انیلہ یوسف: بلوچ جنین ءُ بے مُزّیں مزدوری

بلوچ جنین ءُ بے مُزّیں مزدوری

انیلا یوسف

سرجمیں دگنیاءَ مزدورانی ماھی پوڑی ءُ زلورتانی بابت ءَ سرجم کنگ ءِ واستہ بازیں ادارہ کار کن انت ءُ کانود جوڑ کن اَنت ءُ گیشیں وھد ءِ کارانی واستہ پوریاگر ءَ گیشیں زر دیگ بِیت بلئے مئے کش ءُ گوراں مئے لوگانی تہ ءَ انچیں پوریاگر است اَنت کہ نہ آوان ءَ کدی مزدور لیکگ بُوتگ ءُ نئیکہ آوانی واستہ کانود ءُ راھبند جوڑ کنگ بُوتگ ءُ نہ آوانی وھد ءُ پاس ٹھینگ بوتگ۔ نہ زر دئیگ بُوتگ زر وَ دوریں گپّے بلئے آوانی ھمے کار ءِ نہ ستاہ کنگ بُوتگ ءُ نہ کدی موجل دئیگ بُوتگ۔

آ اے وڑ اوں گُشگ نہ بوتگ انت کہ آ مزدور یا کٹم ءِ باسک انت ءُ ھچ وڑیں کانودے نیست کہ آوانی ھکّاں بہ رکیّنیت ءُ آسراتی بہ دنت۔ ءُ کار ءِ ساھتاں بہ گیشینت۔ ھما بلوچ زالبول کہ آواں سالاں چہ زالبول ءِ ھکّانی واستہ توار چست کتگ اے سال ءِ زالبولانی میان استمانی روچ ءَ یک نوکیں گامگجیے مان اِش کتگ۔ زرمبشتے جنسی کردانی سر ءَ ماں بلوچ چاگردءَ۔

پنچ سال پیسر پاکستان ءِ نندوکیں توار چست کنوکیں زالبول اے سال ءَ پہ اے پوریاگراں توار چست کنگ ءَ بنت۔اے مزدور ھمک وھدءَ مات،جنک ءُ گھارے ءِ رنگ ءَ کار کنئگءَ اَنت۔ بلوچ چاگرد ءُ بلوچستانءَ زر ءُ مال ءِ جاور لوگانی تہ ءَ نوکر دارگ ءِ اجازت نہ دئینت.

بلوچستان ءِ وڑیں پدمنتگیں جاگہ یے ءَ اے مزدورانی کار گیشتر انت کہ اودا ایشاناں آپ آرگی اِنت ، دار ءِ سر ءَ ورگ جوڑ کنگ ، دلوتانی آپ ءُ کاہ کنگ، دستاں گوں گُد ءُ پچُّانی شودگ ءُ دگے بازیں کار کنگی اَنت۔ وانگجاہ ءَ ھمیشاں چے وتی سرجمیں روچ ءِ بابت ءَ نبشتہ کنگ پرمات گڈءَ وانگ ءَ پد لوگ ءِ درستیں کار نبشتہ اتنت ءُ وانگجاہ ءَ پد لوگ ءِ درستیں کار ھماوانی کوپگ ءَ انت۔ وانگ یل کنگ ءِ مستریں سوب ھمے لوگ ءِ کار اَنت ءُ زھگانی کارانی سر ءَ ادارہ ءُ کانود ھم ھاموش اَنت.

من جنکّانی وانگجاہءَ وانیناں۔ پیشوکان یک میتگے ماں بلوچستانءَ ۔ یک روچے ۔وانگجاہءَ ھمیشاں چے وتی سرجمیں روچ ءِ بابت ءَ نبشتہ کنگ پرمات گڈا وانگ ءَ پد لوگ ءِ درستیں کار نبشتہ اتنت ءُ وانگجاہ ءَ پد لوگ ءِ درستیں کار ھماوانی کوپگ ءَ انت۔ وانگ یل کنگ ءِ مستریں سوب ھمے لوگ ءِ کار اَنت ءُ زھگانی کارانی سر ءَ ادارہ ءُ کانود ھم ھاموش اَنت ءُ مستریں سوب نیزگاری، بزگّی انت ءُ وانگ ءِ ھچ وڑیں آسراتی نہ بوھگ انت پہ جنکّاں ماں بلوچستانءَ.

اے روشت ءَ مئے چاگرد ءِ تہ ءَ انچو روتگ مھکم کتگ اَنت کہ گندگ ءَ زانتکار ءُ زانوگریں مردم سوشل میڈیا ءَ توار چست کن انت بلئے وتی لوگانی تہ ءَ ھمے زلم اِش داشتگ ۔ گس ءِ کاراں عیب ءُ لوگءِ زالبولءَ ایردست لیک انت اگاں مردینے لوگ ءَ کار کنت یا چکّانی ھیال ءَ داریت آئی ءَ ھم تژن ءُ بچکند ءِآماچ کن اَنت. اے جاور تھنا لوگ ءِ تہ ءِ زالبولانی نہ اَنت بلکیں لوگ ءَ چہ در کار کنوکیں زالبول ھم نہ رکّ اتگ انت لوگ ءَ چہ ڈن نوکری ءُ پد ءَ لوگ ءِ کار ھم سر ءَ اَنت.

زالبول ءَ تھنا نازرک گُشگی نہ اِنت بلکیں آئی ءِ جان ءِ نازرکیں بالاد ءُ ڈیل ھم چارگی اِنت۔ آئی ءِ نازرکیں اعضاہاں ھوار آئی ءِ جان انچو نازرک انت کہ اگاں گرانیں کارے بہ کنائین ئِے پہ آئی ءِ جان سلامتی ءَ تاوانبار ءُ زُلم انت۔ ایشی ءِ سان زالبول ءِ سر ءَ چِل سال ءَ پد بازیں نادراھیانی رنگ ءَ دیم ءَ کاینت.

چاگردی رنگ ءَ مارا اے چیز زانگی نہ بلکیں منّگی اِنت کہ لوگ ءِ کارانی ذمہ واری تھنا جنک یا زالبولانی نہ انت بلکیں لوگ ءِ ھمک مردم ءِ واستہ اَنت لوگ ءِ تہ ءَ جنک ءُ بچکاّنی سر ءَ یک وڑ ءَ زمہ واری دئینت مردین ءِ ذمہ واری انت کہ لوگ ءِ کارانی تہ ءَ زالبول ءِ کمک ءَ بہ کنت ءُ ھمے رنگ ءَ یک شرّیں ءُ جوانیں چاگردے ءِ بنیات ایر کنگ بیت.