بلوچ ءِ کنٹ ءِ وارسی ءَ کئے کنت؟

نبشتہ کار: ایسپ بلوچ

شھید پدا چوک ءَ چار مردم یک کنٹے ءِ پانگ انت۔ کنٹ بلوچے ئیگ انت۔ کوکار کنوک ءُ کنٹ ءِ چپّ ءُ چاگرد ءَ نشتگیں مھلوک اوں بلوچ انت بلے کیچ ءَ بلوچ نیست۔

پِدا ءِ مردم کج انت۔ دہ لکّ مردم ءِ تھا ھزار مردم اوں آتراپ ءَ نشت نہ کنت بلے ھمروچیں بازاری کاراں ھزار ءَ گیش مردم ھمے پدا چوک ءِ کش ءَ گوزیت، ٹھک دنت، اسلم شاہ مارکیٹ ءَ دو سابُن زوریت ءُ واتر بیت۔

مرچی اوں بہ گندئے ٹھک برجاہ بہ مانتیں بلے شاباشیں دکانداراں کہ ھڑتال اِش کتگ ءُ بالاچ ءِ ژانگولیں کنٹ ءِ شرپ اِش کتگ۔

ما یکبرے اے جیڑگ ءَ دربیائیں کہ بلوچے وارث کئے انت؟ کئے پہ بلوچ ءَ چی کنت؟ کئے دلّارے،کئے جگاڑے۔۔۔یکبرے وتا بِچاریں کہ ما چنچو جُگاڑیں، چونیں بلوچ ایں؟ پلانی زھرشانی ءَ نئیت بلّے نئیت بلے تو چیا نہ روئے؟

کنٹ بلوچے ئیگ انت تہ تو اوں بلوچے ئے،اے زمین ھمینچو تئی انت،انچو کہ یک پارلیمان پرستے ئیگ انت،تو اوں ھمینچو زندگ ئے ھمینچو پارلیمان پرستے زندگ انت۔

حق دو تحریک جُگاڑے، بی این پی راجی مڈّی یے،ڈاکٹر مالک تئی خیرخواہ ایں۔۔۔ اے ھمروچیں سرھال انت کہ ھرچ بلوچے ایشانی سرا بحث کنت۔ آیا یک لس بلوچے وتیگ ءَ جیڑ اِیت کہ من کیاں؟ منی بستار چی انت؟

اگاں کسے ھم بلوچے ءِ کنٹ ءِ وارثی ءَ کنت،آئی ءِ واستہ زھرشانی کنت، پدا چارراہ ءَ نند ایت، بلوچ ءِ ھمراہ ھمیش انت۔

دو ماہ ءَ پد گچین کاری انت، دہ لکّ بلوچ ووٹ دنت۔ پہ واٹر سپلائی ءَ، پہ روڈے ءَ۔۔۔۔پدا چارراہ ءَ دہ ھزار بلوچ اتک نہ کنت۔

نوں بس انت پلانی ءِ وارسی، پلانی ھرچی کنت من آئی ءِ ھمراہ آں۔۔۔۔ پلانی ھرچی کنت بہ کنت، آئی ءَ اگاں ژانگولیں کنٹے، ماتے ءِ چمّانی ارس پشل کت نہ کنت،آئی ءَ تئی شِگان اوں پشل کت نہ کن انت۔

اے پیسلہ تئی دستا انت کہ نندئے کنٹ ھساب کن اِت،لنککاں برز کنے ءُ ٹیک ٹوک بنائین اِت۔ راجی سوت ءِ سرا دست ءَ دلبند ءَ کن ئے ءُ گُش ئے ما چکّیں بلوچانی،ما لجّیں گوھارانی ءُ جامگیں ماسانی یاکہ پدا چارراہ ءَ مات ءِ کَش ءَ نندئے،آئی ءِ بچّے وارثی ءَ کن اِت ءُ آئی ءَ سکین دے ات۔

یکّ گپّے زانگی انت کہ ٹیک ٹوک بنائینگ ءُ  راجی سوت ءِ سرا جان ءِ پُٹانی پادآیگ ژانگولیں کُنٹانی کپگ ءَ داشت نہ کنت۔ 

چوں مہ بیت کہ اردیں ما ھوش بہ کن انت تہ ما ھرکس تھنا بہ بئں، مئے راج ھلاس بہ بیت ءُ کنٹ بانک ءِ چڑھائی ءَ کانپول  بہ بنت ۔