ڈاکٹر عزیز ءَ گُشتگ: پلاٹ ءِ سیاست مارا رُزوا کنت

"پلاٹ ءِ سیاست مارا رُزوا کنت"

جاوید بلوچ

بیست ءُ ھپت مارچ ءَ جیوز ءِ چیر دستی ءَ گوادر پریس کلب ءَ ڈاکٹر عزیز بلوچ ءِ یات ءَ مراگشے جم دارگ بوت۔ بینر ءِ سر ءَ نبشتہ اَت رژناہ پگر ءُ دیمرئی پسندیں راجی جھد کار۔ دیوان ءَ ھرکس ءَ کہ گپ جت درستاں واجہ ءِ کرد، راجکاری ءُ جھدانی توسیپ کُت۔ اے دیوان گوادر پریس کلب ءِ ھال ءَ جم دارگ بوتگ ات۔ ھال ءِ تہ ءَ کساس کم ءُ گیش سد کُرسی پہ نندگ ءَ است کہ اشانی تہ ءَ نیم ھالیگ ات۔ چوناہ ءَ دل ءَ ھیال اتک کہ اے ھمے ڈاکٹر عزیز ءِ یات ءَ مراگش اڑ دیگ بوتگ کہ آ آئی ءِ سیادی گوں ھمے پارٹی ءَ انت کہ اے شھر ءِ صوبائی اسمبلی ءِ دو دھر انت کہ ٹپ مں ٹپ سوبین بوھگ ءِ شرپ آئی ءَ گون انت؟

ھمے پارٹی کہ آئی ءَ یک نودربر گلے است کہ آ بلوچ ءِ نام ءَ گپت ءُ بلوچ ءِ مڈی ءُ کارستانی نماھندگ بوھگ ءِ جار ءَ جنت؟ ھمے پارٹی کہ قوم پرستی ءِ ژانگے پاد ءَ بستگ ءُ دریاوردانی ڈُبہ آئی ءِ کوپگ ءَ انت ءُ راج ءِ لگتمالی ءُ غیر سیاسی جاورانی دیمپانی ءِ گماں مدام سُچگ ءَ انت۔ ھمے پارٹی کہ آئی ءِ بیرک ءِ سائگ ءَ ڈاکٹر زمین ءِ میار کنگ بوت؟ پدا ھیال اتک جی ھو ھمے پارٹی۔ بلے پارٹی ءَ وَ وتی ھک ھما روچ ءَ ادا کُت کہ بیرک ءِ چیر ءَ ڈاکٹر کل کُت ءُ فوٹو سیشن کُت ءُ اخباری بیان دات۔ بلکیں سے فاتحہ ءِ ھرچ ءُ درچ ھم کشت انت۔ ورگ ءُ چرگ ھم کت۔ دگہ پارٹی چی بکنت؟ 

اے وڑیں جُستانی پسو ھم ھمے مراگش ءِ تہ ءَ پدر بوت انت کہ ڈاکٹر عزیز نگبھتیں مردے بوتگ۔ گُش انت کہ ھما دھر ءَ کہ اولی بر ءَ نوکی گوادر ءَ پلاٹ بھر ءُ تھر کنگ ءِ سیاست بندات بوتگ گڑا ڈاکٹر پلاٹ ءِ سیاست ءِ بگیری ءَ اوشتاتگ۔ اے ھما دھر بوتگ کہ ڈاکٹر ءِ پارٹی ءِ نیم ءَ اے وھد ءَ ٹکٹ رستگیں ءُ نماھندگیں مردم آ وھد ءَ مشرف ءِ مردم بوتگ انت۔ شھر ءِ سیاست ءِ تہ ءَ پہ پلاٹ ءَ پشک دروکائی بوتگ۔ زِر ءَ گُجھو تاراج کنگ ءَ بوتگ انت بلے دریاورد ءُ آیانی سروک ایکڑ ءِ ھساب ءُ کتاب ءَ گر ءُ چیل بوتگ انت۔ چی نیشنل پارٹی ءُ چی بی این پی، چی مینگل ءُ چی عوامی، چی مُلا ءُ چی قوم پرست۔۔۔ درست مشرف ءِ داتگیں دادانی ءُ پلاٹ سیاست کلچر ءِ تہ ءَ وتی وتی بھر ءِ لوٹوک بوتگ انت بلے ڈاکٹر ءَ مخالفت کتگ۔ 

بقول ءِ یک واجے ءِ گپانی ڈاکٹر ءَ ھما روچاں گُشتگ کہ اے پلاٹ ءِ سیاست مارا انچو رُزوا کنت کہ پدا ما سیاست کُت نہ کن انت۔ ما درستیں سیاسی گل ھور بہ بئیں ھم موسی موڑ یا شھدائے جیونی چار راہ ءَ بہ نند انت مردم مئے چمپل جنگ ءَ ھم نیا انت ءُ مرچی شھر ءِ جاور ھمے وڑ انت۔  مرچی لس مردم وَ وتی جاگہ ءَ بلے ھمے بیرک چست کنوک کہ ڈاکٹر ءَ وتی سرجمیں زند ءَ ھمے گل ءَ را یل نہ دات آئی ءِ سد دانگ مردم ھم ڈاکٹر ءِ یاتگیری دیوان ساڑی نہ ات کہ کُرسی یے پش بہ کپت ایں۔ امینچو مردم کہ یک بیٹھکے ءَ جم بیت امینچو ھم ساڑی نہ اَت۔ چیاکہ نظریہ ءِ بام ءَ وَ ھما روچی جورکاں داتگ ات کہ ھما روچی پہ پلاٹے نظریہ کُشگ بوت۔ نی وَ نظریہ امینچو ارزان انت کہ سولرے گندیت ژانگ پاد ءَ کنت ءُ ناچ کنت۔ ڈاکٹر ءِ گرانیں پگر کجا زیرگ بیت؟ بلے اگاں ڈاکٹر اے جاوراں گندگ ءَ انت من زاناں کہ دل ءَ نیاریت چیاکہ آئی ءَ وَ گُشتگ بوتگ کہ پلاٹ ءِ سیاست رُزوا کنت گڑا سولر ءُ ٹیکہ وَ گنتر۔