گُڈی نِمدی

گڈّی نِمدی 

نبشتہ کار: شاہ ابنِ شین

Organisation armée secrète 

زمستانی شپے ات ما لھتے سنگت تیگت کوہ ءَ آسے ءِ نِوان ءَ نشتگ ات ءُ ڈی ڈبلیو ءِ اردو سروس ءَ گوشدارگ ءَ اتیں 

الجزائر ءِ جنگ ءِ کِسّہ ات کہ چتور  او اے ایس ءَ الجرائز ءِ آجوئی ءَ را بے سوب کنگ ءِ ھاترا فرانس ءِ مھتر ڈیگال ءِ سرا ارش کتگ ءُ الجزائر ءِ تہ ءَ پد ماں پد تراکانی یک رِشتے بُنگیج کتگ چد ءُ پیشتر 1930 ءِ یک ندارگے ات فرانس ءِ لشکر الجزائر ءَ وتی گاماں ایر کنت بنداتی سی سالانی تہ ءَ دَہ لکّ الجزائری مردم شھید کنگ بیت جنین آدماں گوں پہ زور ھراب کاری بیت گونڈیں جِنکیں زھگانی سِتراں گرمیں آسن مان کنگ بیت ءُ بچکانی ستر گوں کارچ ءُ ڈکّی گُڈّگ بنت اے زوال کاری یکشل ءَ برجاہ بیت 

سنگتے ءَ ریڈیو بند کت ءُ بنگلہ دیش ءِ کسّہ بندات کت اینچُک ءَ من پاد اتک یکرّ ءَ نشت ءُ استار چار اتاں 

سھراب 

ترا اگاں اے وڑیں ویلانی گوش دارگ ءِ یا وانگ ءِ موہ رس ایت ھچبر میان ءَ یل اش مہ دئے یا وَ گوش مہ دار ءُ مہ وان یا وَ دل ءَ مزن کن ءُ سرجم اش کن پرچا کہ ھر ھما کار کہ نیم بُندگ بہ بیت آئی ءِ تاوان باز بنت.

من اے سپر ءَ بازیں مردماں گوں دُچار کپتگاں زانوگر ءُ بے زانتاں گوں دیوان کتگ مرچی اے گڈّی نِمدی ءِ تہ ءَ من ترا پَروم ءِ زانشی ایں کماشے ءِ سوجاں ندر کناں .

ھور منی کُلّ ءَ مہ گوار منی برات ءِ کابیل ءَ بہ گوار"

مردم وتی وس ءَ زندگی ءِ بازیں جنجالاں ترھینگ ءِ جھد کنت 

بلے جنجال انچیں پیچ گِپتگیں جیڑہ ودی کن اَنت کہ بے وسی وتی برانزاں مھکمی ءَ شھار ایت 

زندگی کرٹیکل جاورے ءَ کئیت ھمے جاور اِنت کہ کمّے گیش گم انسان ءَ کُشت یا تباہ کت کنت کسے ءَ ترا ھمے جاور ءِ ازاب ءَ رکینت کت تو پہ وت ءُ پہ دگراں سوب مندیں کشک رست کن ئے!  

زندگی ءَ جیڑہ ھلاس نہ کن اَنت 

جیڑھانی توجیل ءِ شوھاز نہ کنگ ھلاس کن اَنت

من جست کت واجہ اے گپّانی مول ؟

پسّہ ءَ وتی دست ءِ اِزران ئےِ منی دیم ءَ ایر کت کہ ایشی ءَ یک دستے ءَ گوں پروش من وس کت پروشگ نہ بوت گُشت ئےِ دوئیں دستاں زور من پدا وس کت ازران ءِ دار مھکم ات نہ پُرشت سیمی براں من آئی ءِ بے گشگ ءَ وتی کونڈ ھم سک دات ازران پردگے پرشتگ ات بلے چہ من پچّ ئےِ گپت ءُ گشت ئےِ زندگی ءِ کرٹیکل جاور ءِ مسال ھمیش اِنت تو کمّے گیش زور بہ جت ایں ازران پرشتگ ات ... بلے من ایشی ءَ را رکینت اے باندا دگرے ءِ کار ءَ کئیت.

تو اگاں یک انسانے ءَ را ھمے وڑیں جاورے ءَ چہ بہ کشّ ئے آ باندا دگرے ءَ ھمے وڑیں جاورے ءَ رکّین ایت 

سھراب برز ءَ من 

Organisation armée secrète

 نبشتہ کتگ اے فرانس ءِ سی ٹی ڈی بوتگ.

تئی ناکو کمبر مبارک