غدّار ءُ کرشن چندر

غدّار ءُ کرشن چندر 

سلال ساوڑ

ناول " غدّار " من ءَ گون اَت ءُ ماں بلوچستان یونیورسٹی ءِ بُک پوائنٹ ءِ کینٹین ءَ سنگتے ءِ آهگ ءِ ودار ءَ کنگ ءَ اِتاں کہ چہ باریں کُجام نیمگ ءَ دگہ منی نزّیکیں " تمردیں وانوکیں " سنگتے ءِ چم منی دست ءِ کتاب ءَ کپ اَنت ءُ دیم پہ من کئیت  کتاب ءَ چِست کنت ءُ  سرظاهری ءَ چم شانکے ءِ دئیگ ءَ رند پدا کتاب ءَ منی نیمگ ءَ ٹال کنت ءُ کندگے ءَ گوں درّائین ایت :  " اووں!  یار تو یلدئے اِشانی وانگ ءَ "

من ءَ " تمردیں وانوکانی" ہمے رویّہ دوست نہ بیت کہ دگرے ءِ وانگ ءِ دیم ءَ اڑاند بَنت 

  چونھا ھرکسی وتی مزاجے ءُ جتائیں پسُند ءُ ناپسُند بَنت پمیشکا باید جند ءِ ناپسُند ءَ را دومی ءَ اوں پہ ناپسُند کنگ ءَ مجبور کنگ مہ بیت ، اِے رِد ءَ ھرکس آزات اِنت کئے ءَ دوست داریت ءُ کئے ءَ نادوست کنت یا کئے را وان ایت یا ناں  مہ کن کنگ ءُ نَئیلگ ءِ کرد جُوان نہ اِنت،  البت تو ونتگیں چیزے ءِ درگت ءَ وتی مارشت ، هیال ءُ ریو ءَ دات کنئے  بلے داشت نہ کنئے 

پہ مَں کسّہ یے تُری کُجام ھم تکنیک ءَ بہ بیت  بیانیہ  کہ  چیز ارزان ءُ تچک ءَ تچک پیش کنگ ءُ بیان بَنت  جتا جتائیں واقعہانی وت ماں وت همگرنچی ءُ آئی تہا سادگی یے بیت ءُ ھر چیز پیداور اِنت ،  یا چیدگی  بیت کہ اود ءَ  هیال، مارشت ءُ وتی مقصد ماں هاسیں نشانیانی وسیلہ ءَ پیچیده ءُ غیرروایتی درشان کنگ بَنت،  یاکہ تُری  آزاد تلازم خیال کہ پکر ءُ هیالانی هاسیں رد و بند نہ بیت ءُ شنگ ءُ شانگیں صورتے پیداور اِنت  یا تجرید ءِ تکنیک بہ بیت کہ اود ءَ پلاٹ ءُ کارست ءِ پیداور کنگ ءُ رُدوم دئیگ سرا زور دئیگ نہ بیت پلاٹ ءُ کسّہ کوردیم بَنت - - - - - - - -

من ءَ انچیں گِدار وانگ ءَ وشتر بیت ماں آئی ءِ تہا ابیلے ءَ نداره کُت بہ کناں، پہ مَں زردانی مارشت ءُ پگراں بیاریت ءُ یک چاگردے ءِ داستانے ءِ اظہار بہ بیت ، ھما ناول منی پسُند ئیگ اِنت کہ  لس  جیڑه ءُ درداں گویاک بہ دَنت 

کرشن چندر اُردو زُبان ءِ دیماتریں فکشن رائٹراں یکّے ءُ مستریں ترقی پسُندیں نبشتہ کار اِنت، آئی ءِ گِدارانی پجّی ءَ بازیں آزمانکی کتابے دیم ءَ اتکگ،

آئی ءِ تخلیق انسانی جیڑھانی دَرنگازی ءَ کن اَنت ءُ آئی ءَ گیشتر  مھر ، غریبی ، شُد ، لُٹّ ءُ پُل ءُ ظُلم ءُ زوراکی ڈؤلیں بُن گپّ وتی ساچشتاتی بَھر جوڑ کتگ اَنت، 

" غدّار " کرشن چندر ءِ نامی ایں ناولاں یکّے کہ پاکستان ءِ جوڑ بئیگ ءِ وهد ءَ  ماں ھندوستان ءَ ھندو ءُ مُسلم ءِ نام ءَ بِنا بیتگیں جنگ ءُ هون ریزی ءِ پُشدر ءَ نویسگ بیتگ.  چونہا اِے سرهال ءَ بازیں گِدار نبشتہ کنگ بیتگ اَنت چوکہ خوش ونت سنگهـ ءِ '' ٹرین ٹو پاکستان "   بهیشم ساہنی ءِ " تَمس "   قرة‎العین حیدر ءِ "آگ کا دریا "  رمانند ساگر ءِ "اور انسان مرگیا " دگہ باز، 

ءُ چَرے وَیل ءِ پُشدر ءَ بازیں تامُر هم اڈ دئیگ بیتگ. 

اِے گِدار سرجم ءَ  "بیج ناتهـ"  نامیں ھندو ایں کارستے ءِ مونولاگ اِنت  بزاں ھمے کارست هبر کنت ءُ وتی هیال ، سرکپت ءُ اهوالاں بیان کناں بیت.  کسّہ ءِ بُنگیج لالے نامیں میتگے ءَ چہ بیت.  یک مھرانی دَوار، ھندو ءُ مُسلمانانی پُرامن ءُ هم سنّت ایں میتگے کہ ناگہا روچے ھندوانی کُشگ ءَ شورشے پاد کئیت ءُ ھر یکّے ترْاں تُرْون بیت۔  

اِے ناول ماں جنگ ءِ نوبت ءَ جگر سندیں واقعہانی یک گرْنچے ، درد ءُ اندوہے ءِ سفر اِنت  وانگ ءِ تہا انچیں مُلوریں کیفیت دَنت کہ گریوگ پرمائیت ءُ بژنیگ کنت - 

تژن ءُ مَلنڈ کنگ کرشن چندر ءِ تخلیق ءُ ساچشتی هاسیتانی یک مزنیں بھرے،  ناول " غدّار " ءِ تہا آئی ءَ اِے مذہبی کُشت ءُ کوش و فساد ءِ بگیری ءَ وشّیں وڑے ءَ تژن ءِ سگار کار گِپتگ - - - - - وھدے بُنجاھی کردار  " بیج ناتهـ " ءِ هانواد  ءِ سرا  مُسلمان  بِیڑ کارَنت  ءُ  آئی ءِ  هانواد جَنگ ءُ تَباه کنگ بیت تاں آ بے ھوش ءُ سار چہ میتگ ءَ در کپ ایت ءُ  تَچان بیت  کہ لوگ ءِ کُچک آئی ءِ پُشت ءَ گون بیت  گُڑا آ کُچک ءَ را بیرو دیان ءَ گوشیت :

 " تو کہاں جائے گی کتیا - تو کتیا ہے  تو انسان تهوڑی ہے کہ تُجهے اپنی جان کا ڈر ہو - یہ سب تہذیب کی باتیں ہیں - اُونچے مذہب اور اخلاق کے جهگڑے ہیں - یہ تلوار تو بہت بُلند اُصولوں کی حمایت میں نکلی ہے - شُکر کر تو غیرمہذب ہے ، جاہل اور بے اخلاق ہے  تُجهے یہ معلوم نہیں مذہب کیا ہے، تو نے کبهی پانچ وقت نماز نہیں پڑهی، کبهی کسی گرجے، مندر ، مسجد نہیں گئ ............. " 

اِے دانک انسانی زند ءِ سرا بلائیں تژن اَنت،  ہمے انسان وتارا اشرف المخلوقات سرپد بیت، چہ توامیں مخلوق ءَ گھتر ءُ وت ءَ اَگل ءُ سماه ءِ هُدابُند زانت،  تہذیب ءُ اخلاق ءِ دعویدارے ، وتی مذہب ءِ سر ءَ پَھر بندیت بلے چہ کُچک ءَ ھم بدتر ءُ گنده تریں شکلے ءَ زندگ اِنت۔

آئی ‎ءِ نبشتھی زبان ءُ بیان ءِ طرز باز زیبا اِنت -

ماں ناول ءَ چہ کارست ءِ زُبان ءَ آئی ءِ اندری جؤزگ  ءُ  مارگانی وشّیں  دابے  ءَ  دَرَنگازی  کنگ بیت،  گوں پُرزیب ایں رنگے ءَ  کمائگ بیتگیں  ھمُک تران ءُ هر دانک دل ءَ لَگّ اَنت - - - - - 

کرشن چندر ءِ ساچشتانی هاسیتاں یکّے ندارگ کشّی اِنت، آئی ساچشتکاری ءِ اندر ءَ امیجری ءِ پُرکشش ایں گوناپ جُوانی ءَ مارگ بَنت، 

ماں اِے ناول ءَ ھم کرشن چندر وتی نبشتہ ءِ وشتریں صفت ندارگ کشی ءُ گوناپ سازی ءِ جَلَشکاں گوں باکمال ءُ براه داریں رنگے ءَ سَھرا کنت ءُ پیشداریت -