شیر دل غیب ءِ گِدارُک کوٹی نمبر 52
مھراب ازیز
چوناھا ءَ ھرچ کتاب ءِ وتی جُتائیں تام ءُ لزتے بیت۔ ھرچ کتاب وتی بسات ءَ مردم ءَ زانت ءُ سرپدی دنت۔ بلے لھتیں کتاب انچیں بنت کہ مردم ءِ باتِن ءَ ژامبلین اَنت۔ مردم ءَ جیڑگانی جھلانکیں زِر ءَ مان بُر اَنت۔ پد ءَ دانکہ مردم زندگ اِنت چہ اے زِر ءَ در کپت نہ کنت۔
من چد و پیسر ھجبر کتاب ءِ سر ءَ نبشتہ نہ کُتگ یا وَ کتابے ءِ سر ءَ نبشتہ کنگ منی نز ءَ منی بسات ءَ ڈن اِنت۔ ھو برے برے کتابے کہ ونتگ ءُ دوست بوتگ گُڑا وتی مھروانیں سنگت "سلام نور" ءِ کِر ءَ الم ھما کتاب ءِ توسیپ کُتگ ءُ سلام نور ءَ ھم شاباش اِنت کہ منی پُتاریاں اوپار کنت ءُ دیم ءَ جُنزگ ءِ سکین دنت۔
پدا نوکیں کتاب ءِ ھم شون دنت کہ ،،کپٹن ،، (سلام نور من ءَ کپٹن ءِ نام ءَ توار کنت) اے کتاب ءَ الم بُوان سکیں زیبائیں ءُ وشیں کتابے۔
انوں یک شپے سلام نور ءَ منی سرا شیردل غیب ءِ سے کتابانی تاکدرپ(پی ڈی ایپ) روان دات ءُ من ءَ گُشت ئِے کہ شیردل غیب ءَ الم بُوان گُڑا پدا گپ کن ایں۔
من ءَ اوپار نہ شُت گُڑا ھمے شپ ءَ ساھت یک ءَ من شیردل غیب ءِ یک کتابے ،، گدارُک کوٹی نمبر 52،، ونت۔
چُوش کہ کتاب 68 تاکدیم اِنت ءُ اردو زبان ءَ اِنت۔ من اے کتاب ونت داں شپ ءِ ساھت دو ءُ نیم بوت۔ ءُ ھما دمان ءَ من گوں سلام نور ءَ اے کتاب ءِ توسیپ بِنا کُت کہ یار من ءَ سک بژن اِنت کہ اینچو وھد بیت اے کتاب من چیا نہ ونتگ۔
اے کتاب ءِ وانگ ءَ پَد من ءَ انچو سما بوت کہ من ھمے کتاب ءِ تہ ءَ پَش کپتگ اوں۔ اے کتاب ءَ من ءَ انچو جیڑگانی تہ دور داتگ کہ مرچی سے روچ اِنت من بس ھمے کتاب ءِ زِر ءَ اوژناگ کنگ ءَ اوں۔
اے گِدارُک بلوچستان ءِ مزن شھدربرجاہ ءِ نودربر چنگیز ءُ آئی ءِ کوٹی نمبر 52 کہ آئی در ءِ دیم ءَ نبشتہ اِنت "وشنو مندر" ءَ چہ بندات بیت۔
چنگیز ءِ ھیال ءُ لیکہ زمین دوستی، راجدوستی وتی بیگواھیں براتانی درد ءُ تورشت بلوچستان ءِ سر ءَ زوراکی ءُ بلوچ ماتانی رتکگیں ارسانی مارشتاں چنگیز چہ آ دگہ مردماں چَٹ جُتا کتگ۔
خلفان وھدے اولی رند ءَ چنگیز ءَ ھوٹل ءَ گند ایت گُڑا آ اجب ھبکہ بیت اے بچک چہ آ دگراں چَٹ جُتا اِنت۔
ھمے وڑ ءَ خلفان وھدے چنگیز ءِ "وشنو مندر" بزان کوٹی نمبر 52 ءَ روت گُڑا آ چد و گیشتر ھبکہ بیت۔ کہ اے چونیں مردمے برے دریگ ءِ دپ ءَ اوشت ایت سک کَند اِیت پدا وتسر ءَ گریت ھم۔
پدا واٹ ون شراب ءِ بوتل ءَ پچ کنت پیک ءَ جوڈ کنت وارت۔ پدا ھمے دراز ءَ کہ شراب ئِے کَش اتگ چہ ھمد ءَ مُسلا ءَ در کنت نماز کنت۔ پدا دومی دراز ءَ وشنو ءِ بُت ءَ در کنت ءُ سُجدہ ئِے کنت۔ اِد ءَ ھمے سما بیت انسان بس انسانے ھچ نیکراہ ءُ مزھب انسان ءَ مٹ کُت نہ کنت۔ ھرچی وتئی جاہ ءَ۔
اے کتاب ءِ تہ ءَ چنگیز ءِ وڑ ءَ آ دگہ نودربرانی بزگی ءُ بیوسی ھم نبشتہ اِنت۔ شھدربر جاہ ءَ دور ءُ دَر ءِ سادگیں بلوچ وھدے کاینت کجام جیڑھانی آماچ بنت ءُ کجام بزگی ءِ دیمپان بنت۔
وانِندگیں نودربر پہ نوکری ءُ کار ءِ ھاترا چنچو بزگ بنت ءُ پدا بلوچستان ءِ تہ ءَ نوکریانی بھا کنگ ءَ چنچو بزگریں نودربر دلپروشی ءِ آماچ بنت ءُ چو چنگیز ءَ وتی وانگ ءِ سَنّد ءُ کاگداں آس ءِ تہ ءَ دور دینت۔
چنگیز ءُ شاداب ءِ مھر ءِ کِسہ ءُ چنگیز ءِ مھِر ءِ بابت ءَ درشانداب۔ پَدا خلفان ءُ تسکین ءِ مِھر ءِ کِسہ دو ھمنچو درد ءُ تورشت دنت وھدے تسکین گُش ایت کہ نوں منی گوں ما ھما وھد ءَ ھال بکن کہ تو سر ءُ روزگار بئے۔
پدا خلفان تسکین ءِ سور ءَ سھی نہ بیت دانکہ تسکین ءَ چُکے بیت نوں خلفان ءَ ھال دنت کہ چنگیز ءَ منی چُک ءِ نام ءِ ھاتر ءَ جُست بکن۔ اے ندارگ ءَ من ءَ سک باز پدرد کُت۔
اے کتاب ءِ وانگ ءَ پَد من اے گپ ءَ پہ سِتک گُش اَں کہ شیردل غیب بلوچستان ءِ راستیں ءُ ھستیں دروشُم ءُ جاورانی درشانگ ءَ سوبمند بوتگ۔
مرچی چنچو چنگیز مئے دیم ءَ ھمُک روچ نِشہ ءِ سلگتیں نادُراھی ءَ اَچ ما زِتگ۔ چنچو بلوچ مات چو چنگیز ءِ مات ءِ وڑ ءَ ریٹا بنت ءُ دمک ءُ دراں گرداں چہ وتی بچانی سِدگ ءَ بے دردی بیران بنت۔ اے جیڑھاں ما ھمُک روچ گند ایں بلے غیب ءَ اے تھکُشیں درد دیستگ، مار اتگ ءُ نبشتہ کُتگ اَنت۔
وھدے چنگیز گُش ایت کہ ڈاکٹر دین جان، مھمد رمزان ، زاھد ، زاکر ءُ دگہ ھزاراں بلوچ بَچ بلوچستان ءِ دلبند ءَ چہ بیگواہ کنگ بوتگ انت آھانی کھول برے لانگ مارچ کن اَنت ءُ برے پریس کلبانی دیم ءَ زھرشانی کن انت۔ بلے راجانی تپاکی گَل بزان (UNO) ءَ ھوار سرجمیں دنیا بے توار اِنت۔ اے راستی ھم مئے دُرسانی دیم ءَ اِنت۔
ھمے وڑ ءَ پہ وتی گُلزمین ءِ رکینگ ءَ ھزاراں بلوچ سرمتاب کوہ ءُ اگاراں رپتگ اَنت۔ وتی ساہ سراں وتی زند ءِ وشیاں پہ بلوچ راج ءِ رُژناھیں باندات ءِ ھاتر ءَ ندر کنگ ءَ اَنت۔
زورگریں اِستان بلوچ راجی جُنز ءِ پروش دیگ ءَ وتی سرجمیں زور ءَ کارمرز کنگ ءَ اِنت بلے انگت بے سوب بوتگ۔
پد ءَ زگری ءُ نمازی ءِ نام ءَ مارا بلوچاں وت ما وت کُشت ءُ کُشار کناھینگ ءَ اِنت۔ دانکہ ما وتی جِند ءَ چہ گیش مہ بہ ایں۔ بلے بلوچ راج مرچی زورگر ءِ ھمُک پندل ءَ چہ آشنا اِنت پمشکہ بلوچ راجی جُنز روچ پہ روچ مھکم بُوان اِنت ءُ زورگر بے سوب۔۔
منا دُرستاں گیش اے کتاب ءِ تہ ءَ خلفان ءِ گوں چنگیز ءَ دوستی ءُ سنگتی ءَ سانمند کُت۔ وھدے چنگیز چہ خلفان ءَ گِستا بیت گُڑا پد ءَ خلفان ھم چو چنگیز ءِ وڑ ءَ جیڑ ایت آئی ءِ دُرسیں آدت چو چنگیز ءِ وڑ ءَ بنت۔ آ پہ چنگیز ءَ سک بے کرار بیت ھمے ھاتر ءَ خلفان چنگیز ءِ شوھاز ءَ دیم پہ کیچ ءَ سر گپیت گُڑا کیچ ءَ سر بوگ ءَ پیسر پاکستانی لشکر ءِ ھمُک پانگس ءَ کم شرپ ءُ جُست ءُ پُرس کنگ بیت کُجا روگ ءَ ئے ۔۔۔ کئی گورا روگ ءَ ئے چیا روگ ءَ ئے۔۔۔۔ (مرچی ھرچ بلوچ ھمُک روچ ھمے جاورانی دیمپان انت)۔
وھدے خلفان شاد دشتی ءِ ھوٹل ءَ سر بیت گُڑا آ پہ اشتاپی بس چنگیز ءِ جُست ءَ کنت۔ گُڑا دشتی خلفان ءَ زور ایت دیم ءَ وتی لوگ ءَ اوتاک(بیٹھک) ءَ روت۔ ھمود ءَ نوں چنگیز ءِ کِسہ ءَ کنت۔
چنگیز ءِ کِسہ ءُ آئی ءِ نشِہ ءِ آماچی ءُ بیرانی ءَ خلفان سک پدرد بیت ءُ چمانی ارساں داشت نہ کنت۔ ھمے ھاتر ءَ شاد دشتی دومی روچ ءَ دیم پہ شال ءَ خلفان ءِ ھمراہ بیت دانکہ خلفان ءَ تسلہ ءُ دلبڈی دات بہ کنت۔
بلئے گاڈی سامی ءَ سر بیت گُڑا بلوچ جھدکار گاڈی ءَ دار انت ءُ ڈلیور ءَ کَڈن کن انت کہ پاکستانی لشکریانی ھاتر ءَ ساز ءُ سامان مہ بر اِت گُڑا خلفان ھمد ءَ وتی رودپتر (ڈائری) ءَ دشتی ءَ را دنت کہ چنگیز ءِ بابت ءَ من گُشتگ کتاب ءِ نبشتہ کن اں بلے نوں نہ چنگیز ھست اِنت ءُ ناں تسکین۔۔۔۔ من چنگیز ءِ وڑ ءَ مِرگ نہ لوٹاں۔
اگاں ترا منی شھیدی ءِ ھال سر بیت گُڑا تو پھر بہ بند کہ خلفان لگورے نہ بوتگ۔
دشتی من ءَ چہ پد تو جبران ءُ رسول ھمزہ توپ ءِ وڑ ءَ بلوچستان ءَ لبنان ءُ داگِستان ءِ پیم ءَ بہ شیزار ءُ ساز بکن۔ پَد ءَ خلفان گوں بلوچ جھدکاراں درکپ ایت۔
منی وڈیں نہ بزانت ءِ اے کتاب ءِ راستیں ھک ءَ نبشتہ کُت نہ کنت۔ بلے اے کتاب ءِ وانگ ءَ پَد من ءَ اوپار نہ شُت کہ دو دانک نبشتہ مہ کن آں۔
گُڈی ءَ من بس بلوچ راج ءَ ھمے گُش آں کہ شیردل غیب ءَ بہ وان اِت۔ غیب ءِ وانگ ءِ وھد ءَ شُمارا ھمے سما بیت کہ شُما بلوچستان ءَ وانگ ءَ اِت بلوچ ءَ وانگ ءَ اِت۔
منی دُوا انِت کہ شیردل غیب ءِ نَد شالا انچو میزران بات۔
No comments:
Post a Comment