کسہ انسان ءِ گوستانک ءَ چتور بدل کنت ؟

کسہ انسان ءِ گوستانک ءَ چتور بدل کنت ؟ 

بی بی سی اردو | رجانک  شاہ ابن شین 

یونان ءِ بادشاہ الیگزینڈر ءَ دنیا مزن شانیں واجہ سکندر گش ایت ایشی ءِ یک سوَبے ایش اِنت کہ آئی ءَ گونڈیں مُدّتے ءِ تہ ءَ یورپ ءَ بگر داں ایشیا ءَ وتی داراھی برجم داشت

سی ءُ دو سال ءِ اُمبر ءَ چہ مَرگ ءَ پیش سنکدر ءَ یونان ءِ کرنی ایں بدواہ پارِس لاچار کت کہ آ بہ جُک ایت دودمانانی بُنجاہ ءِ نام ءَ نامداریں میان رودراتک ءِ سرا آئی ءَ داراھی کت 

یک روچے ارسطو ءَ سکندر ءَ را یک کسہ یے گُشت اے کسہ راست ءُ گمان ءِ ھمگرنچیں کسہ یے ات.  کسہ ات ٹرائے ءِ جنگ ءِ اے ھمے جنگ ءِ کسہ اِنت کہ ایشی ءِ زکر یونان ءِ لچہ کار اومر ءَ وتی نامی ایں لچہ ایلیڈ ءِ تہ ءَ کتگ اے کسہ انسان ءِ جوزہ آنی مجگ اِنت ایشی ءِ تہ ءَ مھر مان کینگ مان اے یک نیمگے جنگی داستانے ھم ءُ ایشی ءِ تہ ءَ مردمانی سوب مندی ءُ بے سوبی ءَ بگر درائیں کار ءُ کِردانی زکر مان اَنت 

ایلیڈ یک انچیں داستانی لچہ یے ایشی ءِ اش کنگ ءَ پد سکندر ءِ تہ ءَ باج ءِ جوزہ ءَ ردوم زُرت آئی ءَ چہ ٹرائے ءِ جنگ ءِ کسہ ءَ یونان ءِ بادشاھانی یک مشتی ءُ جنگی رِپک دربُرت اَنت ءُ پدا سرجمیں دنیا کَٹ ات .

کسہ مئے دود ءُ ربیدگانی تہ ءَ ھوار بنت 

رودراتک ءَ بگر داں رو ایرُشت ءَ ءُ گوریچ گوراں بگر داں زربار ءَ درا دنیا ءِ ھر پاسو ءَ ءُ انسان ءِ دودمان ءِ دیمروی ءِ ھر باریگ ءَ کسہ گوشی بوتگ

کسانی ءَ ما چہ وتی بلُک ءُ پیرُکاں وڑ وڑیں کسہ اش کتگ آھانی تہ ءَ بادشاہ بوتگ بی بی ءُ جن ءُ پری ءُ جاتیگ بوتگ الپ لیلا ءِ کسہ بہ بیت کہ ھپتیں گُھارانی کسہ 

الی بابا ءِ چِلّیں دُز بہ بنت کہ آ دگہ.  ھر کسہ ءِ اش کنگ ءَ پد مارا چیزے دربرگ ءَ رس ایت . کسہ ءِ گالانی کُمک ءَ گوستگیں باریگانی یک سرجمیں ندارگے انچو پیشدارگ بیت کہ ھما زمانگ ءِ ربیدگ،  ھیل ءُ آ دگہ وڑ پیمانی بابت ءَ سرپدی یے بہ رس ایت . کسہ گوشی ءِ دود ھر زمانگ ءَ برجاہ بوتگ!  اربانی ملکاں الپ لیلا ءِ کسہ بوتگ اَنت گڑا ھندوستان ءَ پنچ تنتر ، مھابھارت ءُ راماین ءِ وڑیں جنگی داستان بوتگ اَنت ءُ روچ ء مرچی برجاہ اَنت کسہ تھنا کتابانی زیبائی ءِ ھاترا نہ اَنت بلکیں انسان ءِ زند ءِ تہ ءَ ھم ایشانی یک ارزشتے ھست اِنت 

ارسطو ءَ گشتگ ات کسہ ءُ لبزانک تھنا انسان ءِ وشکامی ءِ ھاترا نہ اَنت بلکیں مردم گری ءُ آ دگہ راہ ءُ راھبندانی سوج دیگ ءَ ایشانی یک کِردے ھست ایشی ءَ ابید لچہ کاری انسان ءِ جوزھانی درشان اِنت ءُ مارا گھتریں مردمے جوڑ کنگ ءِ ھاترا وتی کرد ءَ پیلو کنت 

اے وڑ نہ اِنت کہ دنیاءِ تہ ءَ لبزانک ءِ بندات چہ جنگی داستاناں یا ھما زمانگ ءِ بادشاھانی باج ءُ پروش ءِ کسہ آں گوں بوتگ باز جاگہ ءَ لبزانک ءِ بندات چہ لچّہ آں بوتگ

مسال چین ءِ لبزانک ءِ بندات ءَ لچّہ گوشگ ءِ کار تھنا لچہ کاراں گوں بندوک نہ بوتگ بلکیں مزنیں اُگدہ آنی ھاترا لچہ گوشگ ءِ چکاس دیگی بوتگ ءُ سرکار ءِ درائیں اگدہ دار ءُ باسکانی ھاترا لچہ گوشگ ءُ لچہ ءِ پھمگ ءِ سِنچ ھژدری ایں لوٹے بوتگ

چد ءُ رند جاپان ءَ ھم چہ چین ءَ سان زرت ءُ اود ءَ ھم لچہ کاری ءَ مزن شانی ءُ سوب مندی رست 

کوھن ایں باریگاں ماں جاپان ءَ زالبولانی لبزانک وانگ ءِ سرا بندش ات ءُ آ چہ لبزانک وانگ ءَ مکن کنگ بوت اَنت بلے درائیں بندشاں ابید دنیا ءِ اولی گِدار ٹیل آف گینجی جاپان ءِ مُراساکی شیکیبو نامیں یک زالبولے ءَ نویس ات 

مراساکی مدام وتی برات ءِ کش ءَ نشت آئی ءَ ونت ءُ ایشی ءَ نویسگ دربرت پدا آئی ءَ ھزار تاکدیم ءِ یک انچیں گِدارے نویس ات کہ آ سرجمیں دنیا ءَ نام دار بوت اے گدار ءَ را کلاسیک لبزانک جوڑ کنگ ءِ ھاترا آئی ءَ ایشی ءِ تہ ءَ وتی ھشت سد لچہ ھم مان کت 

لبزانک یا کسّہ آنی دنیا ءِ تہ ءَ اربانی ملکاں آشوب آورت

ارباں چہ چین ءَ کاگد جوڑ کنگ ءِ ھنر دربرت ءُ پدا ایشی ءَ را یک سوب مندیں بیپارے ءِ وڑا ردوم دات کاگد ءِ جوڑ بوھگ ءَ پیسر کسہ پُشت در پُشت زبانی لبزانک ءِ دروشم ءَ سر بوھگ ءَ ات وھدے انسان ءَ نویسگ دربرت گڑا آئی ءَ وتی ھیالانی درشان ءِ ھاترا درچکانی کُچل ءُ تاک کارمرد کت اَنت سنگانی سرا نبشتہ کت کاگد کہ اتک گڑا ارباں الپ لیلا ءِ کسہ آنی نویسگ بندات کت ءُ درس یک جاہ کت اَنت 

کسہ بہ بنت کہ لچہ یا جنگی داستان اے درس انسان ءِ گوستانک ءِ گچین ایں بھر اَنت بھشت ءُ دوزہ ءِ لیکہ دینی یے بلے اٹلی ءِ لچہ کار دانتے ءَ ایشی ءَ وتی کتاب ڈیوائن کامیڈی ءِ تہ ءَ زیبائیں رنگے ءَ درشانتگ.

کاگد ءِ جوڑ بوھگ ءَ پد کاگد ءَ لبزانک پھاز ات ءُ یکجا کت

پدا چاپکاری ءِ آسراتی ءَ لبزانک لوگ لوگ ءَ سر کت ءُ ایشی ءَ گدار نویسگ ءِ رواج ودّینت.  ھاس پہ زالبولاں سک باز گدار نویسگ بندات بوت

بازیں ملکاں وتی وتواکی ءُ آجوئی ءِ ھاترا نوکیں گدار کامرد کت اسل ءَ راجکاری آجوئی ءِ ھاترا دود ءُ ربیدگی آجوئی ھژدری اِنت ءُ گدار ھما تھر اِنت کہ ایشی ءِ آزاتی ءَ دنت . دنیا ءَ دیمروی کت چیزاں دیمروی کت ٹیکنالوجی اتک مردمانی سرا لبزانک ءِ سرا دز رس ود اِت. وانگ ءُ زانگ گیش بوت. انچو وانوک گیش بوھان بوت اَنت گڑا کسہ نویسوک ھم گیش بوھان بوت اَنت مرچی جتا جتائیں بُن گپانی سرا کسہ وانوک ءُ نویسوک ھردوئیں مردم ھست 

اے دور ءَ دامگ اتکگ کسانیں تِرکے ءَ سرجمیں دنیا ءِ لبزانک مئے دیم ءَ بیت اے آسراتی ءَ کتابانی چاپکاری ءِ سرا یک بدیں سانے دور دات بلے چریشی ءَ کسہ گشوگ ءُ اشکنوکانی تہ ءَ ھچ وڑیں کمی یے نہ یتکگ

اے دور ءَ بہ گندئے کسے ءَ کتابے دست ءَ بہ بیت یا تو آئی ءَ کتابے ءِ وانگ ءَ بہ گندئے ... بلے مرچی گیشتر مردم ءَ انچیں آسراتی ھست اَنت کہ آ ھر وھد بہ لوٹ اَنت ونت ءُ نبشتہ کت یا گوشداشت کن اَنت 

اے دور ءَ ما چو گشت کن ایں نوں ما ڈیجیٹل دنیا ءِ تہ ءَ لبزانک نویسگ ءِ یک نوکیں کارے بُنگیج کنگ ءَ ایں زمانگ ءُ باریگ بِلّے بدل بوتگ اَنت. کسہ آنی بادشاہ ءُ بی بی بدل بوتگ بلے کسہ ءِ زمانگ انگت برجاہ اِنت ءُ ایشی ءَ مئے دلانی تہ ءَ جاگہ کتگ.

(بی بی سی اردو ءَ اے نبشتانک دو ھزار ھژدہ ءَ شنگ بوتگ)