ڈاکٹر کھور خان کے ات؟

 ڈاکٹر کہور خان کے اَت؟  

   وہاب مجید

 

ھشتاد ءِ ءِ گُڈّی ءُ 90 ءِ دھکءِ بِنداتی سالاں ڈاکٹر کہورخانءِ نام ءَ کراچی ءُ ھاس مکورانءِ ہمُک بلوچ نودربر آشنا ات۔ کراچی پمشکا کہ آ وھدءَ ڈاکٹر کراچیءَ ِنندوک ات ءُ مکوران پمشکا کہ آہیءِ سیادی گوں مکورانءَ ات ءُ مکوران بی ایس اوءِ "اسٹرانگ ھولڈ" ات۔ 

منی گوں ڈاکٹرءِ پجاروکی ہمے وہدءَ بوت کہ من ماڈل اسکولءَ وانگءَ ءُ بی ایس اوءِ چِست ءُ ایرانی تہا ھوار اِتاں۔ آ وہد ٹیپ ریکارڈنگ ءُ کیسٹءِ زمانگ ات۔ آ وہدءَ ڈاکٹرءِ گِیشتریں سیاسی چست ءُ ایرانی بُنجاہ کراچی ءِ کالج، شاہ دربرجاہ ءُ لیاری اَت۔ ڈاکٹرءِ ہمُک گُشتانک کیسٹاں ریکارڈ بوت اَنت ءُ گوادرءَ ما سنگتاں گوشداشت اَنت۔ ڈاکٹر سکیّں لاہقیں orator ءُ ھبر زانت ے ات۔ آہیءَ وتی گُشتانکانی تہا دلیلءِ ہمراہیءَ کِسّہ ہم گُشتگ اَت۔ ہمے کِسہّاں نودربر ءُ مہلوک گیشتر ڈاکٹرءِ گوشداروک ءُ منوگرجوڈ کُت اَنت۔ 

ہر وہدءَ کہ ڈاکٹر گوادرءِ سیاسی تر ءُ تابءَ اتکگ اَت گُڈا جنرل باڈی ءُ مُچیاں پد مالہتے سنگتاں شپءَ تاں دیر گوں ڈاکٹرءَ نشت ءُ سیاسی جاورھالانی سرا جُست ءُ پُرس کُت۔ ڈاکٹر کتاب وانوکیں مردم ے ات پمشکا آہیءِ جواب گیشتر "اکیڈمک" اِیت اَنت۔ بلے ہمے کتابی ءُ علمی جواب آہیءَ وتی چاگردی چست ءُ ایراں گوں ہمگرنچ کُتگ اِیت اَنت۔ بلوچءِ بدبھتی اِنت کہ مرچی مہے راجدوستیں سیاسی پارٹیانی مرکزی کمیٹیانی تہا چُشیں مردم تو باز کم گِندے کہ آ ھستیں عہدءِ سیاست، معشیت، چاگرد ءُ ادبی سرھالانی سرا کتاب وان اَنت۔ پمشکا تو گِندے کہ اے وتی ہمُک گُشتانکاں یکیں سُرءَ گانا جن اَنت۔

ھشتاد ءِ دھکءِ گُڈی سالاں بی ایس اوءِ پرشت ءُ پروش ءَ بلوچ نودربر بھر ءُ بانگ کُت اَنت۔ آھانی میانءَ برات کُشی ے بِندات بوت۔ بُنجاہی رھشونانی وت ما وتی بے پاہدگیں جنگّءَ بلوچءِ وانگجاہ، سیاست ءُ چاگردءَ مزنیں تاوان ے رست. اے ہمے وہد اَت کہ دومی گروپءَ اے نعرہ مشہور کناہینت کہ " سی آہی اے کے تین نشان۔۔۔ رازق، جالب، کہورخان". اے وڈیں وتگڑیں بُہتام رازق، جالب ءُ مرچی ڈاکٹر کہورخانءِ اے کوڈھیں دُنیاءِ یلہ دیگءَ پد ہم کسّےءَ ثابت کُت نہ کُت اَنت۔ 

بی ایس اوءِ سیاستءَ چہ پد 90ءِ دھکءِ بِنداتی سالاں ڈاکٹر کہورخان گوں وتی لہتے ہمخیالیں سنگتاں پاکستان نیشنل پارٹی بزاں کہ پی این پیءَ ھوار بوت۔ آ وہدءَ پی این پی ءِ سروک میر بیزن بزنجو ات۔ ڈاکٹر مکوران ڈویژنءِ آرگناہزر جوڈ کنگ بوت۔ آ وہدءَ من تربت ڈگری کالجءَ وانگءَ اِتاں۔ گرماگءِ چُھٹی اِتاں۔ من لوگءَ اتکگ اِتاں۔ معلوم بوت کہ ڈاکٹر وتی پارٹیءِ تنظیمی دورہ ےءَ گوادرءَ اتکگ۔ من ءُ لہتے سنگت ڈاکٹرءِ گندگءَ شُت اِنت۔ مناں یات اِنت ڈاکٹرءَ کُہنیں پوٹوھار ے گوں ات کہ پارٹیءَ آہیءَ پہ دورہءِ واستا داتگ اَت۔ ما ڈاکٹرءَ پاکستان نیشنل پارٹی ءِ تہا ھوار بیگءِ سبب ءُ دگہ بازیں جُست ءُ پُرسے کُت۔ 

گوادرءِ دورہءَ پد ڈاکٹرءَ تربتءَ روگءِ ارادہ کُت۔ نوں منی کالج ہم پچ بوھگی اَت پمشکا من ڈاکٹرءِ ہم سپر بوتاں. مناں یات اِنت تلارءِ ھوٹلءَ کہ ما داشت گُڈا ڈاکٹرءِ گپاں چہ من ماریت کہ ڈاکٹر پی این پیءِ روایتی سیاستءَ چہ دلجم نہ اِنت۔ آہیءَ گُشت کہ مہے ھیال ہمیش بوتگ کہ بلوچ ماس پارٹیانی تہا پی این پی پروگریسیو ءُ ماڈریٹیں پارٹی ے بلے اِدا ہم روایتی مردمانی ھولڈ اِنت۔ آھانی "ویسٹیڈ اِنٹرسٹ" اَنت۔ آ ترا ھچبر پارٹیءِ مستریں اُگدہ نہ دینت ءُ اسمبلیءِ روگءَ نیل اَنت۔ 

اے سپرءَ پد منی گوں ڈاکٹرءَ ہچ وڈیں ھبر ءُ ھال نیست ات۔ پدا یک روچے ھال اتک کہ ڈاکٹرءَ بلوچستان پبلک سروس کمیشن ءَ سیکشن افسریءِ چکاس  پاس کُتگ۔ اے ھالءِ اشکنگءَ گوں مناں ڈاکٹرءِ ہما گپ یات اتک کہ ڈاکٹرءَ تلارءَ گوں من کُتگ اَت۔

ڈاکٹرءِ تیوگیں سروسءِ دورانءَ منی گوں ڈاکٹرءَ ایوک دو گِند ءُ نِند بوتگ ات. یکے کوہٹہءِ ھوٹل ےءَ آ لہتے سنگتانی گِند ءُ نِند ءَ اتکگ اَت ءُ دومی بلوچستان یونیورسٹیءَ آ یک جُست ءُ پُرسی مراگش ےءَ لوٹاہینگ بوتگ اَت۔ 

ڈاکٹر چے پیمیں بیوروکریٹ ے بوتگ؟ وتی سروسءِ دورانءَ آہیءَ لس مہلوکءَ چے پیمیں آسراتی داتگ ءُ مدت کُتگ؟ اے بابتءَ مناں ہچ سرپدی نیست۔

سرکاری نوکریءِ رہٹاہرمنٹءَ پد وھدے کہ سوشل میڈیاءَ اے گپ شِنگ ءُ تالان بوت کہ ڈاکٹر گوں وتی لہتے ہمخیالیں سنگتاں یک نوکیں سیاسی پارٹی ے جوڈ کنگءَ دلمانگ اِنت گُڈا من اے بابتءَ یک کسانیں نبشتانکے نویسیت ءُ ڈاکٹرءِ سرا وٹس اپ کُت۔ من ڈاکٹرءَ گُشتگ اَت کہ مروچیگیں بدل بوتگیں جاورھالانی تہا یک نوکیں پارٹی ے اڈ دیگ ارزانیں کارے نہ اِنت۔ اے تجربہ لہتے مردماں پیسرا ہم کُتگ بلے آ بے سوبین بوتگ اَنت۔ من ڈاکٹرءَ اے ہم صلاہ دات کہ آ ھستیں بلوچ راجدوستیں پارٹیانی تہا یکےءَ ھوار بہ بیت ءُ سیاسی ورکراں یک رندے پدا مُنظم ءُ آھانی رھشونیءَ بکنت۔ ڈاکٹرءِ جواب ہم ہمیش ات کہ "منی مکسد ہم ہمیش بوتگ کہ سیاسی کارکن وتی وتی لیڈرشپ ءُ سیاسی پارٹیانی پیسلہانی بابتءَ سوال چِست بکن اَنت۔ آ کریٹکل بہ بنت۔  

ڈاکٹرءَ گوں منی گُڈی گِند ءُ نِند گوادر پریس کلبءَ نیشنل پارٹیءِ اڈ داتگیں سیاسی مکالمہ ءُ جُست ءُ پُرسی مراگش ے ءَ بوت۔ 

ڈاکٹرءِ سیاسی سپرءِ اگاں ما تجزیہ بکنیں گُڈا یک نیمگءِ اے گپ پدّر بیت اِنت کہ بلوچستانءِ وڑیں نیم قباہلی ءُ روایتی چاگردےءِ تہا یک لور مڈل کلاس ءُ مڈل کلاسءِ وانندہیں سیاسی کارکن ے روایتی بُتاں چیلنج کُت کنت۔ بلے دومی نیمگءَ اے گپ ہم راست اِنت مہے پارٹی کُہنیں کمیونسٹ پارٹی نینت کہ وتی فُل ٹاہم سیاسی ورکرءَ لاپ ہم بہ دینت۔ مروچی دانکہ تہی وتی "سورس آف انکم" ے مہ بیت اِنت تو پارٹیءِ تہا وتی گپءَ مناہینت کُت نکنے۔ 

وانگءَ پد اگاں ڈاکٹر مالی اڑءُ جنجالانی دیمپان مہ بوت اِنت ءُ آہیءَ وتی زِندءِ گِراں بہاہیں سِی 30 سال سرکاری نوکریءَ مہ داتین اَنت ءُ سیاست بہ کُت اِنت بِگندے مرچی پارٹی ورکرءِ ارزشت، بلوچ چاگردءَ رُژناہ پگری ءُ وانگ ءُ زانگءِ کلچر گِیشتر ودیتگ اَت۔