ساہ نہ کّش ایت بلوچستان
ماھزمین ۔۔۔۔۔ تئ اوں دل زیم اِنت او؟ ترا اوں توریت او؟ وهدے تو اکسے گِندئے ۔۔۔۔۔ چہ بلوچستان ءَ اتکگیں اکسے ۔۔۔۔۔ زھگی اکسے ۔۔۔۔پیرزالی اکسے ۔۔۔۔۔بے وسی ءُ بیچارگی ءِ اکسے ۔۔۔۔۔ یا وانندئیں بلوچ بچ یے ءِ اکسے ۔
ترا اوں گریوگ کئیت ناں ۔۔۔۔۔ بلئے من زاناں تئ چمّاں چے ارس در نئیت ۔۔۔۔۔ چونیں بے وسی یے کہ مردُم وتی بزّگی ءِ سر ءَ ارسے اوں ریتک نہ کنت ۔
ماھزمین مرچی منی دل گُشگ ءَ اَت تئ ءُ وتی ٹپّاں چُنڑ ۔۔۔۔ من زاناں اے درامدانی شھر انت ۔۔۔۔۔ بلے من ءُ تو وَ همدا انت ناں ۔۔۔۔ بیا یک ءُ دومی ءِ دل ءِ ٹپّاں چُنڑاں ۔۔۔۔ هما ٹپ کہ بلوچستان ءَ چے مارا گون انت ۔
ماھزمین برے برے کہ دل ءُ مجگ پر بنت مردُم جیڑیت، بے کساس جیڑیت ۔۔۔۔۔شپانی شپ جیڑیت ۔۔۔ پدا اکساں چاریت ۔۔۔۔۔ بلوچستان ءَ چے اتکگیں اکس ۔۔۔۔پدا وتسرا وت ھیالے کئیت کہ " ساہ نہ کش ایت بلوچستان "۔
من ءَ هوش اوں نہ کنت کہ کدی بلوچستان ءَ ساه کش اِتگ۔۔۔۔ ترا کنت؟ ماھزمین من وتی سرگ ءَ دیوال ءَ اوں بہ جناں من ءَ انگت ساه کشّوکیں بلوچستان یے بھ یات نئیت ۔۔۔۔ برے بچار بیگوائیں چُکے ءِ شوهاز ءَ اِنت ءُ برے چہ تیراں دِرتگیں بچّ یے ءِ جون ءَ کبر کنگ ءَ اِنت ۔۔۔۔ برے زمین ءَ چہ دست کپوکیں ھڑّانی تہ بیگوائیں بچ ءَ شوهاز ءَ اِنت ءُ برے برے کُشگ بوتگیں بچّانی جوناں گوں دگ ءِ سرا نِشتگ ءُ زهرشانی کنگ ءَ اِنت ۔
ماھزمین۔۔۔۔ پدا ھمے ھتم نہ بوھوکیں اکسانی کتار ۔۔۔۔یکّے ءِ پُشت ءَ یک دمتوسیں اکسے!
ماھزمین من کمّو تئ نزیکتِر ءَ بیا آں؟ تئ زان ءِ سر ءَ بہ وَپساں؟۔۔۔۔۔۔ ماھزمین منی دل زیم اِنت ۔۔۔۔۔ من ترا چوں بہ گُشاں کہ اے اکس من ءَ گین کشّگ ءَ نئیلاں ۔۔۔۔۔ من ترا چوں بہ گُشاں کہ وھدے من اے اکساں گِنداں منی تچوکیں زندگی اوشتیت ۔
ماھزمین انّو منی چمّانی تہ ءَ ندارگ یے جوڑ بوهگ ءَ اِنت ۔۔۔۔۔ منی ھیالانی تہ ءَ بازار یے درا بوهان اِنت ۔۔۔۔ اے بازار ءِ گِس گِس دیم ءَ اکس درتکگ ۔۔۔ یک گِس یے ءِ دیم ءَ کسانیں جنکو یے اوشتاتگ ءُ راه ءَ چارگ ءَ اِنت ۔۔۔۔۔ یک گس یے ءِ دیم ءَ پیرزالے نشتگ دستے سر ءَ اَنت ءُ راه ءَ چارگ ءَ اِنت ۔۔۔۔۔ کمّو دیم ءَ جنینانی مُچی یے ۔۔۔۔ آیانی دیم ءَ جونے ایر اِنت ۔۔۔۔ بلے کس گریوگ ءَ نہ ایں ۔۔۔۔۔ انچو سماہ بیت اشانی چمّاں نو ارس ءِ ریچگ اوں دمبُرتگ ۔۔۔۔۔ یا بوت کنت ادا ارس ءِ ڈُکّالی بہ بیت ۔
ماھزمین ۔۔۔۔۔ دور ءَ چہ دَنزے چِست بوهان اِنت۔۔۔۔۔ لهتے پاد درا بوهان ۔۔۔۔۔ لھتے نودربرانی دست ءَ دگہ اَکس اَنت ۔۔۔۔۔ چارٹ اَنت ۔۔۔۔ آیانی سر ءَ نبِشتگیں گندگ ءَ نیاهگ ءَ اَنت ۔
ماھزمین اے بلوچستان ءِ نِدارگ اَنت ۔۔۔۔۔ ھما بلوچستان کہ آؤدا مات چُک ءِ وانینگ ءِ واست ءَ گُد دوچی کنت ۔۔۔۔۔ ھما بلوچستان کہ آؤدا پت تیوگیں روچ ءَ اے جیڑگ ءَ گوں شپ کنت کہ آؤکیں ماہ ءَ شهر ءَ وانوکیں چُک ءَ دست کرچی دیم دیئگ ءِ واست ءَ کئ کِرّا وام بہ کناں۔
ماھزمین ۔۔۔۔۔ اے ھمے ساہ نہ کشّوکیں بلوچستان اِنت کہ آؤدا زندگی ءِ ڈُکّالی اِنت ۔۔۔۔ اے ھمے بلوچستان ءِ ندارگ اَنت کہ آؤدا شپ ھست بلئے واب نیست، چم ھست بلے ارس نیست، زمین ھست بلے لوگ نیست ۔۔۔۔ اے ھمے بلوچستان اِنت کہ آؤدا مردُم واھشت ءُ ارماناں گوں بیگواه کنگ بنت ۔
بلئے ۔۔۔۔۔ ماھزمین ۔۔۔۔ بلوچستان انگت کوشست ءَ اِنت ۔۔۔۔۔ ساہ کشّگ ءِ کوشست ۔۔۔۔۔ زندگ بوھگ ءِ کوشست ۔۔۔۔ وتی مُھکِم دارگ ءِ کوشست۔
ماھزمین ۔۔۔۔۔۔ تئ چمّاں چے رِتکگیں ارسے ترمپے منی چمّانی تہ ءَ کپت ءُ رِتک ۔۔۔۔۔ اے ڈُکّالی ءَ ترمپے ارس دیئگ ءِ منتواراں ۔
No comments:
Post a Comment