تُرکی ءُ شام ءَ پد مئے نیم ءَ ھم زمین چنڈ ءِ گمان اِنت؟
۔۔۔۔گْوادر ءِ توار۔۔۔۔
ھمے ھپتگ ءَ دوشمبے ءِ گوربام ءَ تُرکی ءُ شام ءِ سیم سری ھداں 7 ٹِک 8 ءِ تُرندیں زمین چنڈے ءَ کساس 11 ھزار مردم بیران بوتگ۔ جھانی جان سلامتی ءِ ادارگ ءِ رِد ءَ زمین چنڈ ءَ آماچ بوتگیں مردمانی کساس دو کروڑ 30 لکھ بوت کنت۔
ترکی ءُ شام ءَ اتکگیں زمین چنڈ ءَ پد سوشل میڈیا ءَ وتگڑیں پیش گُشی شنگ اَنت کہ بلوچستان ءَ ھوار مئے کش ءُ گوراں ھم ترندیں زمین چنڈے ءِ گمان اِنت۔ اے رِد ءَ پاکستانی مولم زانتیں ادارگ ءَ وتی یک بْیانے ءِ تہ ءَ اے وتگڑیں ھال ءَ دروگ بند کُتگ ءُ گْوَشتگ کہ "پاکستان ءُ تُرک فالٹ لائن ءِ تہ ءَ ھچ وڑیں سْیادی نیست" مولم زانتیں ادارگ ءِ رِد ءَ تُرکی ءَ اتکگیں تُرندیں زمین چنڈ ءِ فالٹ لائن ءَ گوں ایران، اوگانستان ءُ پاکستان ءِ لائن ءَ ھچ نزیکی نیست ءُ دنیگت ءَ چُشیں ٹیکنالوجی یے نیست کہ آ زمین چنڈ ءِ پیش گُشی ءَ کُت بہ کنت۔
مولم زانتیں ادارگ ءِ رِد ءَ سوشل میڈیا ءَ شنگیں پیش گُشی ءِ تہ ءَ ھچ راستی نیست، بلے مئے زمین ءِ تہ ءَ آؤکیں وھداں یک زمین چنڈے ءِ بوھگ ءِ گمان ھست بلے کس زانت نہ کنت کہ کدی ءُ کجا بوت کنت۔
بلوچستان ءِ زمینی تھی ھد ءَ یک پلیٹے ءَ مَکُّران سبڈکش گُش انت کہ اشیی ءِ بابت ءَ زمین ءِ زانتکارانی رِد ءَ سک باز انرجی جم بوتگ کہ آ کجام ھم وھد ءَ یک زمین چنڈے ءُ پد ءَ سونامی ءِ سبب بوت کن اَنت۔
بلوچستان ءَ ترندیں زمین چنڈ ءُ سونامی ءِ گمان
زمینی علم ءِ زانتکارانی رد ءَ زمین ءِ تہ ءَ مکران سبڈکشن ءِ ھدّ ءَ امینچو انرجی جم بوتگ کہ کجام ھم وھد ءَ زمین چنڈ بوت کنت ءُ آئی ءَ پد مزنیں زِری توپان بزاں سونامی یے ھم اتک کنت۔
دنیگت ءَ سائنس ءُ زمینی زانتکاراں چُشیں پکہ ایں سرپدی نیست کہ آ زمین چنڈ ءِ بابت ءَ پیش گُشی کُت بکن انت چُش کہ سردی، گرمی، ھور ءُ گواتانی پیش گُشی کنگ بیت بلے اے وھد ءَ جھان ءِ زمینی علم ءِ زانتکار بلوچستان ءُ مکران ءِ تیاب دپ ءَ ترندیں زمین چنڈ ءُ زری توپانے ءِ آھگ ءِ گمان کنگ ءَ انت۔ اے گمان کنگ ءِ مستریں سبب مکران سبڈکشن انت۔
مکران سبڈکشن چی یے؟
زمینی علم ءِ زانتکارانی رد ءَ زمین ءِ تہ ھزار کلومیٹر ءِ دراجیں پٹی یے ھست کہ اشیی ءَ مکران سبڈکشن گُشنت۔ اے سبڈکشن رودراتکی بلوچستان، روبرکتی بلوچستان بزاں پاکستان ءُ ایران، عمان ءُ داں ھندوستان ءَ تالان انت۔ سبڈکشن زمینی سُر ءُ پُر ءِ یک گامگیجے کہ اشیی ءِ سبب ءَ زِر ءِ چیر ءَ زمین ءِ پلیٹ سُر ءُ پُر کنگ ءَ چہ یک پلیٹے جھل تر ءَ روت ءُ اشیی ءِ سبب ءَ زِر ءَ زمین چنڈ بیت ءُ پدا سونامی کیت۔ پاکستان ءِ ابرمی وئیلانی ادارگ ءِ سروک سید سلمان شاہ ءِ رد ءَ گوادر ءَ زر ءِ تہ ءَ چھل ناٹیکل میل ءِ دوری ءَ مکران سبڈکش ءِ ھمے جاگہ انت کہ اود ءَ ھمے پلیٹانی جھل روگ ءِ عمل بوھگ ءَ انت۔ ھردیں ھمے پلیٹانی تہ ءَ باز انرجی جم بہ بیت گڑا اے پلیٹ یکے دومی ءَ جھل ءَ تیلانک دینت ءُ انی انچش بوھگ ءَ انت۔
ھپتاد ءُ ھپت سال پیسر نوزدہ سد چھل ءُ پنچ ءَ ھمے سبڈکشن ءَ ھشت ریکٹل اسکیل ءِ ترندیں زمین چنڈے اتکگ بوتگ کہ آئی ءِ سبب ءَ مکران ءُ کراچی ءَ کساس چار ھزار مردم مُرتگ۔
زمین چنڈ کدی بیت؟
کراچی شھدربرجاہ ءِ زمینی علم ءِ زانتکار ءُ استاد واجہ ڈاکٹر نعمت اللہ ءِ رد ءَ اے گپ ءَ کس نہ زانت کہ زمین چنڈ کدی بیت۔ بوت کنت کہ باندہ بہ بیت یا بوت کنت سد سال پد بہ بیت بلے زمین چنڈ بوھگ ءِ واستہ ھما کد کہ زمین ءِ تہ ءَ انرجی جم بوھگی انت آ اے وھد ءَ مکران سبڈکش ءِ تہ جم بوتگ۔
سونامی ءِ نشانی چے انت؟
زانتکارانی رد ءَ چُش کہ سونامی زمین چنڈ ءِ سبب ءَ کیت پمشکہ اگاں ترندیں زمین چنڈے بوت گڑا سونامی آھگ ءِ تُرس گیشتر بیت۔ اے وھد ءَ دریا ءَ چہ امینچو دور شُت کن ات برو ات۔ بُرزیں جاگھاں وت ءَ رکینگ ءِ جھد بکن ات۔
سونامی آھگ ءِ نشانیانی تہ ءَ تیاب یکبرے پُشت ءَ روت ءُ دریا ءَ چہ ترندیں ءُ شور ءِ توار آھگ ءَ لگیت۔ اے وھد ءَ دریا ءِ روگ یا تامُر ءُ اکس کشگ ءَ چہ وت ءَ دور دارگ بہ بیت۔
اے سرپدی چہ بی بی سی اردو ءِ نبشتانکے ءَ زورگ بوتگ انت ۔ یوٹیوب لنک
No comments:
Post a Comment