نودربراں ناچ کتگ وَ شر انت بلے جنک ءُ ناچ

نودربراں ناچ کتگ شر انت بلے جنک ءُ ناچ

    جاوید بلوچ                        

سوشل میڈیا ءَ لسبیلہ شھدربرجاہ ءِ یک کسانیں تامرے وائرل انت کہ تامر ءِ تہا لھتیں نودربر بلوچی چاپ کنگ ءَ انت۔ اگاں کسے ءَ اے ویڈیو نہ چار اتگ ءُ تو آئی ءِ کرا انچش بہ گُش ئے کہ پِلاں شھدربرجاہ ءَ نودربراں یک مراگشے ءَ بلوچی چاپ ءُ ناچ کُتگ۔ بہ گندئے کس اے گپ ءَ کِمار مہ کنت بلے اگاں تو ویڈیو ءَ پیش بہ دارئے کہ آئی ءِ تہا بلوچ جنکیں نودربر چاپ کنگ ءَ انت گڑا ادا بُنگپ چِست بیت بلوچ دود ءُ ربیدگ، بلوچی لج ءُ گیرت ءُ بلوچ ءِ پونز ءِ بُرزی ءُ جھلی ءِ۔۔۔

اے تامُر ءَ کس پدا نودربر ءُ چاپ ءِ چمّاں نہ چاریت بلکیں اگاں چارگ بیت گڑا گیرت ءِ چمّاں۔ پدا ھما گیرت کہ یک نیمگی گیرتے۔ بزاں اگاں ناچ ھراب بوت انت گڑا وَ باھد پہ ھرکس ءَ ھراب بہ بیت۔اگاں گیرت ءُ ننگ ءِ گپ بیت ھم باھد یک بروبری ءُ یک ھساب ءَ بلوچ ءِ جنک ءُ بچک ءِ سرءَ بھر بہ بیت۔ بلے اناں تو گیشتر بلوچ ءِ گیرت پھازوکانی کمنٹساں بہ چار گڑا آیانی اعتراز ایوک ھمیش انت کہ اے چاریں جنکاں بلوچ ءِ گیرت پادمال کُت ءُ پونز بُر اِت۔ آ سدیں بچک اگاں ناچ کن انت گڑا بلوچ کلچر ءُ ربیدگ انت۔

اے تامُر ءَ بلوچ ءِ یک ھما طبقہ یے کہ وت ءَ رژناہ پگر ءُ لبرل گُشیت آ اشییءَ را انچو شنگ کنگ ءُ پیشداگ ءَ انت گُش ئے زاناں چار جنکیں نودربرانی ناچ ءَ گوں آیانی یک دیریگیں وابے سرجم بوھگ ءَ انت۔ اے طبقہ ءِ واب ھم گوں جنک ءِ ناچ ءُ گُشان ءُ گُد ءُ پُچاں بندوک انت۔ بلوچ ءِ بزگی ءُ پادمالی ۔ بلوچ ءِ سر ءَ بووکیں ریاستی جبر اشانی جیڑہ نہ انت چیاکہ اے جبر بلوچ ءِ سر ءَ سرجم ءَ ابید جنین ءُ مردین ءِ تپاوت ءَ بوھگ ءَ انت۔

دومی ھما گیرت ءِ ٹیکھداراں کہ اشاں بلوچ ءِ جنک ءِ وتی بیگواھیں براتاں پہ زُرتگیں اکسانی سر ءَ ھم زی اعتراز بوتگ ءُ مرچی گِلہ کن انت کہ بلوچ سیاسی پڑ ءَ پُشت ءَ اِنت پرچا۔ اے گیرت ءِ ٹیکھدار ھما انت اشاں اے وَ توریت کہ بلوچی فلم انڈسٹری پدمنتگی ءِ آماچ انت بلے ھمیشاں بلوچی ءِ اولی فلم ھمل ءُ ماھو ءِ سر ءَ اعتراز اَت کہ اشیی ءِ تہ ءَ جنک پرچا گون انت۔ اے ھمے ٹیکھدار انت کہ اشاں ھمک دو مارچ ءَ وت ءَ بلائیں شلوار ءُ یک پاگے ءِ بندگ ءَ گوں وتی کلچر ءِ ایوک یک روچے ءَ زندگ کنگ ءِ سر ءَ لج نہ کنت بلے ھما بلوچ جنک کہ ھزاراں سال ءَ بگر روچ ءِ مرچی بیست ءُ چار کلاک وتی ربیدگ ءِ توک ءَ انت ، ھمے جنکانی ناچ کنگ ءِ سر ءَ اشانی گیرت ٹکُر ٹُکر بیت ءُ چو برپ ءَ آپ بیت۔

مئے ھمے گیرت مندیں ٹیکھداراں ناچ ءُ بچکانی ناچ ءِ سر ءَ اعتراز نیست۔ ھمیشاں کُردانی زالبولیں سرمچار جنگ ءِ پِڑ ءَ بگر داں ناچ ءَ دوست بنت بلے اے چاریں جنکوھانی ناچ کنگ ءَ چہ اشانی گیرت ءِ چٹنی بوہ کنت۔ پدا ھمے وڑیں کواس ءُ دانشور ھمے جُست ءَ کن انت مارا وش نہ بیت بلوچ ءِ جنک گوں بچکاں ناچ بہ کنت۔ اے مئے چاگرد ءَ پولنگ کن انت۔ شما وتی گھار ءُ جنکاں ناچ پرما اِت۔ 

اسل ءَ گپ چاگرد ءِ نہ اِنت گپ وتی جندئیگ اِنت۔ اے مردماں یک تُرسے لاپ ءَ اِنت کہ باندہ آیانی جنک ءُ گوھار ھم انچش کُت کن انت ءُ پدا اشانی پونز ءُ سر جھل بنت۔ اگاں وھد ءِ ھمرائی ءَ تئی جنک ءُ گوھار ءَ موبائل فون گون انت۔ آئی ءِ کرا انٹرنٹ ھست۔ تو زان ئے آ چی چی چاریت؟ اگاں تو آئی ءَ ستم بہ دارئے تو ٹیکنالوجی ءُ وھد ءِ گاماں چون داشت کن ئے؟ اگاں من وت ناچ کناں ءُ ناچ ءَ وتی واستہ وتی کلچر ءِ بھرے لیک آں گڑا الم منی جنک ھم باندہ ناچ کنت ءُ ھمے وڑ ءَ منی گوھار ھم۔ اگاں من ءَ وت ءَ لج کنت یا من ءَ تُرسیت کہ اے ناچ ھرابیں کارے گڑا باھد منی لیکہ ھمیش بہ بیت کہ اے ھرابی ءَ بچک کنت ھم ھرابیں ءُ جنک کنت ھم ھراب۔ اگاں منی ٹراؤزر پاد ءَ کنگ ءَ کرکٹ لیب کنگ ءَ یا کلچر ءِ نام ءَ ناچ کنگ ءَ منی دود ءُ ننگ نہ روت گڑا پہ جنکانی اے وڑ کنگ ءَ پرچا روت؟ ءُ اگاں واکی روت گڑا من پرچا میاریگ نہ آں؟ باھد درسیں جنک اعتراز بکن انت کہ باندہ چی ھمک بلوچیں بچک ءَ پاگ سر ءَ بہ بیت۔ کسے ھم ٹراؤزر ءُ پینٹ ءُ شرٹ مہ بیت۔ چُش بیت؟ اگاں ناں گڑا کلچر یک برے گیشینگی انت کہ کجام کجام چیز کلچر ءِ بھر انت ءُ کجام اناں۔ ناچ اگاں ھراب انت گڑا لاھور شھدربرجاہ ءَ بلوچیں بچکانی کلچر پروگرام ءَ جماعت اسلامی اُرش کنت ءُ بلوچیں نودربراں جنت گڑا متلب آ شر کن انت۔

اگاں جنک ءِ ازمکاری کنگ ھراب انت گڑا احسان دانش، شاہ نواز شاہ ءُ دگہ ھما بلوچ ازمکار کہ جنینی گُد گور ءَ کن انت ءُ بلوچ جنینانی گیگاناں گِر انت، آ مکن کنگ بہ بنت۔  ھرابی ءُ شری ءِ میان ءِ ھد پہ یکے ءَ گیش ءُ دومی ءَ کم وَ مہ بیت۔ باھد یک ھساب بہ بیت۔ چُش کہ دروگ ءِ بندگ، دُزی، ھراب کاری کنگ، مردم ءِ کُشگ، ھرابیں چیز ءِ چارگ ءُ کنگ پہ مردین ءَ انچو ھراب انت امینچو پہ جنین ءَ۔ نی جیڑہ اگاں اِش انت کہ ناچ ھراب انت گڑا نودربر میاری کنگی انت ۔ ھما کہ لسبیلہ شھدربرجاہ ءَ بہ بنت شر یا پنجاپ ءُ اسلام آباد ءِ بنت شر درس ھراب کنگ ءَ انت۔ چیا ناچ کن انت بلوچ ءِ ننگ ءُ گیرت ءَ پادمال کن انت؟ آیاں باندہ مئے کسانیں برات ءُ بچک گند انت انچش کن انت پدا مئے گیرت لونجان ءُ لیلام بیت اگاں ناں پہ آیاں بزاں پہ بچکاں شر انت ءُ جنکانی باریگ ءَ ایوک گیرت دیم ءَ کیت گڑا کول ءِ عظمیٰ حیا بلوچ ءِ کہ اے وھد ءَ درسیں جنکانی لوگ ءَ تقریباً یک پِتے، کم چہ کم یک براتے ءُ دگہ سیادیں مردین الم ءَ درکیت، مُپت ءَ وتی وھد ءَ زوال مکن اِت ءُ وتی گیرت ءَ وتی گُٹ ءَ بہ بند اِت یا چٹنی بکن اِت ءُ بہ وَر اِت دگرانی مُپت ءُ ھدا برات ءُ پِت بوھگ ءِ بیکاریں کوشش مکن اِت۔