑیں بے روزگار ءُ لہتیں دومی روزگار ءِ شوہاز ءَ اتکگ ات۔ انٹریو ءَ پیسر کہ اے زانگ بہ بیت کے ءَ زیر ایت ءُ کے ءَ نہ زیر ایت اے زانگ بوھگ ءَ ات کہ کے کئی پجاروکی ءَ چی اتکگ۔ ھئیر انٹریو ءَ یک برے وَ من ھمے جھد کُت کہ انٹریو گروکاں ھمے باور بکنائین آں کہ من چون پاکستان اسٹیڈی وانیت کناں کہ من وَ میڈیا اسٹیڈی وَنتگ۔ ھئیر اے والا سیشن بیت ءُ من دومی راؤنڈ ءَ شُت آں۔ نی منی سرا اے احسان کنگ بیت کہ ڈیمو لیکچرے بہ دئے کہ پاکستان ءِ جوڑ بوھگ ءَ میڈیا ءِ کرد۔ اول وَ من دل ءَ سر سید، اقبال، محمد بن قاسم ءُ چاردئیں نکات ءَ بگر داں مائی فیفوریٹ "دی آئیڈیالوجی آف پاکستان" (کہ چو گیدی کسہ ءَ من ءَ یات انت ءُ انچش من رنگ ءُ روگن کتگ ات بلئے کاش۔۔۔۔۔) زاہ ءَ شُشت آں کہ مپتءَ من وتی دل وارتگ ات کہ اشاں یات کناں دوشی چارت انت۔ دومی من ماسک ءِ چیر ءَ کند اِت کہ استاد اسٹیج اِز یورز ٹو ڈے۔
من زور ڈاکٹرانی وڑ ءَ بورڑ ءِ سرا انگریزی ءَ لِک ات رول آف میڈیا فار دی کریئشن آف پاکستان۔ من وتی سجئیں انگریزی نی جَت آں۔ بندات کُت چہ بزّگیں "ہیکیز گزیٹ"(برصغیر ءِ اولی ھالتاک) ءَ۔ اتکاں "جامِ جہاں نما" پدا 1857 ءِ جنگ ءِ آزادی داں تہذیب الاخلاق ءُ باریں چے چے مِکس کُت داں ڈان من ءَ یات انت کہ آئی ءِ نام من گپت گوں۔۔۔۔
ڈن ءَ چہ اتکگیں انٹریو گریوکاں گُشت بہ نند واجہ۔
من نِشت آں۔ مستریں واجہ ءَ پہ براتی ءُ سنگتی ءُ راست ءَ راست گُشت کہ "تو ھرچی گُشت وَ شر گُشت بلئے ما دوئیں نہ زانیں کہ تو چنچو راست گُشت ءُ چنچو دروگ کہ مئیگی چیز نہ اِت انت" ءُ دیم ترینت سیمی واجہ ءِ نیم ءَ "اے واجہ ءِ سیادی گوں ھمیشان انت۔ اے بزانت ءُ تو بزان"
گوں اے گپ ءِ اِش کُنگ ءَ گوں گُش ئے واجہ ءَ انچو مار اِت گُش ئے برے برے دیوانے ءِ تہ ءَ مردمے گندئے تئی نیم ءَ اشارہ بکنت ءُ بہ گُشیت کہ "ھئیر پلانی وَ شرتر زانت کہ پلانی ءِ فیلڈ انت" پدا گپ ءِ جواب ءَ وت بہ دنت۔ ادا پِلانی وسرا کمو گَل بیت۔ مہ زانت توری ھچ۔
گڑا سیمی واجہ ءَ دیم ترینت منی نیم ءَ کہ "شرّیں پاکستان وَ جوڑ بوتگ وَ چہل ءُ ہپت ءَ، کُج انت چہل ءُ ہپت ءُ کجا "ہکیز گزیٹ"؟
اے جُستے نہ بیت بزاں منءَ کلام ءَ جَت ءُ اُشتر ءِ سرا کُچک ءَ وارت۔ منی دپ ءَ در اتک کہ "شریں پاکستان وَ چہل ءُ ہپتءَ جوڑ بوتگ ءُ محمد بن قاسم ہپت سد ءُ دوازدہ ءَ اتکگ، کج انت ہپت سد ءُ کجا چہل ءُ ہپت؟!"
کول ءِ سنگتے ءِ نہ گُش ئے کہ من جُست ءِ پُشت ءَ جُستے کت، گُش ئے زاناں من گُٹگے (گُردہ یے) لوٹ اِت۔
انٹریو شر بیت ھئیر مزنی ءَ (منی ءُ واجہ ءِ) چاگرد انچش کُت کہ من ءَ بے گُشگ ءَ اے احساس وت ءَ بیت کہ تو انٹریو دئیگ ءَ اتکگ ئے گِرگ ءَ اناں۔ ءُ پدا انٹریو وَ شر بیت گرکیں اے بری کار وَ محمد بن قاسم ءَ ھراب کت انت۔۔۔۔۔۔
No comments:
Post a Comment