گوادر، شھید لالا حمید چار راہ ءَ نندانک برجاہ

گوادر، شھید لالا حمید بلوچ چار راہ ءَ نندانک برجاہ

جاوید بلوچ                         

گوادر ءِ مھلوک گوستگیں سے روچاں وتی بُنکی ھکانی ھاتر ءَ نشتگ انت۔ بزگیں ءُ لگت مالیں دریاورد، بزگر ءُ پوریاگر دیریں کہ بے اوست ءُ بے امیت بوتگ انت۔ یک دھکے ءَ گیش انت کہ اے مرماں گریوگ ھم یلہ داتگ بوتگ۔ ھما کہ راھشون ات انت کول ءِ واجہ ھسین واڈیلہ ئیگ ءَ آ بیگواہ کنگ ءُ گار کنگ ءَ پد آھانی لاش دَور دئیگ بوت انت۔ مھلوک ترسینگ بوتگ انت۔ سکّاں اذیت ءُ بزگی ءَ پد نی گوادر ءُ مکران ءِ مھلوک ءِ دل ءَ یک نوکیں اوستے ءِ شاہ یے ءَ سر کش اتگ۔ ھما بزگیں بلوچ کہ دیریں آھاں گریوگ لوٹ اتگ بلئے پہ بیم ءُ ترس آھاں گریت نہ کُتگ۔ مرچی مولانا ہدایت الرحمٰن ءِ دروشم ءَ آھاں یک راھشونے دست کپتگ۔ مرچی مھلوک ءِ امیت ءُ واھگ پہ وتی بُنکی ھک، پہ وتی ڈیھ ءَ امینچو سریچ انت کہ آ پہ سر ءِ جاک اشیی ءِ درشانی ءَ کنگ ءَ انت۔

مولانا ءَ ناں ایوک مھلوک ءَ گریوگ ءِ موہ داتگ ءُ مردماں اے دلبڑی داتگ کہ شپ ستھر سیاہ ءُ تامور بہ بیت بلئے روچے ءِ امیت دارگ ءُ گوربام ءِ ودار کنگ ءَ چہ دلپروش بوھگی نہ انت۔ آئی ءَ مرچی دروگیں راھشونانی دیم پدر کت انت ءُ اے ریاست ءِ جبر ءُ زوراکیانی بگیری ءَ ایوک وانندہ اناں بلکیں نہ ونتگیں لس شھری، لس دریاورد، بزگر ءُ زالبول ھم پر ایمنیں سیاسی مزاحمت کار جوڑ کتگ انت۔ مرچی گوادر ءَ ھوار، مکران ءُ بلوچستان ءَ مولانا ءَ یک برے پد ءَ دگ ءُ روڈانی سر ءَ بلوچ ءِ نام ءُ ریاستی زوراکی ءِ بگیری ءَ سر ءِ جاک توار برز کنگ ءِ یک ربیتے دوار زندگ کُتگ۔

اے بیست ءُ یکمی کرن انت۔ ادا نی ھئیالانی درشانی ءِ آجوئی ءِ سر ءَ بندش جنگ بیت نہ کنت۔ نی جھان ءَ را پہ دروگیں اکس رَد دئیگ نہ بیت۔ نی پہ وتی واھگ ءَ روتاک ءُ ٹی وی ءِ دروشم ءَ دروگیں ھال ءِ بُن زوت ٹُنگ بیت۔ نی زوراکی ءِ بگیری ءَ لس مھلوک ءَ ٹیکنالوجی ءِ دروشم ءَ وتی توار ءِ جھان ءَ سر کنگ ءِ داب در گیتکگ۔ نی عرب اسپرنگ ءِ آشوب ءِ دروشم ءَ زوراکیں ڈکٹیٹریں سرکارانی ھاکمی ءِ روچ بُڈ اتگ انت۔ نی مردمانی بیگواہ کنگ ءُ کُشگ ءُ آھاں یکیں قبر ءَ کَل کنگ ءِ ھال یکیں زوتاں جھان ءَ سر بیت۔ نی مولانا ہدایت الرحمن ءِ وڑیں راھشون وتی ساہ ءُ سر ءَ سرگوزگ ءَ ساجو انت۔ نی زَر ءُ زوراکی ءِ لب ءُ لالچ ءَ ابید ھم بلوچ گُٹ گیر بوھگ ءَ تیار نہ انت۔ بلئے بلوچاں گپے گُشتگ کہ "بگاہ ءِ دست وتی گوھار ءِ پندول ءَ رَسیت" ھمے وڑ ھستیں ریاستی ادارگانی دست کہ ھچ ءَ نہ رسیت۔ آھانی دروگ ءِ بُن کہ ٹُنگ بوتگ گڑا ریاستی ادارگ اے بیست ءُ یکمی کرن ءِ ٹیکنالوجی ءِ دھر ءَ ھم وتی پت ءُ پیروکی ھوش ءِ واھُند انت۔ ھما فوجی ءُ مارشلائی پگر انت۔ ھما کم عقلی ءُ جاھلی کہ بلکیں "روچ پہ لنکُک چیر بہ بیت"۔ گوادر ءِ مردمانی بُنکی لوٹاں پہ نشتگیں زہرشانی نندانک ءِ دارگ ءِ ھاتر ءَ دومی بَر انت کہ موبائل انٹرنٹ بند کنگ بوھگ بئیگ ءَ انت۔

وھدے انگریز ءَ وتی زوراکی ءَ گوں اظہار آزادی رائے ءِ سر ءَ بندش جت نہ کُت۔ وھدے ضیاء الحق ءُ مشرف ءَ وتی آمریت ءِ گروناکی ءِ دھر ءَ ھالانی سر ءَ بندش جت نہ کُت۔ وھدے گوستگیں ھپتاد سال ءَ گیش تو بلوچستان ءِ تہ ءَ وتی زوراکی ءُ زُلم چیر دات کُت نہ کت انت۔ گڑا موبائل انٹرنٹ ءِ بند کنگ ءَ چہ راستی چیر بوت کنت؟

دومی بَر انت کہ مولانا ہدایت الرحمٰن بلوچ ءِ سروکی ءَ گوادر ءَ برجاھیں پُر ایمنیں زہرشانی ءَ کُتگیں لوٹانی تو سرجم کنگ ءَ تیار نہ ئے۔ دیمرھی ءِ نام ءَ تئی دروگ ءِ بُن ٹُنگ بوتگ۔ سی پیک ءُ گوادر پورٹ ءِ نام ءَ تو بے کساس وسائل ھرچ کُتگ ءُ یک دروگیں اکسے جھان ءَ پیش داشتگ، ءُ مرچی تئی آ دروگ جھان ءِ دیم ءَ پدر بوتگ گڑا تو انٹرنٹ ءِ سر ءَ بندش جن ئے کہ بلکیں راستی چیر تریت۔ ھزارانی کساس ءَ زھرشانی ءَ نشتگیں مردم وتی شومیں کسمت ءِ سر ءَ نالان کن انت ءُ واتر رو انت یا مولانا ہدایت الرحمٰن پد کنزیت ءُ گپ پد ءَ گار بیت۔ اے یک زھگی لئیبے ھم نہ انت چیاکہ مرچیگیں زھگ ھم ٹیکنالوجی کارمرز کنگ ءَ زبر انت۔ ءُ مرچیگیں ورناہ وَ گیشتر زانت کہ انچو آپ، لئین ، وانگ ءُ زانگ ھمک انسان ءِ بُنکی ھک انت ھمے وڑ ءَ ھئیالانی درشانی ءِ آجوئی ھم بُنکی انسانی ھکانی تہ ءَ ھوار انت۔ اے دھر ءَ پہ زور ھالانی شنگ کنگ دارگ نہ بیت۔

گوادر ءِ انوگیں زہرشانی زرمبش ءُ بُنکی ھکانی لوٹ کنگ ءِ زہرشانی نندانک ءُ مولانا ہدایت الرحمٰن ءَ ھوار ھمک ورناہ ءُ بیان بوتگیں گپ ءُ واقعہ مزاحمت ءِ علامت بوھگ ءَ انت۔ ءُ انٹرنٹ ءِ بند کنگ ءَ گوں ریاستی ادارگاں اے ھم پدر کُت کہ آ دُزے ءَ وَ دُز انت بلئے آ انگت نوزدہ سد ءُ ھپتاد ءِ پگر ءِ واھند انت۔ بلئے اے زہرشانی نندانک، اے لوٹ، اے تحریک ءَ گوں بندوکیں ھمک ساھت مزاحمت ءِ علامت بوھگ ءَ انت۔ انچُش بار بار انٹرنٹ ءِ بند کنگ ھم نی مزاحمت ءِ پجار جوڑ بوھگ ءَ انت۔ گوادر ءِ ھمے چار راہ ءَ کہ زہرشانی نندانک برجاہ انت اشییءَ اشیی ءِ دروشم ءِ ھساب ءَ وائے چار راہ گُش انت بلئے نی اے رویہ ءِ گندگ ءَ گوں کہ بار بار وتی بے سوبیانی چیر دئیگ ءَ پہ صحافت ءِ آجوئی ءِ سر ءَ بندش جنگ۔ انٹرنٹ ءِ بند کنگ ءُ ھئیالانی درشانی ءِ کانود ءِ داتگیں ھک ءَ چہ زبھر کنگ ءِ پدا مزاحمتی بستار ءَ بائد ھمے وائے چار راہ ءِ نام گوادر ءِ اھوالکار ءُ ھمد ءَ گُلزمین ءِ دلبند ءَ وپتگیں بلوچ اھوالکار شھید لالا حمید بلوچ ءِ نام ءَ بہ بیت۔ تاکہ دگہ برے کسے ءَ ھم انسانی ھکانی پاد مال کنگ ءُ ھئیالانی آجوئی ءُ اھوالکاری ءِ سر ءَ بندش جنگ ءِ بابت ءَ جیڑ ات گڑا آ بہ زانت کہ آئی ءِ اے جاھلی حرکت آئی ءَ پہ بدیں نامے و بیت بلئے بلوچ یک وانندھئیں راجے ءُ اے بیست ءُ یکمی کرن ءَ اشیی ءِ قلم، توار ءُ ھئیالانی درشانی ءَ تو داشت نہ کن ئے۔

مرچی مولانا ہدایت الرحمٰن ءُ آئی ءِ سنگتانی دمبرگ ءِ جاگہ ءَ ریاستی ادارگ دمبُرت انت۔ بیگاہ ءَ وھدے پدا آھاں انٹرنٹ بند کُت گڑا زھرشانی ءِ جاگہ ءَ گوادر ءِ لھتیں اھوالکارانی گوم ءَ ما اوشتوک ات انت ۔ ما ھمے سوڑگ کنگ ءَ ات انت کہ بار بار سرکار زھرشانی ءِ بے سوب کنگ ءِ ھاتر ءَ انٹرنٹ ءَ بند کنگ ءَ انت۔ بائد اے انٹرنٹ ءِ بند کنگ ھم اے زھرشانی ءِ وڑ ءَ یاتگیر بہ بیت ءُ مزاحمت ءِ نشانی بہ بیت گڑا یک سنگتے ءَ ھمے سلہ دات کہ اے وائے چار راہ گوادر ءِ اھوالکار شھید لالا حمید بلوچ ءِ نام ءَ بہ بیت دانکہ ھردیں دگہ برے دگہ ایوب، ضیا ءُ مشرپ ذہنیتے کدی انسانی ھئیالانی آجوئی ءِ درشانی ءِ سر ءَ بندش جنگ ءِ بابت ءَ جیڑ ایت گڑا بہ زانت کہ اے بیست ءُ یکمی دھر ءَ اے یک سکیں بلائیں نادانی ءُ جاھلی یے۔ شھید لالا حمید چار راہ ءَ گوادر ءِ بُنکی ھکّانی لوٹ کنگ ءِ ھاتر ءَ مولانا ہدایت الرحمٰن بلوچ ءِ سروکی ءَ زہرشانی گوں وتی جوش ءُ جوزگاں برجاہ انت بس بے چارگیں ادارگ وتی بے سوبی ءَ کدی انٹرنٹ ءَ بند کن انت ءُ کدی پچ کن انت بلئے بلوچ ءِ توار ءَ باتیل جکسینتگ۔