بلوچستان ءُ کمانچر بلوچ۔ گوادر ءِ توار

 بلوچستان ءُ کمانچر بلوچ

                                                         مہراج گلام

من نزانتگ کہ بلوچستان اِنچو مزن اِنت، من نزانتگ اَت کہ بلوچستانءَ کوہءِ سلیمانے ھست، من نزانتگ اَت کہ بلوچستانءَ ہزاراں درد جاہمنند اِنت، من نزانتگ اَت کہ بلوچستان اے کساس زیبا اِنتءُ زیبائیءَ سرریچ اِنت۔ بلے ھردئے من کمانچر زانت گُڈا پدا بلوچستانءَ زانگءَ لَگ اِتاں۔

کمانچر بلوچ 'ناکو' میران گوٹ ماں ملیرءَ 1995ءَ ودی بوت ھما وھدءَ کہ آئیءِ مات پہ علاجءَ کراچی شُتگ اَت۔ اسلءَ آئیءِ بُن پیروکی ھنکین مندءَ ماں جلال آبادءَ اِنت۔ کمانچر بلوچ یک زیبائیںءُ بے بہائیں اکسکارے زانگ بیت۔

کمانچر بلوچءَ سال 2008ءَ ماں اکسکاریءِ پِڈءَ وتی گام ایر کُتگاں ، انگہ جنزان اِنتءُ جنزان بات شالا۔ آئیءَ وتی اکسکاریءِ بندات یک 'Nokia Mobile' ے سرا کُتگ۔ پدا بازیں وھدےءَ پد گُڈا 2015ءَ چہ دبیءَ یک مردے دَراَتک آ کمانچرءِ اکسانی آشکے اَت، آئیءَ کمانچرءِ اکس دلءَ لَگ اِتاں  گُڈا آئیءَ یک بُتگرے 'Canon' ءِ سوگات کُت پہ کمانچرءَ۔

کمانچرءَ بلوچستانءِ ھمک زیبائی، وشّیءُ بِچکند، بزگیءُ ازابی، دردءُ رنج، داسءُتپر، لچءُشاھیم، گونڈوءُ کماش، دَرچکءُ دار، ءُ بازیں چیزے وتی اکسانی تہا بند کُتگءُ دُگنیاءِ دیمءَ پدّر کُتگ۔ آئیءَ اے پدر کُتگ کہ اکسکاریءَ ھم زُبانے پِر، اکسےءِ دروشمءَ ہم یک جیڑاھے یا کسہ ے پدّر کنگ بیت۔ انچو کہ نبشتہکارے یک جیڑاھےءَ نبشتہ کنت ءُ دیمءَ کاریت یا تامُر ساچے تامُرےءِ شکلءَ یاکہ دگہ یکے دگہ وڈئے، ھمے پئیمءَ کمانچر ءَ ھر ھما درائیں کسہاں وتئ اکسانی تہا بند کُتگ ءُ دیمءَ آؤرتگ۔

کمانچر بلوچءِ اکسکاریءَ پد مرچی بلوچستان ءِ بازیں ھَندءُ دمگاں چہ اکسکار دَراَتکگءُ اکسکاری بندات کُتگ اِش۔ آ دُرست مرچی بلوچستانءِ ہر ہما ندارگاں پیشدارگءَ آں کہ اودا لَس مھلوک شُت نہ کنت۔ آ مرچی ہر ہما میتگءَ زندگ کنگءَ آں کہ آ روچ مرچیءَ تَک زانگ نہ بوتگ انت۔ آ مرچی بلوچستان ءِ ھما گریبءُ تنگدستاں زاھر کنگءَ آں کہ چہ بُن پیروکءَ آ ھما وتی زمینءِ سرا کَپتگ انت ءُ کسءَ ھیال نہ کُتگ بلے ھمے اکسکارءِ بدولتءَ آہاں مرچی زانگ بوھگءَ اِنت ءُ کُمک بوھگءَ اِنت۔ ھمے اکسکارءِ بدولتءَ تو دُگنیاءِ رنگاں گندگءَ ئے۔ اکسکاری تئی سرجمیں کسہاں، یاتاں، سہتاں مُدام گوں تو پیوست کنت۔

کمانچر بلوچ گُشیت "بلوچستان ندارگانی دریا اِنتءُ آ ھمے دریاءِ تہا اُوژناگ کنگءَ اِنت"۔ اے گپءَ ھم کنت کہ بلوچستان ءَ ہمینچو ندارگ، کسہ، زیبائی ھست کہ ما دُرائیں بلوچ یکجاہ اکسکار بیبئیں بلے انگت آئیءِ چارکےءِ ھم ھَکءَ ادا کُت نہ کنئیں۔ راست گُشیت، بلوچستان چہ کسہاں سرریچ اِنت۔

تئ چم سلامت باتاں کہ ھزاراں چم اِش زندگ کُتگءُ تاھیر بکشاتگ انت۔ سلام تئی دیدگاں ناکو!

اکس: کمانچر بلوچ