کیرئیرسٹ

کیرئیراِسٹ!  

 وہاب مجید 

مئے چاگرد ءَ مزنیں کچّے ءَ سرکاری ءُ غیر سرکاری نوکر کیریراسٹ اَنت۔  کیریراسٹ ہما انسان اِنت کہ آہی ءَ چہ دُرستاں گیش وتی نوکری دوست بیت اِنت۔ وتی نوکری ءُ افسری ءَ پہ آ ہچ وڑیں راھبند ءُ اُصولاں ہم مان نیاریت۔ آئی ءِ زند ءِ متاع بس وتی گریڈ، پروموشن، ءُ افسری اِنت۔ آئی ءِ زند، لوگ ءُ کارگس ءِ میان ءَ اِنت۔ آ ہمُک سُہب چہ لوگ ءَ درکپیت پہ وتی کارگس ءَ ءُ بیگاہ ء چہ کارگس ءَ دیم پہ لوگ ءَ۔ 

ہردے کہ تو یک کیریراِسٹے ءِ مجلس ءَ نِندئے گُڑا بیدے گریڈ ءُ ٹرانسفر پوسٹنگ ءِ کِسہاّں دگہ ہچ گپ نہ اِشکن اِت۔ 

اے جوانیں گپے کہ پہ لاپ ءِ گِرگ ءَ تو ہرچ کارے کنگ ءَ ئے گُڑا المّی اِنت کہ تو آ کار ءُ ہُنر ءَ جوانی ءَ سرپد بہ بئے۔ تو کہ وتی کارا جوانی ءَ سرپد بئے ءُ کن ئے گُڑا تئی محکمہ ءُ کمپنی ءَ پائدگ رست کنت۔ پمشکا داں وتی کار ءِ کنگ ءِ ھدّ ءَ کیریرسٹ بیگ شرّیں گپّے بلے یات بکن زندمان چہ تئی کارا باز دیمتر ءُ مستریں چیزے۔ 

چوناہا نوکری، کارگس، مزنیں گریڈ ءُ سرکاری آسراتی ہمکُ سرکاری ءُ پراہیوٹ افسر ءَ دوست بنت ءُ مھنت ءِ بدلہ اے آھانی ھکّ اَنت ہم۔ بلے وتی شپ ءُ روچ ءُ زِند ءِ ماہ ءُ سالاں وتی کارگس ءِ سرا کُربان کنگ ءُ وتی چاگردی کِرد ءَ سکّ کسان ءُ لُکّ کنگ یک وانندہ ءُ سرپدیں انسانے ءَ جلوہ نہ دنت۔ 

مئے چاگرد ءَ چُشیں سرکاری افسر تو مزنیں کچّے ءَ گِندئے کہ سالانی سال گوزنت آ کتاب نہ وان اَنت۔ دگہ سرھالانی کتاباں یلہ کن آیانی جِند ءِ کار ءِ گُڑّی کتاب ہما بیتگ کہ آھاں یونیورسٹی ءَ ونتگ۔ فلسفہ، راجدپتر، سیاست، معشیت، ساہنس، آرٹ ءُ ادب آیانی کش ءَ نہ گوستگ۔ 

کیریرسٹیں افسرانی پراہیوٹ مجلس ءَ نِند ئے گُڑا آیانی علمیت نوکیں ٹرانسفر پوسٹنگ، پروموشن، بجٹ ءُ نوکیں گاڑیانی بابت ءَ درشان بیت اِنت۔ ھئیر اے آیانی ھکّ اِنت کہ آ ہرچ وڑا لوٹ اَنت وتی زِند ءَ بہ گوازین اَنت۔ بلے بلوچ ءِ پدمنتگیں چاگرد ءَ کہ وانندہ ءُ سرپدیں مردم لنکُکانی سرا ھساب بنت اِدا اگاں پروفیشنل ءُ وانندئیں مردم وتی نوکری، کیریر ءُ لاپ گِرگ ءِ ہمراہی ءَ وانگ ءُ زانگ، علم ءِ دیمروہی، ورناہانی سر ءُ سوج، کتاب کلچر ءِ ساڈاھگ ءُ کسان کسانیں چاگردی کارانی تہ ءَ ھوار بیتین اَنت گُڑا بگندئے مئے ورناہاں پہ منزل ءَ راہ یے گِپتگ اَت۔ 

یک پدمنتگیں چاگردے ءِ تہ ءَ فِکری ءُ چاگردی بدلی وانندئیں ٹکّ کاریت۔ اگاں یک چاگردے ءِ گیشتریں وانندہ کیریراِسٹ جوڑ بہ بنت ءُ آھاں گوں کتاب ءُ زانشتی چست ءُ ایراں گوں ہچ وڑیں سیادی مہ بیت گُڑا آ چاگرد چے رنگ ءَ بیت؟ المّ اے وڑیں چاگرداں فکری، زانشتی ءُ چاگردی بدلی ءِ عمل سکّ نِزور بیت۔ 

اے گپ ءِ تہ ءَ ہچ ھرابی نیست کہ یک گریبیں بلوچ ورنایے وانگ ءَ پد سرکاری یا غیرسرکاری نوکری یا کاروبار بہ کنت بلے سوال ہما وھد ءَ پیداک بیت اِنت وھدے کہ ہمے وانندئیں ٹکّ ءِ "دین ءُ ایمان" "است ءُ نیست" ایوک کیریر بہ بیت اِنت؟