یوسف بلوچ: گنگزار ءُ سیندک

گنگزار ءُ سیندک

نبشتہ کار: یوسف بلوچ

ٹیتھیان ءِ اراضیاتی پٹی ءَ ھوار، دنیا ءِ تھا سُھر،گیس ءُ آسِن ءِ وڈیں گران کیمتی ایں معدنیات ءُ گراں نھادی ایں چیزانی ھوالہ ءَ زانگ بیتگ ایں بلوچستان ءِ چاغی بلوچستان ءِ سیندک انت۔

اِد ءَ سیندک میٹلز لمیٹڈ (سی ایم ایل) نامیں ءُ وفاقی ھکومت ءِ کمپنی یے ءُ میٹالرجیکل کارپوریشن آف چاہنا (ایم سی سی) ءِ میان ءَ معاہدہ یے است انت۔ اے کمپنی ءَ بیست سالیں کہ سیندک ءَ سُھر ، نُگرہ ءُ آسِن کشگ ءَ اِنت۔

پنچ سال ءِ معاہدہ ءِ مدت ھمے سال ءِ اکتوبر ءَ ھلاس بوھگ ءَ اِنت۔ ھمے وڈ ءَ پاکستان ءَ گوں ھمے کمپنی ءَ داں 2037 ءَ دگہ نوکیں معاہدہ ءِ کُتگ۔

سیندک ءِ سئے کان انت۔آھاں برزی، زرباری ءُ گوریچانی کان یا ایسٹ باڈی ءِ نام ءَ نشان کتگ انت۔گوستگیں بیست سال ءَ چینی کمپنی ءَ گوریچانی ءُ زِرباری کاناں چہ مڈّی کش اِتگ ۔اے کاناں نوں مڈی باز کم پش کپتگ ءُ نی برزی کان ءِ باریک آیگ ءَ اِنت۔

ھیرانی ءِ گپ ایش اِنت کہ 2010 ءَ پاکستان ءِ قانود گِس ءَ پاس بوتگ ایں ھژدھمی ترمیم ءَ ھمے گپ ایر کنگ بوتگ کہ صوبہ وتی مال ءُ مڈّی ھانی پیسلہ ءَ وت بہ کن انت ءُ صوباہانی مال ءُ مڈی ھماہانی جندئیگ انت بلے ھژدھمی ترمیم ءَ دہ سال گوازگ ءَ پد اوں سیندک ءِ معاہدہ وفاق ءَ وتی چیردستی ءَ کُتگ۔

چینی کمپنی گشیت کہ سیندک ءَ ھمے برزی کان یا ایسٹ باڈی ءَ تنی وھد ءَ 273 ملین ٹن سھر است۔ ھمے   سُھرانی بدل ءَ کمپنی بلوچستان ءَ سیلز ریونیو کہ پیسر ءَ پنچ درسد بوتگ نوں شش ٹِک پنچ درسد کنگ بوتگ ءُ کارپوریٹ سوشل ریسپانسبلیٹی (سی ایس آر) ھم شش ٹِک پنچ درسد کنگ بوتگ۔ ایشاں چہ ابید چاغی ءِ وانوکانی واستہ سالے یک کروڈ کلدار ھم ایر کنگ بوتگ۔

گوستگیں بیست سالاں کارکنوکیں چینی کمپنی ءَ بلوچستان ءَ را سیلز ریونیو ءُ (سی ایس آر) ءِ مد ءَ پنچ درسد داتگ۔ھمے پنچیں درسد آں چِہ چاغی ءَ مرچی ھم بچک/جنک ءِ یک ڈگری کالجے ھم نیست۔ میڈیکل کالج ءُ شھدربرجاہ ءِ وڈیں وانگجاہ ءِ نام اوں نیست۔

پدا ھیال بہ کن ات کہ چاغی ءِ سیندک ءَ چہ بلوچستان ءَ چی نپ رس اتگ؟

بس ھمے کہ گوستگیں بیست سال ءَ سیندک ءِ مردماں کھربوں کلدار کرپشن ءِ چمّاں گار بوھگ ءَ دیستگ انت ءُ پدا ھمے کرپٹ ایں مردم وتی وزیر بوھگ ءَ دیستگ انت ءُ پدا مھرومی، بے اوستی ءُ گریبی دیستگ۔

اے سلسلہ ءَ دو دھک انت کہ روگ ءَ اِنت۔دو دھک ءَ نہ ھژدھمی ترمیم ءَ بلوچستان ءِ جیڑہ ھل کتگ انت ءُ نہ سیندک ءِ۔

چہ سالاں سیندک ءِ نشتگیں مردم گنگزار انت۔گنگزار ءَ اے چِست ءُ ھیر باز دیستگ انت۔ گنگزار ءِ ھیالاں اے تھنا مئے مال ءُ مڈی آنی پُلگ ءُ ورگ اِنت کہ اِد ءَ نشتگیں مردمانی ھکّاں کس گوں سنجیدگی ءَ نہ زور ایت۔گنگزار ءِ پھم ھمیش اِنت کہ اِد ءَ مفادات نامیں لبزے وجود داریت گڑاں آئی ءِ دیم نبشتہ بیت زات ءُ ایشی ءَ اگاں جوڈ کن ئے گُڑاں اڑ بیت ذاتی مفاد۔

وھد ءَ تھنا گنگزار پریشان نہ کتگ بلکیں باز سوج اش ھم داتگ۔ گنگزار مرچی سیاستدان ءُ رہبر، مفاد ءُ زاتی مفاد ءِ فرق ءَ جوانیں وڈے ءَ گوں پوہ بیت۔

گنگزار ءِ ھیالاں اے معاہدہ ءَ بلوچستان ءِ درسد گیش کنگ ءَ چہ بلوچستان، چاغی ءُ سیندک ءِ عام، زرّی ءُ چاگردی زندگی ءَ چُشیں فرق نئیت۔ فیصد ھماہانی واستہ انت کہ ھماہانی کِرّا سیندک ءِ مال ءُ مڈیآنی چابی است انت۔ بلے مئے کِرّا سیندک ءِ چابی نیست اِنت بلکیں تھنا سیندک ءِ زمین است اِنت۔