بلوچی زبان ءِ وش لسانیں شاعر، عطا شاد

 بلوچی زبان ءِ وش لسانیں شاعر "عطا شاد"

عبدالحلیم حیاتان

عطا شاد ءِ سیادی چہ مکران ءِ علمی ءُ زانشتی دمگ کیچ ءَ اِنت۔ عطاشاد ءِ اَسل نام محمد اسحاق بُوتگ بلے آئی ءَ وتی قلمی نام عطاشاد ایر کُتگ۔ محمد اسحاق کہ آئی ءِ ندنام  عطاشاد اِنت  1 نومبر 1939 ءَ کیچ ءِ دمگ سنگانی سر ءَ ودی بوتگ۔ 

عطاشاد ءِ ازم سک پراہ ءُ شاھگان اِنت۔ عطاشاد یک شاعر ، پَٹ ءُ پولکار، شرگِدار ءُ کسمانک نویسے اَت۔ بندات ءَ عطاشاد ءَ اردو ءَ لچہ نبشتہ کُتگ ءُ پدا بلوچی شاعری ئے بندات کُت بلے اردو شاعری ئے یلہ نہ دات۔ عطاشاد ءِ بلوچی شاعری وتی مٹ وَت اِنت۔ عطاشاد ءِ شاعری کثیر الخیال پگر ءِ بُندر زانگ بیت۔

عطاشاد گوں وتی کماتگیں شعراں سیاسی، چاگردی ، سماجی ءُ مھر ءُ مھبت ءِ درشان کنوکیں شاعریے زانگ بیت۔ 

عطاشاد ءَ وتی شاعری ءِ تھا بلوچی زبان ءِ ھما زگریں لبز کہ شائری ءِ تہا سک کم کارگِرگ بوتگ انَت پہ جوانی ءَ کارمرز کُتگ اَنت۔ عطاشاد شاد ءِ شاعری ءِ جتا ءُ جوانیں دروشم ءِ برکت ءَ بلوچی شائری دیما کنز اِتگ۔ عطاشاد ءِ شاعری بلوچی زبان ءُ ادب ءِ یک بے بہائیں مڈی یے کہ اشی ءِ تھا مزاحمتی پگر ءَ چہ بگر داں سیاسی ءُ چاگردی ھیال ءُ لیکھہ ءِ جزبگ گندگ ءَ کئیت۔

عطاشاد ءَ بلوچی شاعری ءَ چہ ابید اردو زبان ءَ ہم بازیں لچہ ءُ دستونک نبشتہ کُتگ کہ آھاں روچ ءِ مروچی قومی سطح ءَ ساڈاھگ بیت۔ عطاشاد ءَ 13 فروری 1997 ءَ اے کوڈئیں دگنیا یلہ دات ءُ وتی مدامی ئیں ھنکین ءَ شُت۔

عطاشاد ءَ وتی سرجمیں زِند پہ بلوچی زبان ءِ دیمرئی واست ءَ گوازینتگ ءُ اے پڑ ءَ باز جوانیں کار پد ایر کُتگ کہ اے پہ بلوچی زبان ءِ دیمروئی ءَ مزنیں ارزشت ءِ دار اَنت۔ تنیگہ عطاشاد ءِ بلوچی زبان ءِ دو وانگی چاپ بیتگ کہ اشانی تھا یک ئے "روچ گِر" ءُ دومی "شپ سہار اندیم" اِنت۔ چہ اشاں ابید بلوچی زبان ءَ عطاشاد ءِ شاعری ءِ کلیات "گلزمین" ہم ٹہینگ بوتگ ءُ چاپ بوتگ۔ 

عطاشاد شاد ءِ اردو شاعری ءِ دو وانگی ہم دیما اَتکگ اَنت۔ یکے برفاگ ءُ دومی سنگ آب اِنت۔ عطاشاد ءِ اردو شاعری ءِ کلیات "اور نیم ورق الٹے گی" ہم چاپ کنگ بیتگ۔ عطاشاد ءَ بے مٹیں ادبی کارانی ھزمت ءَ 1983 ءَ حسنِ کارکردگی ءِ ایوارڈ ہم دیگ بوتگ۔

ہتم پہ کیفے زریت مسکاں، پہ مہلبی درفش داتہ ءَ بام ءَ دل ءَ نہ منّ ات

جہانے ءَ دات سکین "پادا برو گہیں واجہ ءِ سلام ءَ" دل ءَ نہ منّ ات

پہ من ہما ستہگیں ڈگار انت پہ من ہما مرتگیں کشار انت من چو بہ مناں

کہ نود سشنزنت کہ ہور گوار انت کہ درین ساریت ہر رگام ءَ دل ءَ نہ منّ ات

عطا اے موسم ہتم نہ چلگ بہارگاہے ءِ تہار ماہ انت پہ رژن ءِ واجہ 

بلے اے آشوب ءِ آس ءُ آپ ءَ ترا توار انت عطا پہ نام ءَ دل ءَ نہ منّ ات