حفیظ بلوچ گار نہ انت۔ رژنائیں پگرے، ایم فل فزکس ءِ نودربرے ءُ استادے بیگواہ انت۔

حفیظ بلوچ گار نہ انت۔ رژنائیں پگرے، ایم فل فزکس ءِ نودربرے ءُ استادے بیگواہ انت۔

جاوید بلوچ

بلوچ بوھگ بہ گندئے وت ارزان نہ انت بلے بلوچ نودربرے بوھگ چد ءُ گنتر، چیاکہ ھردیں تو وت ءَ بلوچ نودربرے کُت گڑا باور کن تئی زمہ واری سک باز بنت۔ تو وتی وانگ ءِ ھرچ، ورگ ءُ نندگ، پدا وانگ ءُ سوبین بوھگ ءَ بگر داں کدّ ءِ وت وتی بلوچ بوھگ ءِ مارشت ءِ زندگ دارگ ءِ ھم زمہ وار بئے۔ ھردیں تو وت ءَ بلوچ نودربرے گُشت گڑا وسر ءَ باریں چون وتی گوستگیں، ھستیں ءُ آؤکیں پدریچ ءِ نمائندگی ءِ بار تئی کوپگ ءَ بیت۔ وھدے تو اے دھر ءَ کہ یک بلوچے ئے ءُ شھدربرجاھے ءَ سر بوتگ ئے ءُ انگت کسی بزاں ھچ ٹیکھدار، سردار یا ھچ گروپ ءُ ٹولی ءِ  کارڈ ترا گور ءَ نہ انت گڑا پہ تو تئی دل ءِ تب ءِ ڈپارٹمنٹ ءَ داخلہ گرگ، ھاسٹل ءَ کمرہ رسگ ءُ پدا ایوک یکے لس بلوچ نودربرے ءِ بستار ءَ وتی وانگ ءِ ھمرائی ءَ درساں گوں بچکندگ ءُ آیانی بلوچ نودربری ءِ شرپ ءَ سِل کنگ ءَ گندگ ءُ اوپار کنگ ۔۔۔۔۔ سک گران بیت۔

چُش نہ انت کہ پہ بلوچ نودربر بوھگ ءَ نام ءُ شاتی نیست بلے پہ آئی ءَ گڑا دو تل ءُ دو پوستی نہ کنگ بے سوبی یے بیت۔ ءُ چم جھلی سوبمندی یے۔ حفیظ بلوچ یک انچیں نودربرے کہ پہ وت آئی ءَ کارڈ گور ءَ کنگ دوست نہ بوت۔ ھو اے ھُب آئی ءِ دل ءَ انگت ھم ھست انت کہ بلوچاں پہ نودربر گل یکے بہ بیت کہ آ بے سردار ءُ ٹیکھدار لس بلوچ نودربر ءِ گل بہ بیت۔ بلے چُش چون بیت۔۔۔۔۔؟

حفیظ ءِ شیرکنیں بچکند، مھر ءُ دل پھکی ءَ ابید آئی ءِ تہ ءَ ھستیں بلوچ نودربر بوھگ ءِ گرانیں زمہ واری ءَ من حفیظ ءَ سلام ءُ دعا ءَ گیش نہ زاناں۔۔۔ بس یکیں وھد ءَ بلوچستان یونیورسٹی ءَ ات انت۔ آئی ءِ سنگت منی کلاس فیلو ات انت ءُ ھمایانی سبب ءَ ما یکے دومی ءَ آشنا ات انت۔ بلے ھمے بلوچ نودربر بوھگ ءِ سیادی ءَ ھور کتگ ات۔ آ ھم امینچو کہ سلام ءُ دعا بس۔ 

بلے انی حفیظ قائداعظم یونیورسٹی ءَ ایم فل ءِ نودربر ات۔ قائداعظم یونیورسٹی اسلام آباد ءَ فزکس ءِ وانگ ءِ بستار ھمیش زانگ بیت کہ بزاں تو ادا ونت ءُ درآتک ئے گڑا پرویز ھود بائی ءُ انگت گیش گڑا ڈاکٹر عبدالسلام بئے۔  پہ لس بلوچ نودربراں ابید سرکاری کوٹہ ءُ چیروکائی رستگیں اسکالرشپے ءَ بلوچستان ءَ ڈن شھدربرجاھے ءَ وانگ ءِ واب وت چہ آکسفورڈ ءُ کیمرج ءَ کمتر نہ انت۔ بلے حفیظ اولی بلوچ بوھگ ءِ شرپ ءَ زیر ایت کہ آ اولی بر ءَ قائداعظم یونیورسٹی ءَ فزکس ءِ تہ ءَ ایم فل ءِ سیٹ ءَ گپت۔ ادا ھما پاکستان ءِ ایلیٹ کلاس سیر ءُ امیریں مردمانی چُکاں گوں مکابلہ کنت کہ آیاں ھمے شھدربرجاہ یا اسلام آباد ءُ پنجاپ ءِ دگہ نامی ایں وانگ جاھاں ونتگ۔ ھمے ایلیٹ ءُ واجہ کارانی دیم ءَ خضدار ءَ چہ دراتکگ ءُ بلوچستان یونیورسٹیءَ ماسٹر کتگیں حفیظ بلوچ انت۔ ھما حفیظ کہ ماسٹر ءِ گُڈسر ءَ وتی پروجکٹ ءِ سرجم کنگ ءِ واستہ لیپ ٹاپے گپت گڑا آئی ءِ موبائل نمبر بند بیت۔ نزیکیں سنگتے جُست کنت کہ حفیظ تئی نمبر بند انت گڑا سھی بیت کہ حفیظ ءَ وتی موبائل بھا کتگ ءُ لیپ ٹاپے زُرتگ۔ خضدار ءَ ھردیں چھٹیاں روت گڑا اکیڈمی ءَ بیگاہ ءَ الم ءَ روت کہ کسانیں زھگ فزکس وانینگی آں۔

قائداعظم یونیورسٹی ءَ وتی ایم فل ءِ ٹیسٹ ءِ روچ ءَ وت ءَ ھمے سھب ءَ سر کنت ءُ نو بج ءَ وتی ٹیسٹ ءَ دنت دانکہ پیسر ءَ روگ ءَ گوں دگہ نودربراں جنجال مہ کن آں۔ خضدار داں شال ایوک چار پنچ گھنٹہ ءِ سپر ءَ بلے حفیظ  شال ءَ زندگی ءَ اولی بر ءَ ھمے وھد ءَ گندیت کہ آئی ءِ ماسٹر ءِ داخلہ بیت۔ آ فزکس ءِ تہ ءَ ھما کار ءَ کنگ لوٹگ ءَ انت کہ آئی ءِ کلاس ءِ آ دگہ درسیں نودربر اے فیلڈ ءَ گران لیک انت ءُ کس اشیی ءِ نام ءَ نہ گپت۔ نی وتی ڈگری ءِ گُڈسر ءَ انت۔ وتی ایم فل ءَ پد ھم اگاں زرّ وڑ بیت آ انگت وانیت ءُ وانین ایت۔ آ پمشکہ خضدار ءَ اتک کہ پدا بئے ات ءُ داں وتی تھیسز ءِ پروجکٹ ءَ جم کنگ ءَ تک مہ روت۔ بلے ھمے چندیں روچ ءِ چھٹی ءَ ھم آ اتک گڑا بیگاہ ءَ اکیڈمی ءَ وانینگ ءَ ات کہ بیگواہ کنگ بوت۔۔۔۔ حفیظ یک بلوچ نودربرے ءُ اے بار وت گران انت کہ آئی ءَ وتی کوپگاں کتگ ات آئی ءَ بیگواہ کنگ ءُ گیشتر بار ءُ سر کنگ زاناں المی انت؟ حفیظ ءِ یک گونڈُکیں نودربرے مرچی آئی ءَ چارٹے دست انت جُست انت منی استاد کج انت؟