ٹیکی یے پہ پلانی ءَ کہ ادا نہ اِنت بلئے گوادر ءَ یات کنت... کنارے کا مھانجی پہ من سنگتے ءَ دیم داتگ اَت.. رسگ ءَ گوں من پانزدہ نبشتانک ونت.. سبارگ تیار اَت من کتاب ایر کت.. سبارگ ءِ نیام ءَ اے کارست منا یلہ دئیگ ءَ نہ اِت اَنت.. دست شودگ ءَ چہ رند اولی کار ٹوال ءِ شوھازگ اَت ءُ دومی کار ھمے کتاب...
ھمینچو دیم ءَ روان بہ ئے درد ءُ اندوہ گیش بیان بنت.. گوں من یکپارگی اِنچو ابیتکی، نہ کتابے ءِ درْوشم ءَ وانگ بیت ءُ نئیکہ تامرے ءِ رنگ ءَ چارگ.. ھپت ھشت نبشتانک ءِ وانگ ءَ چہ پد کتاب ایر کت... شپ ءَ پدا ھمے کتاب اَت ءُ من اِت آں.. سرجم ءَ وانگ ءَ چہ پد یک اجب ایں تکانسری یے منی بدن ءِ رگاں شنگ اَت.. سبب ایش اَت ءُ درد ھم ھمیش کہ اے کتاب ءِ نبشتانکانی تہ ءِ کارستانی تھنائی، گنوکی، درامدی، درست آیانی وتیگ اِت اَنت..
جاوید درداں لبزانی دروشم ءَ پینٹ کنگ ءِ رپک ءَ بلد اِنت.. گوش ئے پادینکاں زیمر پاداں دنت.. ھمے سبب اِنت کہ وانوک آئی ءِ دست ءَ یلہ نہ کنت.... پدا یک ھسابے اے درائیں درد ءُ اندوہ آئی ءِ وتیگ اَنت ھم. پرچا کہ آ ھمے شھر ءِ کارستانی ساھگ ءَ زندگی کنان ادا رستگ... بلئے جاوید ءِ اے کتاب ءِ وانگ ءَ چہ پد وانوک ءَ اے ھم ارزانی ءَ سما کپت کنت کہ کارستانی تہ ءَ یک امیتے زندگ اِنت.. یک بے تواریں امیتے... مشکل بس ایش اِنت کہ ھمے امیت ءِ اے وڑا سبزگ ءُ سبزینگ تھنائیں، گنوک ایں ءُ درامدیں کارست ءَ گیشتر تھنا، گنوک ءُ درامد کنت..
اے کتاب ءِ تہ ءَ من اے شھر ءِ ھما کارست ھم شوھاز کرت آں.. کہ آیانی ھمے امیت پرشتگ اَت.. بلئے آ گندگ نہ بوت آں.. نا کریمک ءِ ہوٹل ءَ نئے باتیل ءَ، نئیکہ شاھی بازار ءَ... بلئے پدا ھم من اے گپ ءِ گوشگ ءَ ھچ چَکّ ءُ پد نہ باں کہ جاوید حیات با سواد ءُ دل پھکیں نبشتہ کارے..۔
زالم ناکو ابراھیم ءِ پان ءِ بابت ءَ اَنچو گپ جنت دل گوْش ایت دمے کتاب ءَ ایر کن ءُ برو شاھی بازار ءَ ناکو ابراھیم ءِ کیبین ءَ پانے بہ زیر ءُ بور... بلئے من گوادر ءَ نہ یاں ءُ پدا مروچاں اَنچو ھم اے شھر ءَ یات کن آں منا ھما دمان ءَ منیر نیازی ءِ اے شئیر یات کئیت کہ
منیرؔ اس "شہر" پر آسیب کا سایہ ہے یا کیا ہے
کہ حرکت تیز تر ہے اور سفر آہستہ آہستہ
No comments:
Post a Comment