"لبزانک" آجوئی ءِ جُنزاں لبزانک ءِ کرد "بانک کریمہ"

"لبزانک"آجوئی ءِ جُنزاں لبزانک ءِ کرد "بانک کریمہ"

 

ھر لبزانت ءِ دانشور وتی چپ ءُ چاگرد ءِ جاوراں گوں تُرندی ءَ مارِت کنت ءُ شریں وڑے ءَ اِشانی درنگاز ءَ کنت-لبزانک ءِ دانشور انسانی سر گْوست ءِ آزمودگانی مھتاج بنت دنیا ھمینچو آجوئی ءُ آشوبی جُنز کہ چست بوتگ- آھانی تھا لبزانک ءِ مزنیں کردے بوتگ- ساچشتی لبزانک ءِ رھدربری ءَ پدریچانی تھا آشوب ءُ آجوئی ءَ چونک ءِ جمل جتگ ءُ آھانی پگر ءُ مارشت چہ گلامی ءِ تھاریاں کشّ اتگ ءُ آجوئی ءِ باروا جیڑگ ءِ بود بکشاتگ اَنت- وھدیکہ یک راجے جیڑگ ءُ مارگ ءِ سیمسراں سربیت-گڑا دراہیں راہ ءُ در وت پچ بنت-آ پگر آھاں چہ وابانی دنیا ءَ کشّ ایت ءُ آگہی ءِ دنیا ءَ کدمانی دَؤر دیگ ءَ آھانی رھشونی ءَ کنت-آشوبی لبزانت ءِ دانشور راج ءِ ورناھانی رنگانی تھا زگریں ھون مان کننت ءُ نوکیں جوزگاں چہ وابءَ پاد کننت-اِشان نوکیں بودھاٹی یے دینت- لبزانت وتی سرزمین ءِ سرا بوؤکیں بدلیاں دیما ایرکنانءَ ھما وڑیں ساچشت ساچانءَ راجءِ رھدربری ءَ کنان بنت-اے آشوبی ئیں دَؤر ءَ کہ بلوچ سرزمین ءِ سرا راجدپتری بدلی سدلی آہگ ءَ اَنت-یک نیمگے میان استمانی چمّ بلوچ ڈیھ ءَ سَکّ اَنت ءُ یک نیمگے پنجابی سامراج ءِ بدتریں دَؤر انتءُ دومی نیمگا چندے وتگڑیں راج دوست، وتن دوستی ءِ نام ءَ گوں بلوچ ءَ دوتلءُ دو پوستیں لیبے کنگ ءَ انت-اے وڑ ءَ بلوچ لبزانت ءِ دانشورانی کوپگاں گرانیں ڈبّہ یے کپیت-کہ آ آشوبی لبزانک ءِ سبب ءَ بلوچ ءِ گیشتر ورناھانی رھشونیءَ بکن اَنت-آ گوں وتی ساچشتاں ورناھاں چہ وابانی دنیا ءَ بہ کشّ اَنت ءُ آگہی ءِ راہ ءَ بہ پرّین اَنت- آ گوں وتی ازمی بود، پگر ءَ گوں وتی ساچشتاں ورناھاں ھما جوڑ کت کننت کہ آئی ءِ لوٹ ءَ راجی آجوئی جُنز کنگءَانت- دنیا ءِ تھا بازیں لبزانتاں گوں وتی لبزانکی سلاھانی ھمراہی ءَ عملی سیاستءَ ھم بہر زُرتگ-چین ءِ آشوبی لبزانت رائیسون ءِ باورا ماؤزے تنگ! گُشیت کہ "چین ءِ دود مانی آشوب ءَ کسے ءَ درستاں چہ گیشتر بھر زُرتگ ءُ آئی ءِ آشوب ئےِ دیما بُرتگ ءُ توکل ءِ مزن مردی ءِ مسالے جوڑکتگ گڑا آ رائیسون انت-آ بس یک دانشور ءُ لبزانتے نہ بوتگ-بلکیں یک سکیں بلاہیں آشوبی یے بوتگ-اسپین ءَ وھدے استعمارءِ ھلاپءَ جنگ چست بوتگ اَت-آوھد ءَ رالف فاکس ءَ ناں ایوکا گوں وتی لبزانکی بود ءَ، بلکیں راست ءَ راست عملی سیاست ءِ ھم بھر جوڑبوت ءُ استعمار ءِ ھلاپءَ جنگ ئےِکت- آئی ءَ وتی لبزانکی زندگیءَ بازیں کسمانکے نبشتہ کت-کمیونزم کتاب ئےِ نبشتہ کت- ایشیا ءِ کوھنیں راجدپتر ءَ ابید لینس ءِ زندگی ءَ سرا ھم نبشتہ یے کت-اے دراہیں دزگٹّیاں ابید کمیونسٹ پارٹی ءِ کارے اوں ٹِپّاھینت اَنت ھمائی ءِ کہ آ باسک اَت-رالف یک انچیں لبزانتے اَت کہ وتی سرگوستے ازم ءِ تھا بیان کتنت-آئی ءَ ھروھد ءَ گُشت کہ "ھمدست بہ بئے ات-بوان ات ءُ جنگ بکن ات-،،چیاکہ آجوئی ءِ جنگ ءَ سپاہیگ پکاربیت ءُ کتاب تھنا اے لوٹءَ پیلہ کت نہ کننت-آئی ءَ گوں وتی کلم ءِ زور ءَ تاں چار دہ سال ءَ گلامی ءِ ھلاپ ءَ جنگ کت- چِک راج ءِ تھا ودی بوتگیں جولیس فیوچک ءَ دُرہیں دنیا ءَ شنگ بوتگیں زوراکی مار اتگ ات ءُ آئی ءِ جُھد ھلاپ ءَ جھد کنگ آئی ءَ وتی مکسد جوڑکنگ ات-جولیس فیوچک ءِ بستار لبزانک ءِ تھا سَکّ باز بُرز اَت- بلے یک لبزانتے بوؤگ ءِ ھمراہی ءَ آ یک سیاسی کارکنے ھم بوتگ-آئی ءَ لبزانک ءُ سیاست ءِ تھا ھچبر پرک ءُ پیر نہ کتگ-ھمے ھاترا آ یک لبزانتے بوؤگ ءِ پجیگءَ چک کمیونسٹ پارٹی ءِ بنجاھی کمیٹی ءِ باسک ھم بوتگ- اے ھما وھد ءِ گپّ انت کہ چیکو سلواکیہ ءِ میراث دار ءُ زَرّداراں نازی سرکار وش اھت کنگ ءَ آئی ءِ سجدہ ءَ کپتگ اتنت- آ وھد ءَ فیوچک ءَ ہٹلر شاہی ءِ زوراکی ءِ دیما مِک بوت ءُ آئی ءِ راستی ءِ آوازے چست کت-آ گوں وتی ساچشتاں مکتبی آنی جنزءِ رھشونی کنان بوت-فیوچک ھما تاک ءِ شونکار ات، آئی ءَ چیکو سلواکیہ ءِ جنز ءَ نوکیں بنیادے دات-آ فسطائیت ءِ دَؤر ءَ چیربوت ءُ وتی لبزانکی کارانی ھمراہی ءَ پارٹی ءِ چیریں تنظیم ءِ کار ئےِ ھم ٹِپّاھینت اَنت-آئی ءَ گوں وتی ھمراہاں چیریں روتاک ھم کشّ ات-آئی ءَ گرگ بوؤگ ءَ رند تاں شانزدہ سال ءَ نازینانی زوراکی سگّ اتنت-بلے آئی ءِ توکل ءِ مزن مردی ءِ لھڑ کدی ایرموش نہ بوت انت-

روسی لبزانت میکسم گورکی وتی بازیں ساچشت ءُ گیشتر "مات" ءِ وڑیں ساچشتاں میان اُستمانی لبزانک ءِ راجدپتر ءَ نمیران کتگ-اشی ءِ لَکاّنی ھساب ءَ مردمانی زندگیاں بلاہیں سانے دَؤر داتگ- کہ راجدپتر ءِ میدان ءَ لُٹّ ءُ پُل ءِ دستاں دُرشتگیں گورکی ءَ ١٩٠٥ ءِ آشوب ءِ آہگ ءَ پیسر اوس ءِ پوریاگریں ٹک ءِ زندگی ءِ آھانی جد ءُ جُھد ءِ شاھگانیں اَکس کشّی کتگ ءُ لکّانی مردمانی ذہن انچو جُلگمینتگ اَنت کہ کسّہ کنگ بہ بیت ءُ آھانی ذہن ئےِ انچیں بُزری یے ءَ بُرت ءُ سر کتنت کہ اودا انساناں اے پہمگ گران نہ کپیت-کہ آشوبِ ءِ گٹّ ءُ ناراستیں راھاں روان ءَ بندات پہریزگ بیت ءُ انسانی آجوئی ءِ بستار گیشّنگ بیت ءُ انسانیت ءَ نجات رس ات کنت-راجے ءِ تھا کہ میکسم گورکی ءِ وڑیں لبزانت بہ بنت-مردمانی بدلی رُدوم زورنت- لینن ءَ گورکی ءِ گدار "مات" ءِ بابتا گشت کہ "اے الّمی انت کہ بازیں پوریاگر ابید جیڑگ ءُ پہمگ ءَ کدرتی رنگ ءَ آشوبی جنز ءَ بھر زورگءَ اتنت-نوں آ" مات" ءَ واننت کہ پراھاں نپ انت- اے پہ وھد اتکگیں کتابے-،،

گورکی ءَ چرے دنیا ءَ سپرکنگ ءَ نیم کرن ءَ چہ گیشتر وھد گوستگ-بلے آئی ءِ ساچشت انگت میان اُسمتانی لبزانک ءَ مزنیں ارزشتے دارنت-کہ آئی ءَ وتی لبزانکی بود ءِ برکت ءَ لَکّاں انسان آجوئی جُھد ءِ ھاترا سکین داتنت-یا پدا چین ءِ آ چشیں دیمروی دوستیں لبزانتانی شھادت کہ آ شنگھائی ءِ زندان ءَ کتنت اشءُ آھانی مارگانی سرا گاٹ دارگ ءِ بے سوبیں جُھد اش کت-بلے شنگھائی ءِ بُرز ءُ بلندیں بیرکاں آھانی آجوئیءِ پگرءِ بالاں بندی کت نہ کت-اے ھر ششیں لبزانتان کہ اِشانی تہ ءَ یک جنکے ھم ھوار اَت-آھانی اُمر چہ سِی ءُ پنچ سال ءَ چے بُرز نہ اَت-آھاں زندگی پہ وتی جند ءِ واھشتانی ھاترا اِنّاں، بلکیں وتی بے بھائیں، پگر، لیکہ، انسانیت، وتی راج ءِ ہستمان ءُ آجوئی ءِ دیم ھونی کتنت-آ تنیگہ وتی ورنائیءِ دَؤران اتنت کہ کلم ءِ سِلاہ ءِ چست کنگ ءِ میار ءَ پاھو ءَ درنجگ بوؤگ ءَ اتنت-آ کندان ءَ مرگ ءَ ایلنگی کنان، پہ گل ءُ شادمانی دیم پہ پاھو اشت انت-آھانی سرمچاری ءِ لھڑ کدی ایوموش نہ بوتنت ءُ چہ وتی ساچشت ءُ پگر ءُ ھیالاتاں ھچبر نہ بجّ ات انت ءُ چہ وتی گپّاں پُشت نہ کنز اتنت-آ آشوبی لبزانک ءَ نمیران بوتنت-میراس داری راھبند ءِ گوں زمزیلاں بندوکیں بادشاہی دزمانگجیگی،اے وڑا آشوب ءَ ابید دراہیں انسانانی پہ وتی مرادانی منزل ءَ پُجّگ نہ بوتگیں ھبرے نہ اَت کجام یک آشوبی چست ءُ ایرے ءَ ساچشتی لبزانک ءِ مزنیں دزمانگیجی یے بیت-اے دنیا ءَ لینن ءِ وڑیں لبزانت، فرانس ءِ گبریل پیری، کہ وتی مرگ ءَ چہ چندے دمان پیسر وتی یک نمدی یے تھا گشیت" منی دوستاں بگش ات من تاں گُڈّی وھد ءَ وتی زندگی ءِ لوٹ ءُ راھبند ءَ پُشت پِر نہ کتگ-منی ھم وتناں سلام بکن ءُ بگش ات ئے کہ من پہ ھمے ھاترا مِرگا آں تنکہ فرانس زندگ بہ بیت-،،

انگلستان ءِ ورناہیں شاعر ءُ لبزانت ڈیوڈ گیسٹ کہ ایمنی پہریزگ ءِ ھاترا چین ءِ یک کوھستگے ءَ مرگ ءِ امبازاں شُت ءُ رائیسون ،میکسم گورکی ءُ رالف فاکس ءِ وڑیں لبزانتاں کہ آھاں وتی لبزانکیءُ کردی بود ءَ چہ دومی انساناں راہ پیش داشتگ ات-

مرچی ماتیں وتن بلوچستان ءَ انچیں لبزانت ءُ دانشور پکار انت-کہ گوں وتی ساچشتی بود ءُ کمال ءَ بلوچستان ءِ مھلوک ءُ ورناہانی ذہناں آجوئی ءِ نیمگا بہ ترّینیت- بلوچستان ءِ ورناھاں نوں سوڑگ کنگی انت کہ آھانی راہ کجام انت-اشی ءِ پسّہ ھر لبزانت ءَ دیگی انت-اشاں ھر زوراکی ھلاپ ءَ ھکّ ءِ آواز جوڑ بووگی انت-ھر آشوبی کدم ءَ گوں ھمگام بووگی انت- بلوچستان ءِ لبزانت ءَ اوں لبزانک ءِ دائمی بوؤگ ءِ ھاتر ءَ کدم چست کنگ ءُ آشان ءُ مڑاھانی لوٹ پیلو کنگی اَنت- وھدے زوراکی وتی گورمیں جُھلانکیاں ایرکپیت آوھد ءَ لبزانتانی اشی ءِ دیمپانی ءَ پادآہگ الّمی انت-ھما بلوچستان کہ آئی ءِ پرزنداں ٹوپانی دیما وتی سینگ چو کوہ ءَ مک کتگ انت-مرچی ھما ماتیں وتن پنجابی ھاکمانی لگتانی چیرا ھیسکارگ ءَ انت- بلوچستان ءِ لبزانتاں اے پیگام دیگی انت کہ سِلاہ بندیں جُھد یک انچیں راستی یے کہ چرائی ءَ پہریزگ نہ بوتگیں ھبرے، اشاں زندگی ءِ ھر پیچ ءَ گوں اے راستی ءَ دُچار بہ گیج اَنت ءُ سرپدی بہ دینت-ھما وتگڑیں بلوچانی ھلاپ ءَ کہ آ ماتیں وتن ءُ راج ءَ پہ چندے زَرّ ءَ پنجابی ھاکمانی دیگ ءَ پہریز نہ کن اَنت-

"کُلبر تاک 1 تاکشان 2009