شیرو شیران (مَٹی وارو) ۔ گوادر ءِ توار

شیرو شیران (مَٹی وارو) 

شاہ ابن شین                                

اکس: ھسا واھگ

 سھب ءِ بیل اِنت ھور رِچگ ءَ اِنت من بار والا گاڑی یے ءِ سیٹ ءَ نِشتگ آں ھمے گاڑی ءَ را مــا لوڈِنگ گُشیں .. گاڑی ءِ ڈرائیور منی ناکو زَتکے آ چہ کراچی ءَ سِندھ ءَ سامان بارت اے نیمگ ءَ آسن ءُ دگہ ازباب بارت ءُ چرا نیمگ ءَ گامیش،  سِیپُّر ءُ کاہ کار ایت

من سِندھ ءَ روگ ءَ آں سپر اِنت ھور اِنت ندارگ اَنت

ما ھیدر آباد ءَ کمّے دیم ھالا نامیں شھرے ءِ نان ءُ چاھی ھوٹلے ءَ داشتگ اے ھوٹل مزن دگ ءِ چپّیں نیمگ ءَ اِنت .

 ھوٹل ءِ تہ ءَ پُترِگ ءَ پیسر ترا یک نامے وش اَتک کنت 

"شیرو شیران (مٹی وارو) 

ھوٹل ءِ تہ ءَ ھر نیمگ ءَ سندھی کلاہ ءُ بروت اَنت من ءَ ھوٹل ءِ پُترگ ءِ وھد ءَ گھنٹی ءَ گُڈینتگ اَت گھنٹی ءَ پد منی کش ءَ نشتگیں زاگُل چمّیں سندھی یے ءِ بُرزیں توار ءَ "او مانڑی کڑینچ" کڑینچ چونیں شوکیں کارگالے بلے پہ سندھی آں ! اگاں اے گال مئے نیمگ ءَ کارمرد بوتیں کارگالے وَ پھکہ نہ بوتگ اَت نام گالے لازم بوتگ اَت!  کسے ءَ جُست بہ کُتیں کجا روگ ءَ ئے گڑا دِلبند مِکّ کتگ اَت ءُ گُشتگ اَت من کڑینچ ءَ روگ ءَ آں

ھیر ھوٹل ءِ  تہ ءَ کسانیں چاردہ اینچ ءِ ٹی وی ہے ھم ایر اود ءَ ھندوستان ءِ تامُرے چالو اِنت اے ندارگ سیلی اِنت کسے نان ورگ ءَ اِنت شر چاہ ورگ ءَ اِنت شر کوپے شودگ ءَ اِنت یا وتی وارتگیں سُبارِگ ءِ زرّاں دیگ ءَ اِنت شرّ بلے چمّ ئےِ ٹی وی ءَ سکّ اَنت مجال نہ اِنت کہ چم اش دگہ نیمگے چارگ ءِ گُستاخی ءَ بکن اَنت ءُ ٹی وی ھم مگرور گِندگ کیت گجرہ جتگیں پوشاکے ءِ تل ءَ اِنت  کسے اگاں چمّاں تُـــوت (نیم بند) بہ کنت بچار ایت پورا کسانیں گْوسکے بلے سلامتی ءَ بچاری ئے ٹی وی یے امیتابھ بچن ءِ تامرے چالُو اِنت ءُ دُرس ئےِ چارگ اَنت.

سندھ ءِ شھر شھر، کُچّگ کُچّگ ءَ ترا کسان مزنیں ھوٹلاں ھمے مُچّی گِندگ ءَ کیت  پراگ ءِ نبشتہ کار  رائنر ماریہ رلکے 

مُلک رُوم ءِ بابت ءَ نویس اِیت کہ "  اے ملک بندات ءَ ترا سک ابیتک کنت تو وتا درآمدے سما کن ئے " رلکے گُش ایت " روم ءَ گْوست ءِ بار بڈّ ءَ اِنت ھچبر ایرئےِ نہ کنت من ھمے سرپد باں اے گرانیں بار ءَ ھاسیں مکسد نیست بلے اٹلی ترا سھتے اوں چہ وتی سِھر ءَ سِدگ ءَ نئیل ایت"

 رلکے زندگ بوتیں سندھ ءَ بہ شُتیں آئی ءَ چو اٹلی ءَ سندھ ءِ سِھر ءِ گپ لازم جتگ اَت سندھ ترا یک سھتے اوں ابیتک بوھگ ءَ نئیل ایت بلے شرت ایش کہ تئی سر سندھ ءَ نان ءُ چاھی ھوٹلے ءَ لازم بہ کپ ایت، ترا کلاہ ءُ بروت وش اَتک بہ کن اَنت ءُ ھوٹل ءَ گْوسک رنگیں ٹی وی یے ءَ امیتابھ بچن ءِ تامرے چلگ ءَ بہ بیت...

گاڑی پدا راہ ءَ اِنت ھور ءَ داشتگ بلے کشور گُشگ ءَ اِنت