یاسین مراد: نمدی پہ گلی ءِ نام ءَ

یاسین مراد: نمدی پہ گُلی ءِ نام ءَ   

دُروت ءُ دربات ئے!۔

من وش ءُ جوڑ سلامت آں ءُ اُمید کناں کہ تو ھر جاہ ءَ ئے وش ءُ سلامت ئے.     من اے وھد ءَ ابوبکر ھاسٹل ءِ کوٹی نمبر ھشت ءَ ایوک ءُ تھنا نِشتگاں ءُ تئی بابت ءَ جیڑگ ءَ آں کہ من وتی دل ءِ گپاں مرچی اے نمدی ءِ توک ءَ نبیس آں۔ 

  گُلی! من نہ زاناں تو من ءَ چوں دیست ءَ یا چوں چاراتگ کہ یاسین چون ءُ کجام تب ءِ انسانے. بلے من ترا مرچی وتی دل ءِ گپاں گوشگ لوٹ آں. منی کرا چپ ءُ دروگ ھچ نیست من مرچی ھر گپ کہ نبشتہ کنگاں آں سجیں منی دل ءِ گپاں۔

       منی زندگی ءِ توک ءَ ھچ وڑیں چوشیں جنک نہ بیتگ کہ من آئی ءِ گوما شپ ءُ روچ موبائل سرا پیکج بہ باں یا دگہ چوشیں نند ءُ نیاد بکناں تاکہ من وتی گپاں آئی ءِ کرا بکناں بلے مرچی زندگی ءِ اولی رند انت کہ من یک جنکے ءَ وتی دل ءِ مارشتاں ھال دیگ  ءَ   آں۔  

منی واستہ منی مات ءُ پت ءَ منی گپ سک باز جنک ءِ کرا بُرتگ بلے بے سوبین بوتگ آں لھتیں جھگہ ءَ جنکاں منی زیرگ ءَ مکن کُت ءُ لھتیں جاگھاں آیانی مات ءُ پتاں نو من نہ زاناں کہ اے منی بھت ءُ تالہ ءِ کردار آں یا منی جند ءِ توک ءَ ھرابی یے ھست. خیر اے گپاں من الم سرپد باں کہ من چوشیں شرنگے نیاں ءُ ناکہ منی توک ءَ چوشیں کردے بیت کہ منا وت یک جنک بئیت ءُ بگوشیت کہ تو منا سک دوست بئے۔    

من ھرچی آں من ھمیش آں ناکہ من شرتر باں ءُ ناکہ گنتر۔گُلی من ترا ھال دیگ لوٹ آں کہ من ترا سک باز دوست دار آں بلے من اے گپ ءَ ھچ نہ زاناں کہ تو من ءَ دوست دار ءِ یا ناں بلے من ترا وھدے گنداں گڑا من ءَ انچو سما بیت کہ منی زند ءِ سجیں تماہ آسر اَنت. من مدام گوں رب ءَ دعا کن آں کہ بس گُلی ءَ منی لوگ ءِ بانُک بکن۔

من اے نمدی ءِ جواب ءِ انتزار کناں۔

تو ھر کُنڈ ءُ ھر جاہ ءَ ئے جمبر مُدام تئ سرا  ساھیل ءُ ساچان  بات انت۔ سَکی ءُ سوری مگندات ئے۔ مُدام گل ءُ شات بات ئے۔

تی مھروان

یاسین مراد