ڈاکٹر عزیز نمیران انت

ڈاکٹر عزیز نمیران انت

۔۔۔۔سلیمان ھاشم۔۔۔۔۔

گُش انت کہ دو روچی امروز ءَ کس پاگ نہ بندیت ءُ دائمی نہ نند ایت۔ ھرکس ءَ روچے نہ روچے چہ ادا لڈگ ءُ روگی انت۔ بلے لھتیں انچیں کارست بنت کہ آ اے دگنیا ءِ تلو ءِ سر ءَ یک رندے کاینت ءُ رو انت بلے وت ءَ پہ دائمی ابدمان کن انت۔ انچش ھمے کارستانی تہ ءَ یکے واجہ ڈاکٹر عزیز بلوچ انت۔

ڈاکٹر عزیز یک سیاسی رھشونے، یک پوریاگر دوستیں چاگردی سروکے، یک زندگ ءُ مھروانیں انسان دوستیں مردمے بیتگ۔ ڈاکٹری ءُ انسانی جان سلامتی ءِ تک وَ آئی ءِ شعبہ بوتگ بلے آ ھر تک ءَ یک ڈول ءَ دلپھک ءُ زمہ وار اَت۔

وھد گوزان بنت باز مردم چہ اے کوڈائیں دگنیا ءَ لڈ انت ءُ رو انت مھلوک لھتیں روچ آیاں یات کن انت بلے پدا بے ھیال اش کن انت۔ 

بلے لھتیں انچیں مردم ھم بیتگ انت کہ کرن گوستگ انت آ انگت نمیران انت۔ ھمایانی سرپ ءَ ما ڈاکٹر عزیزءَ ھم ھوار کن انت چیاکہ آ نہ ایوک ءَ ڈاکٹرے بیتگ بلکیں آئی ءِ پکر ءُ مارشت سک باز دیم ءَ بوتگ۔

آئی ءَ مدام بلوچ ءُ بلوچستان ءِ سر ڈگار ءِ گپ کتگ۔ آ یک سرکاری ڈاکٹرے بوتگ بلے اے کمال ءُ بود ءِ واجہ  بوتگ کہ آئی ءَ بلوچ راج ءِ درد، بزگی ءُ لگتمالی مدام مار اِتگ۔

آئی ءَ مدام وتی لگتمالیں مھلوک ءِ ھیال گون ات۔ ڈاکٹر ءَ نہ ایوک ءَ قوم پرستی سیاست کتگ بلکیں گریب دوستی ءُ پروگریسو سیاست ودی کتگ ات۔ آ ھما پارٹی ءَ بیتگ ات کہ ائی ءَ بے ریا ءُ روہ  ھک ءِ گپ جتگ ات۔ آ پشکان ءِ جھمنند بوتگ کہ آئی ءَ وتی ھمت ءُ محنت ءَ پہ اود ءِ نودبرانی ھاتر ءَ یک لائبریری یے جوڑ کت۔  گوادر ءَ ھزارانی کساس ءَ آئی ءَ ہسپتال ءَ  ءُ وتی کلینک ءَ بازیں بیمار ءُ نادرائیں مردمانی اِلاج بے مز ءَ کتگ ات۔ مروچی ھما مردم ائی ءَ یات کنگ ءَ انت ءُ گشگ ءَ انت کہ ڈاکٹر اے دگنیا ءَ شُتگ ءُ ما چورہ انت۔

گوادر ءُ پشکان ءِ نیام ءِ  ھورے ھست کہ مدام راہ ءِ گٹ کتگ بوتگ۔ ادا راہ کنگ ءُ گوزگ ءَ پہ آسراتی دیگ ءَ ڈاکٹر ءَ گوں وتی دستاں  کوہ ءُ سنگ دور دات ءُ دگہ مھلوک ءَ ھم آئی ءِ پد ءُ رند گپتگ ات انت ءُ چُش اے آسراتی یے بیت۔ گوادر ءِ ءُ پشکانءِ اسکولاں سائنس ءِ کلاس ءِ شروع کنوکانی اولی مردم ڈاکٹر بیتگ۔

واجہ ءَ گوادر ءِ درائیں ازمکار یکجاہ کتگ انت ءُ ائید میلہ ءَ گوادرءِ ورناہ ءُ مھلوک ءِ شاتکامی ءِ ساھتاں وشیں مراگشے داتگ۔

مید اتحاد ءِ سنگتاں گوں یک جاہ ات ءُ مدام آیانی ھمبراہ داری ءَ گون ات گوں۔ دریائی ساھدارانی رکھینگ ءِ جہد ءَ مدام گلائیش ات۔ 

جیوز ءِ جوڑ کنگ ءَ ڈاکٹر عزیز ءِ بلائیں دستے ھوار بیتگ۔

ڈاکٹر یک سوچ ءُ یک پگرے ءِ نام انت۔ اگر چہ مردگ پرستی یک ٹرینڈے جوڑ بیتگ بلے آ واجہ وتی زند ءَ ابد مان ات ءُ انگت ھم ابد مان انت۔