منی نام داداللہ۔۔۔۔ من زار نہ کُتگ

منی نام داداللہ ۔۔۔ من زار نہ کُتگ

رگام بلوچ      

   

منی نام داداللہ اِنت۔۔۔۔۔ من دیر اِنت کہ لوگ ندیستگ۔۔۔۔۔ مردم ندیستگ اَنت۔۔۔۔۔ مردُم جیڑاں من زار کُتگ۔۔۔۔۔ واجہ ھم انچوش جیڑ ایت ۔

بلئے من شُمارا ھال دیئگ لوٹاں کہ اے راستے کہ من چہ لوگ ءَ درتکگاں ۔۔۔۔ جنگ ءُ داوا کتگ ءُ انگت کناں ۔۔۔۔۔۔ بلئے من زار نیاں ۔۔۔۔۔! 

واجہ ءَ تیوگیں میتگ ءَ همے هال شِنگ کُتگ کہ داداللہ زار اِنت ۔۔۔۔ نپر ءُ کاسِد کُتگ، تُپنگ ءُ تیر کتگ کہ " داداللہ ھرچ جاگہ ءَ دیست دزگیر ئے کن اِت بلے اگاں دست ئے ندات گُڑا تیراں آس دے اِت۔"

واجہ درامدے مئے لوگ ئے گِپتگ ۔۔۔۔۔ پیرُک ءِ زمانگ ءَ ۔۔۔۔۔ پیرُک ءَ وهدے ماِرت کہ واجہ آھی ءَ جِند ءِ لوگ ءَ چو مولد آنی وڑا کار بندگ ءَ اِنت، هرچیز ءِ مستری یے زُرتگ همے سوَب ءَ پیرُک زار کنت ۔۔۔۔۔ دو سئے سال ءَ رند پدا وشّان بیت ءُ واتر کنت ۔ نو واجہ ھمے سرپد بیت کہ داداللہ (بزانکہ من) ھم چو پیرُک ءَ دو سئے سال ءَ رند واتر کایاں۔۔۔۔ بلئے وھدے مرچی من ءَ پانزده سال سرجم اِنت کہ من واتر نہ کُتگ آ نو. زانت کہ من پیرُک ءَ چہ نہ کشّ اِتگ۔

پمیشکہ واجہ وتی نپراں گُشیت " اول ءِ سرا دزگیر ئے کن اِت ۔۔۔۔۔ بلئے اگاں اینگو آنگُرے کُت ۔۔۔۔ تیراں گوں ٹُنگ ٹُنگ ئے کن اِت " ۔

واجہ زانت داداللہ گھگیری کنت ۔۔۔۔۔ آھی ءِ نپراں باز رند ءَ من ءَ دیستگ بلے جت ئے نہ کُتگ ۔۔۔۔۔ مرچاں واجہ وت چہ وتی نپراں دلپروش اِنت ۔۔۔۔ بلئے من اِنّاں ۔

منی برات ءُ گهاراں هم باز براں گُشتگ " داداللہ ھُدا ءِ نام ءَ بس اِنت نو ۔۔۔۔ بیا لوگ ءَ ۔۔۔۔۔ تو وت ءَ واجہ ءِ دیم ءَ منّارینتگ ۔۔۔۔ تو بیا واجہ ءِ کِرّا ۔۔۔۔ واجہ ترا شرّیں اُگده یے دنت ۔۔۔۔۔ گاڑی ءُ ماڑی دنت ۔۔۔۔ بس یکبرے بیا۔"

بلئے من درُستانی گپ رَد کُتگ اَنت ۔۔۔۔۔ من ءَ کس ءَ منّارینت نہ کُتگ ۔۔۔۔۔ اسلا کسّ ءَ چُشیں راستیں دلیل یے هم نہ داتگ کہ من پہ واتر کنگ ءَ رازی بہ باں ۔۔۔۔۔ پانزدہ سال کئے زار بوت کنت؟ من بھ زار نہ بوتگ اَنت ۔۔۔۔ لوگ ءِ جِند کہ منیگ اِنت واجہ کئے اِنت کہ من ءَ بہ گُشیت کہ من زاراں؟ آھی ءَ وَ گپ ءِ جِند پِِر نہ بیت ۔ برات ءُ گُهارانی هم هوش شُتگ ۔۔۔۔ واجہ ءِ شکر ءُ ناناں آیانی هوش بُرتگ ۔۔۔۔۔ آیانی زھنی سِنچ هتم اَنت ۔۔۔۔۔ اسلا آیاں تُرس ایت، گُلام ءِ چُک واجہ ءِ هِلاپ ءَ بوشت ایت پدا پُرّں پانزده سال بوشت ایت واجہ ءِ گوما اے چیز برداشت نہ بیت ناں۔

منی گپ تچک اِنت ۔۔۔۔ تو واجہ ءَ اے گپ ءَ سر کن کہ " داداللہ واتر نہ کنت ۔۔۔۔۔ ھمدا مرایت، ھمدا کل بیت بلئے واجہ ءِ کِرّا واتر نہ کنت " واجہ ءَ بہ گُش " اگاں ترا سماہ بیت کہ داداللہ نو پیر اِنت، کُلّگ ءُ پشّانک ءُ دگہ نادراھی یے وت کُشیت ئے ءُ اے سر درد هتم بیت گُڑا تو رَد ئے ۔۔۔۔۔۔ داداللہ تھنا نہ اِنت ۔۔۔۔۔ من مِراں هم دگہ ھزار داداللہ ھست ۔۔۔۔۔ آیانی بس رنگ ءُ نام مٹ بنت ۔۔۔۔۔ بلئے پہ تو کینگ ءُ کِست گیشتِر بنت ۔۔۔۔۔ آیانی لوگ ءِ درکپگ ءِ سوَب هم همیش بیت کہ منی اِنت ۔۔۔۔۔ آ دو ھمینچو مھکم بنت ۔