گواچن ءِ آدینک

گواچن ءِ آدینک 

۔۔۔۔۔جمیل بلوچ۔۔۔۔

اے بے باوریں ساھدار کہ نامے انسان انت ایشی ءِ داں وسے شتگ ایشی ءَ اھدانی گردوناں ناروائیں کار کتگ۔

 برے دین ءُ راج، کدی ٹک ءُ لیکہ ءِ  نام ءَ دومی انسان ایسپ ءِ کتب ءَ سر کتگ۔ اے وڑیں ویل ءُ ھَوپاں راجدپتر پُر انت ءُ دیر مرو بلوچیں جیھند ءِ سرمچاریں بچ حملّ کلمتی پمیشکہ دزگیر ءُ بیگواہ کنگ بیت کہ آ وتی زِر ءُ زمین ءِ پھزگ ءَ چو تیگانی زِھاں  میلانک بیت۔

  

چونھا راجدپتر دروگ، ستاہ ءُ کینگ ءِ علم انت کہ روچ ءِ مروچ تچک بْیان نہ بیت۔ بلئے جھان ءَ لھتیں بے ریا ءُ نہ ترسیں نبشتہ کار است  کہ آیاں راست درگپتگ ءُ مردمانی دیما داتگ۔ چو کہ ایرانی گدارنویس ءُ کواس واجہ علی دَشْتی انت کہ آئی ءَ  "بیستءُ سے سال" مرگ ءِ کنڈگ ءَ بارت ءُ سر کنت۔ بلئے تاریخ ءِ راستیاں پدرّ کنت۔ 

بلوچ ءِ راجدپتر ھم ستا ءُ دروگ ءَ چہ ھالیگ نہ انت۔ چو کہ نواب بھائی ھان گچکی ءِ  کرد چے بیتگ؟ سرجم ءَ  دیما نیتکگ۔ بلئے تو کماشاں جست کاں گڈا ترا سماہ بیت تْیاب دپ ءَ ھان ءِ سپاھیاں کجام دیم سْیائی کتگ کہ کسہ نباں۔ ایشاں ماھیگ، پس، ککڑ ، ھَیک، مال ءُ مڑی ھچ نیشتگ۔ بزگیں دریاورد بانگوہ ءَ اناوارا اولینگ جنان ءَ  داں "زر کوہ" ءُ  "شَدان" ءَ سر بیتگ انت ءُ اسور ءُ روزدگ ءَ تْیاب ءَ واتر اتگ انت۔ ھمے روچاں کہ آیانی چم بھائی ھان سپاھیاں کپتگ انت کہ تْیاب دپ ءَ چو ھڑکی ایں کچک ءَ ترگ انت ،دریاوردانی دل بُڑّ اتگ۔ یکے وَ مستریں گور کتگ ءُ  بڑا داتگ داں جِیمڑی ءِ  بالی پٹ ءَ سر کتگ، پدا وھدے کہ تنیگیں دریاورداں آپ لوٹتگ گڈا لھتیں سپاھیاں لگت جتگ ءُ بیھار داتگ کہ برو گرک بو۔۔۔۔۔۔

ناکو دلشاد کروسی کسہ کاریت کہ" من ءَ کروس ءُ کروس میڈ ءِ انچو شوک بیتگ یکبرے من گوں وتی کماش ءَ دلرنج بیتگاں کہ آئی ءَ  گوشتگ کروس میڈ گناہ انت۔ یک رندے من پہ دکنی کروس یے ءَ بیست روچ ءِ پند جتگ سندھ ءَ شتگاں۔ نکن ئے کہ یک روچے ھمے کروس ترگ انت ءُ ناٹاپی ایں بھائی ھان ءِ سپاھی کایاں ککڑ ابیر چننت۔۔۔آ دگہ ککڑانی پجیگ ءَ  منی کروس ءَ ھم بر انت۔ باور کن اِت من ءَ سے روچ ءَ ورگ دل نیتکگ۔"

کسے ھم برو کماشاں جست بکاں  ھان ءِ زلم ءُ زوراکیانی کسہ آں کار انت. چونھا نواب بھائی ھان بکال تبیں مردمے بیتگ ءُ پدا گچکی ٹک ءِ واجہ ءُ نواب زادگ پہ تاگت، لب ءُ لالچ ءَ زور آور ءُ ازگاریں ٹکانی شرعی لزتانی سہولت کار بیتگ انت، باز نواب ءُ سردار اش وتی زامات کتگ۔ پمیشکہ مَکُّران ءِ ھاکم تاگت ءِ چاڑ ءَ گوں کمار بیتگ انت۔ 

بائدیں مئے راجدپتر شناس پرنگی، انگریز،گجر ءُ پنجابی ءِ زوراکیانی پجیگ ءَ وتیگانی دیم سْیاھیاں ھم بْیان بکن انت داں کہ دوتل ءُ دوپوستیں بلوچ چاگرد ءِ گواچن ءِ آدینک ساپ بہ بیت ءُ  سیاست ءِ کبلہ تچک بہ بیت۔