زید رھمت ءِ نمدی ءِ پسو

زید رھمت ءِ نمدی ءِ پسو
۔۔۔۔۔۔۔جاوید بلوچ۔۔۔۔۔۔

پُلیں زید جان سلامتی پہ ترا!
تئی نمدی ءَ نی باز روچ گْوَستگ ءُ گمان ھمیش انت کہ تئی توقع ھم نی کمتر بوتگ کہ من ترا جواب بدیاں پمشکہ پہ زور باز روچ زورگ ءَ پد تئی پسو ءَ نبشتہ کنگ ءَ آں۔ مئے چاگرد ءَ برے برے وسر ءَ ، ءُ برے برے پہ مئے کارپدانی پد ءَ مردم دگرانی سر ءَ باریں چیا گیشیں توقعات دار اَنت کہ پلانی بائد چُش بہ کنت، بائد چُش بہ جیڑیت ءُ چُش مہ کنت۔ اگاں تؤ ھم اے توقع چہ من ءَ داشتگ بوتگ کہ من بائد تئی نمدی ءَ زوت پسو بہ کناں گڑا من ءَ پھل کن کہ من ترا وڑے ناں وڑے ءَ اے مارشت داتگ کہ تؤ چہ من ءَ وتی دل ءِ تب ءَ توقع بہ دار ئے بلے من پہ زانت بھ چُش نہ کُتگ بلکیں توقعانی پروشگ ءَ پہ باز رند ءَ ھمے وڑیں کار کُتگ دانکہ من وتی جند ءِ بستار ءِ کد ءَ بہ باں گیشتر انّاں، انچُش کہ گْوادر ءِ توار ءِ بابت ءَ ھم مئے بازیں نزیکیں ءُ دوریں سنگتاں انچیں توقع داشتگ بوتگ کہ بائد چُش بہ کن ئے ءُ چُش مہ کن ئے۔۔۔۔ اے درگت ءَ ھم من گْوادر ءِ توار ءِ پیج ءَ باز بر ءَ پھلی لوٹ اِتگ کہ باریں چون مئے دوستداروکانی تہ ءَ ما اے مارشت ودی کُتگ کہ آ مارا یک وتواکیں ءُ سیریں ادارگے سرپد بوتگ اَنت؟ ما اے پدر کنگ ءَ یا وَ عیب کُتگ کہ برے برے دو سے روچاں موبائل ءَ پیکج نیست کہ پیج ءَ چیزے بہ دیاں (اگاں اے وڑیں گِلہ یے اتکگ ما جواب کُتگ کہ گْوادر ءِ توار بلوچی ڈیجیٹل جرنلزم کنگ ءِ ھاتر ءَ یک ادارگے بوھگ ءِ وابے ءُ دنیگت ءَ ما وتی واب ءِ مانا کنگ ءَ چہ باز دور اِنت کہ مئے کرا اھوالکاری وت یک نوکیں چیزے، پد ءَ اشیی ءَ یک جُتائیں فیلڈے منّگ ءُ وانگ ءِ ادارگ ءُ اکیڈمی نیست۔ تھنا شال ءَ دو سے یونیورسٹیاں ماس کمیونکیشن وانینگ بیت) یا وَ وتی بستار ءُ اوقات ءَ چہ گیش کار کُتگ کہ مئے وانوک ءُ چاروک مارا مزنیں ادارگے سرپد بوتگ اَنت۔

پُلیں زید جان!
تئی لھتیں جُست گوں من ءَ اِتاں ءُ لھتیں گوں گْوادر ءِ توار ءَ، چُشکہ گْوادر ءِ توار ءَ من چلائینگ ءَ آں پمشکہ بہ گندئے منی زاتی زندگی، ذاتی سنگتی، نزیکی وشی ءُ نا وشیانی اسرے الم گْوادر ءِ توار ءِ سر ءَ کپتگ ءُ تؤ دیستگ پمشکہ من اے گپ ءَ سد درسد رد کُت ھم نہ کناں بلکیں منّاں کہ چُش بوت کنت ءُ جھانی راھبند ھم ھمے گُشاں کہ تئی چاروک ءُ وانوک بہ زان انت کہ تئی لیکہ چی انت دانکہ تئی ھم ھئیال ءُ تپاک نہ کنوک پرکے گیشینت بہ کناں ءُ ھچ عئیبی گپے نہ اِنت چُشکہ تؤ سیکیولرے یے، دینی مردمے یے، لیفٹ ءِ منوگرے یے یا دگہ۔۔۔۔ بلے من وتی نیم ءَ جھد ءَ آں کہ وتی سنگتی ءُ دوستی ءِ اسراں گْوادر ءِ توار ءِ سر ءَ دَور دئیگ ءَ مئیل آں ءُ اے رِد ءَ بازیں سنگت ءُ نزیکیں مردمے دلرنج ھم کُتگ کہ آیانی توقع ءُ امیت پیلو نہ کُتگ اَنت۔

مھروان!
چُشکہ تئی جُست ءُ دگہ بازیں مردم کہ من ءَ گِنداں یا آیانی گْوَستگیں لھتیں وھد ءِ کمنٹس ءُ کلوہ کاینت آ ھمیش اَنت کہ گْوادر ءِ توار ھک بہ دئے زرمبشت ءِ توار اِنت۔ من ءَ اے وشی بیت کہ تؤ اے درگت ءَ نبشتہ کُت ءُ گْوادر ءِ توار ءَ تئی نبشتگیں کلوہ شنگ ھم کُت ءُ چوناھا منی جھد ھمیش اِنت کہ مردمے ءِ ذاتی زند، زاہ ءُ بد یا نا وشیں کمنٹساں گار بہ کناں بلے اے درگت ءَ ھر کمنٹس ءُ کلوہ یے اتکگ آ ایر اَنت دانکہ گْوادر ءِ توار ایرادگری ءُ جُست ئے کلچر ءَ دیمرئی بہ دنت۔ منی ھئیالاں اے وت بس اِت انت کہ گْوادر ءِ توار ایراد گِری ءُ تنقید ءَ دیمرئی دئیگ لوٹیت بلّے توری ءَ اشیی ءِ زَد ءَ وت اِنت۔ بلے تئی لھتیں جُست گوں من ءَ اَنت پمشکہ من تئی گوھریں گالانی پسو ءَ دئیگ ءِ جھد ءَ آں۔

منی ھمبل!
مارا جرنلزم ءِ تہ ءَ لھتیں انچیں گپ ءُ تیھوری وانینگ بیت کہ آ جرنلزم ءِ ءُ ھالانی شوھازگ ءِ بُنپد لیکگ بنت ءُ لھتیں انچیں کاراں چہ دارگ بیت کہ جھانی راھبندانی رِد ءَ جْوان لیکگ نہ بنت۔ پمشکہ اگاں تؤ گْوادر ءِ توار ءِ ویب سائٹ ءُ پیج ءِ اباؤٹ ءَ اگاں سرے جَتگ گڑا ترا سرجمیں راھبند دست کپیت۔ نی اگاں من گُشاں منی نام جاوید اِنت ءُ دیم ءِ یک مردمے بہ گُشیت چُشکہ تؤ منی امیتانی سر ءَ آئگ ءَ نہ ئے تؤ جاوید نہ ئے گڑا پیسلہ ھرچی بہ بیت بلے من وَ داں وسے روت ھمے گُشاں کہ من جاوید آں۔ ھمے وڑ ءَ گْوادر ءِ توار ءِ ھم درور ھمیش اِنت کہ کسے اگاں وتی تب ءَ اد ءَ نہ گِندیت ءُ گْوادر ءِ توار ءَ دگہ یک گَل ءُ زرمبشتے ءَ گوں بندوک کنت اے آئی ءِ جیڑہ اِنت اگاں گْوادر ءِ توار ءَ جُست کنگ بیت گڑا گْوادر ءِ توار اشیی ءَ رَد کنت۔ اگاں اے بُنیاد ءَ گُشگ بیت کہ گْوادر ءِ توار ھک بہ دئے زرمبشت ءَ کوریج دئیگ ءَ اِنت ءُ آ دگہ گَلّاں نہ دئیگ ءَ اِنت گڑا اے بُنیاد ءَ گْوادر ءِ توار بلوچ اسٹوڈنٹس کونسلانی ترجمان اِنت چیاکہ بنداتی دھر ءَ ھمے گِلہ ھم کنگ بوتگ کہ بلوچ نودربر گَلّاں گْوادر ءِ توار کوریج نہ دنت بلے کونسلاں دنت۔

گْوادر ءِ توار وتی گیشیتگیں راھبندانی رِد ءَ بے آسراتی ءُ بے ٹیم ءَ اینچو مزنیں بارے وتی کوپگاں زُرت نہ کنت کہ ھر گَل ءُ ھمک جاہ ءَ سر بہ بیت ءُ ناکہ کمکے ءَ دلمانگ اِنت یا کمکے کسے کِرّ ءَ زُرتگ کہ آ اے ھک ءَ وتی کارمرز بہ کنت کہ مئے ٹیکسانی سر ءَ چَلگ ءَ اِنت ءُ مارا کوریج نہ دئیگ ءَ اِنت۔ من (جاوید) چُشکہ وت گوں لھتیں دگہ ویب سائٹس ءُ اھوالکاری ادارگاں گوں کار کنگ ءَ آں ءُ وت گْوادر ءَ آں ءُ منی بیٹ اے وھد ءَ ھمیش اِنت کہ اولی روچ ءَ چی اے زرمبشت ءَ فالو کنگ ءَ آں پمشکہ من جھد کناں کہ ھمک ھما چیز ءَ گْوادر ءِ توار ءَ بہ دیاں کہ آئی ءِ  سْیادی یا بستار لس بلوچ ءَ رَست کنت۔ چُشکہ اے زرمبشت ءَ گوں لس دریاورد، ازمکار، شائر، زالبول ءُ لس بلوچ یک مزنیں کساسے ءَ بندوک ءُ ھمراہ اَنت پمشکہ اے یک المی ایں بستارے داریت کہ جھان ءُ ھاس بلوچ اشیی ءِ بابت ءَ سرپد بہ بنت۔ اگاں جُست اِش انت کہ اے زرمبشت باندہ بلوچ ءَ تاوان دنت؟ گڑا باور کن کہ من ناں وَ جاتوے(جاتیگ) آں ءُ ناں یک نجومے ءَ آں۔ بلے ھؤ اے جُست ھم ھراب نہ اِنت ءُ اشیی ءِ مانا ھمیش اِنت اگاں باندہ اے زرمبشت بلوچ ءَ تاوان بہ دنت گڑا آ تاوان ناگمانی تاوانے نہ بیت چیاکہ مرچی اگاں اے جُست بئیگ ءَ اِنت گڑا الم اشیی ءَ پہ ھمے جُست ءِ کنوکانی زمہ واری اِنت کہ تیاری ھم بہ کن اَنت اگاں گوں آیاں تیاری بوھگ ءَ نہ اِنت اشیی ءِ مانا ھمیش اِنت کہ آ نزور اَنت۔۔۔۔ءُ آیانی گْوَستگیں جھد ءُ گپ ھُشک ءُ ھاک بوتگ اَنت گڑا اشیی ءَ بہ من اَنت۔ دومی اے زرمبشت یک بلاھیں مُدّتے ءَ پد بی ایس او ءِ بوہ ءَ کنگ ءَ اِنت کہ اشیی ءِ تہ ءَ لس بلوچ ھوار اِنت ءُ بلوچ ءِ چاگرد ءَ یک لکیرے گیش اِتگ کہ یک نیمگے اے تحریک اِنت دومی نیمگ ءَ سردار، میر، ٹیکھدار، مُلا، مُلاھی ءُ زردار اَنت ءُ دومی نیمگ ءَ لس دریاورد، ازمکار، ورناہ ءُ زالبولاں۔

نی اگاں جیڑہ اِش انت کہ پرچا اے زرمبشت ءِ سروکانی تہ ءَ یک مُلایے گون اِنت گوں؟ گڑا بلوچ ءِ ھما ترقی پسند دانشور کہ لاھور ءَ میرا جسم میری مرضی والا درزنے جنینانی اکساں شِنگ کنت ءُ نبشتہ کنت کہ "عورت کے لیے آزادی"، اے آئی ءِ نزوری انت کہ مُلا ءِ توار ءِ پد ءَ دہ ھزار بلوچ زالبول در کئیت ءُ آئی ءِ واھگ ءِ پد ءَ کس وتی گُشاناں چگل نہ دنت۔ ھمے وڑ ءَ چِد ءُ پیش گْوادر ءِ ازمکارانی بابت اد ءِ زرداریں راجکارانی پگر ھمے بوتگ اے ھردیں شُدیگ بنت یا ائید ءَ مراگاہ یے کن انت گڑا مئے گور ءَ پِنڈگ ءَ کاینت بلے مرچی آ وتی چاگردی جیڑیانی سر ءَ وتی ازم ءَ پیشدارگ ءَ اَنت۔ دریاورد مرچی جُست کنگ ءَ اِنت کہ چھل سالیں پیناڈول پرچا نیست؟ پیسر ءَ ھم بلوچانی چُک برگ بوتگ انت ءُ مرچی ھم ھمے درچ برجا اِنت بلے پیسر ءَ کہ بلوچ ءِ چُکے آوار جنگ بوتگ گڑا آ بزگیں مات ءُ پِت دمگ ءِ  مستریں واجہ کار ءِ بیٹھک ءَ شُتگ انت (ھمے واجہ کار وت سرکار ءِ مردم بوتگ) مرچی مزنیں کساسے ءَ دگّاں بند کن انت ءُ کُکار کن اَنت۔ مرچی دریاور وٹساپ گروپ، ٹویٹر اسپیساں کارمرز کنگ زانت ءُ وتی لیکہ ءَ وت درشان کنت۔ پیسر ءَ مئے ایکٹویسٹ ءَ وتی ادارگ ءِ چلائینگ ءِ واستہ گْوادر ڈیولپمنٹ اتھارٹی ءُ ڈی سی وغیریانی کرّ ءَ فنڈ زُرتگ ءُ فیس بُک ءَ آشوبی ءُ دردناکیں پوسٹ نبشتہ کُتگ بلے مرچی دریاورد ھمے لوٹ ءَ کنت کہ ایوک فیس بُک ءَ اناں شھید لالا ھمید سے راھی ءُ دگّانی سر ءَ ھم ترا من بہ گِنداں گوں۔۔۔۔ تؤ کُج ئے؟

پُلیں زید جان!
اے زرمبشت ءِ بابت ءَ من کہ ھردیں چیزے رَد دیستگ آ ھم نبشتہ کُتگ ءُ آیانی لنکس ءَ ھم پہ تئی ھاتر ءَ دیم دئیگ ءَ آں 👇📎

https://m.facebook.com/story.php?story_fbid=pfbid0BFqgybqVRgJVv3sMZaW5umCeaic1HceqGkR13ghtWVRdyr6hxb62GdznPniARzzSl&id=100064212992506&sfnsn=scwspmo&mibextid=6aamW6

https://youtu.be/8TUMizrX7Kg

https://youtu.be/cmpBu1Vp2cg

https://gwadaretawar.blogspot.com/2022/10/blog-post.html

https://m.facebook.com/story.php?story_fbid=pfbid036tUEVjQvuSdEYbjtQU5gTwhn1891LsaGz9HnR8STwiu4Ri8pouJPsZ453dsyt7a4l&id=100064212992506&sfnsn=scwspmo&mibextid=6aamW6

https://fb.watch/h_mdcqtuVg/?mibextid=NnVzG8

https://fb.watch/h_mjcgxyzo/?mibextid=NnVzG8

گُڈسر ءَ من ءَ تئی دگہ یک گپے یات پیداگ انت گندئے تؤ یک رندے گْوَشتگ ات کہ مئے لھتیں سنگت دگراں فالو کن اَنت کہ پلانی اے وڑ جیڑگ ءَ اِنت من ھم آئی ءِ پلہ مرزی ءَ کناں دانکہ آ چہ من ءَ رازی بہ بیت۔ اینچو کہ داد ءَ قاضی ءِ سر ءَ نگد کُتگ بہ گندئے دگہ کس ءَ نہ کُتگ بلے چُشکہ قاضی ءِ ھمے فیناں نہ ونتگ انت یا داد ءَ فیس بک ءَ نہ داتگ انت پمشکہ داد ءِ ءُ قاضی ءِ فین نہ مِڑتگ اَنت۔ مرچی تئی نبشتانک ءَ 25 روچیں کہ پبلش بوتگ اشیی ءِ ری ایکشن ایوک 19 آں، دو شیئر اَنت ءُ یک کمنٹے۔۔۔۔ نی من ھچ پیسلہ کُت کنگ ءَ نہ آں کہ ھما بازیں سنگتانی گِلہ ھمیش بیتگ کہ گْوادر ءِ توار ھک بہ دئے زرمبشت ءِ توار اِنت، آ کُج اَنت؟ یا وَ ترا فالورز نیست کہ بہ گُشاں باز وشیں جُستے تؤ کُتگ۔ اسل ءَ گپ تئی اِنت کہ انگت مئے یک ورنایانی طبقہ یے ءِ جیڑہ ھمیش انت کہ نہ وان اَنت آ ایوک اے چار اَنت پلانی ءَ کمنٹے کُتگ یا پوسٹے داتگ گڑا بس شر بیت۔ ءُ  یکیں کمنٹ کہ سنگتے ءَ داتگ آئی ءِ گِلہ ھمیش انت تؤ سوگات ءِ بابت ءَ چیا نبشتہ کُتگ؟ من وللہ سرپد نیاں کہ لبزانکی نبشتانکانی توک ءَ سوگاتانی بابت گپ کنگ ءِ سر ءَ پابندی اِنت یا سنگت ءَ پہ مزاک کمنٹ کُتگ گڑا من سنگت ءِ گپاں زوراں ءُ تئی اے پسو ءَ ترا پرسنل ءَ دیاں۔

دگہ سلامتی اِنت۔ جھانی زرمبشت ءُ مئے کش ءُ گوراں نزیکیں راجانی زرمبشتاں کہ ما اے زرمبشت ءِ دیم ءَ ایر بہ کن ایں چُشکہ پی ٹی ایم ءِ زرمبشت بہ بیت یا گلگت بلتستان ءَ زمینانی رکینگ ءِ زرمبشت بہ بیت یا ھندوستان ءَ کماش انّا ھزارے ءِ زرمبشت بہ بیت یا بی ایس او ءِ دھر بہ بیت۔۔۔۔ لھتیں یکرنگی اے تحریک ءِ گوں آیاں ھست چُشکہ طبقاتی نظام ءِ پروش دئیگ، بزگراں ھور کنگ، زردار ءُ مافیانی تُرس۔ ءُ لھتیں نزوری ھم اے تحریک ءِ ھست اَنت بلے اے زرمبشت ءَ لس بلوچ ءُ لس دریاورد سْیاسی جوڑ کُتگ انت۔ نی مستریں ظلم اِش انت کہ ما یا مئے لھتیں طبقہ وتی اِنسیکیوریٹی ءِ سبب ءَ اے زرمبشت ءَ بلوچ ءِ آجوئی ءِ زرمبشت ءِ دیم ءَ بَر انت ءُ ایر کن اَنت۔ اے ھمے مردم اَنت کہ انیتہ جلیل ءَ چہ ھم امیت دار اَنت کہ آ سی پیک ءِ یک مراگشے ءَ ھوسٹنگ ءِ واستہ روت پرچا آشوبی تران نہ کنت؟ اود ءَ نشتگیں سردار، میر، واجہ کارانی تران جیڑہ نہ آں بلے انیتہ ءِ یک گالے راجی جیڑہ یے۔

پُلیں زید جان!
گْوادر ءِ توار دائم جُستاں ءُ تنقیداں وش اَتک کنت۔ دائم جیڑان بات ئے ءُ جُستاں گوں زِندگ بات ئے۔