گْوادر ءَ ھک بہ دئے زرمبشت ءِ نزور تریں زالبولانی روانک
جاوید بلوچ
اے کساس 2014 یا پانزدہ ءِ گپ بیت کہ گْوادر پریس کلب ءِ دیم ءَ دریاوردانی ھک ءُ گجوھانی بگیری ءَ بوتگیں زھرشانی ءَ یک پیر زالے پہ بزگی وتی گُژن ءُ درداں الھان کنگ ءَ اَت کہ آیانی زِر چون گوں بے رھمی ءَ سنٹ کنگ بئیگ ءَ اِنت، آ وتی تران ءِ تہ ءَ گُشیت کہ "ما نادراہ بئیں وتی گُڈی ساھتاں کراچی ءَ ڈاکٹر ءَ گُش انت کہ مارا مئے مرگ ءَ لھتیں روچ پیسر ھال بہ دئے دانکہ ما گْوادر ءَ برگ بہ بئیں ءُ ھمود ءَ زِر ءِ چولانی توار ءِ اِشکُنگ ءَ گوں مئے ساہ بہ سِد ایت" اے تران یک مید ایں بلوچے ءِ گوں بلوچ زِر ءَ بندوکیں مھر ءُ گنجیں بلوچ زِر ءِ بزگی ءَ درشان کنگ ءَ اَت۔ اشی ءَ باز پیسر ءُ رند ھم گْوادر ءِ تہ ءَ زالبول وڑے ناں وڑے ءَ زھرشانی ءُ چاگردی جیڑیانی دیم ءَ آرگ ءَ گون بوتگ انت۔
آپ ءُ لین ءِ جیڑیاں بگر داں بلوچ ءِ راجی جھد ءَ، باپار ءُ ازم ءِ پڑ ءَ ھم تْیاب دپ ءِ زالبول کمو یا باز بلے گون بوتگ انت۔ بلے اے زالبول سرکاری سْیاسی پارٹیاں ایوک پہ وتی مخصوصیں نشستانی پُر کنگ ءَ جاگہ داتگ انت، ءُ ھما زالبول گچین کُتگ انت کہ آ ایوک لنکُک جنوک بہ بنت۔ بی ایس او ءِ بلوچ راجی جھد ءَ مستریں کار ھمیش بوتگ کہ آئی ءَ بلوچ ءِ جھد ءِ پڑ ءَ آشوب چہ وتی لوگاں بندات کُتگ۔ زالبولانی تہ ءَ راجی زانت ءُ پگر ودّینتگ۔ مرچی ھمے زالبول انسانی اُگبالانی جھد، بیگواھیں بلوچانی آجوھی ءُ بلوچ سْیاست ءِ پڑ ءَ اولی سرپ ءَ اَنت۔
دومی نیمگ ءَ سرکاری سردار ءُ ٹیکھداراں وتی سرکل ءِ اسٹیٹ ایجنسی والا، ٹیکھدار، لینڈ مافیا ءُ ڈرگ مافیا جاگہ داتگ انت۔ زالبول وتی جاگہ ءَ بلکیں وتی دست چیریں نودربر گلّانی تہ ءَ نودربر ھم وتی سْیاسی چاپلوسکی ءَ کارمرز کتگ انت ءُ انگت انچش انت، بلکیں لس ورکر ءِ بستار ھم یک پلیٹے بٹ ءُ اوگام جنگ ءَ ابید دگہ ھچ نہ اِنت۔ وھدیکہ ایم پی اے، ایم این اے ءُ سینئٹرے ءِ زالبولانی سیٹانی سر ءَ ھم اِے وتی لوگ ءِ زالبولاں کار انت یا سیٹاں بھا کنگ ءَ اَنت۔
چُشکہ کونسلرے ءِ مراعات ءُ مڈی اینچو نہ انت پمشکہ اے سردار، ٹیکھدار، میر ءُ سوداگر وتی وانندگیں جنک، جنین ءُ لوگ ءِ زالبولاں بھ نیار انت۔ بلے مردینیں کونسلرے ءِ واستہ ھم وتی داشتگیں نودربر گلّاں چہ پارگ بوتگیں وانندگیں اوگام جنوکیں چاپلوسکیں ورنایانی بدل ءَ ھم میتگ ءِ انگوٹھا چاپیں یک کھدہ ءُ کسانیں ٹیکھداروکے کار اَنت۔۔۔۔ چُش ھمے پارلیمنٹ پرستیں سْیاست داں برز ءَ بگر داں جھل ءَ بْیا پولنگ اِنت۔
گْوادر ءِ جیڑہ ھم بلوچستان ءِ آ دگہ ھنداں چی باز جُتا نہ انت۔ ادا ھم مسکت ءِ والی ءِ واپادار داں پاکستان ءِ فوجی ڈکٹیراں یکیں طبقہ انت کہ سْیاست کنگ ءَ اِنت، پارٹیانی نام دیگر دیگر انت بلے دُرس اسٹیٹ ایجنسی والا زمین ءِ سوداگر، ٹیکھدار، کھدہ، میر ءُ مُلا وت ماں وت یک اَنت۔ اِشانی بگیری ءَ مستریں جھدکار ھما ورناہ کہ آیاں بندات ءَ گْوادر ءِ زمینانی سوداگری ءِ بگیری ءَ توار چست کُتگ اَت آ دُرس یک یک ءَ بیگواہ کنگ، کُشگ یا بے توار کنگ بوت انت۔
میان ءَ جام سرکار ءِ بنداتی روچاں نیشنل پارٹی ءَ گْوادر ءَ ٹرالرنگ ءِ بگیری ءَ کسانیں زرمبشتے بنا کُت گڑا زالبولاں روانکے ءِ دروشم ءَ سی پیک دگ ءِ کار داشت، گْوادر ءِ دگّانی سر ءَ زھرشانی کُت، یک درکومیں سرکاری افیسرے ءَ دگانی سر ءَ نیشنل پارٹی ءِ مزن عمریں ءُ نامی ایں راھشونانی گورجیگ گپت انت۔ اے عمل ءِ بگیری ءَ لس مردماں ابید چہ اشیی ءَ کہ نیشنل پارٹی ءِ دوسال ءُ نیم ءِ سرکار ءَ آ سک بنّام اِت اَنت بلے انگت مردم ڈن ءَ دراتک آں، گْوادر ءِ جاور کہ کمو نگیگ بوت انت گڑا نیشنل پارٹی ءَ اے زھرشانیاں چہ اظہار لاتعلقی کُت۔
ھک بہ دئے زرمبشت ءِ بندات ھم مُلا بند ءِ زالبولاں کُت بلے اشیی ءَ نام مولانا ھدایت الرحمن بلوچ ءَ دات۔ مُلا بند ءِ دریاورد یک روچے زِر ءَ رو انت، وھدے بیگاہ ءَ واتر کاینت گڑا تْیاب ءِ لمب ءَ میرین سیکیوریٹی والا یاں یک چَرے گوتکگ ءُ آیانی کاھک ڈن ءَ دراتک نہ کناں۔۔۔ اے زوراکی ءِ بگیری ءَ زالبول زھرشانی کنان ءَ جی ٹی گیٹ ءِ دپ ءَ نندانک دینت۔ اے زالبولاں دگہ دزگروک نہ بیت ءُ مولانا کیت بس پد ءَ اے تحریک بنا بیت۔۔۔۔۔۔ دانکہ سراج الحق نندانک ءَ کیت ءُ پد ءَ اے زرمبشت ءِ سر ءَ مھلوک جماعت اسلامی ءِ قبضہ کنگ ءِ بابت زھرشانی کنت۔
ھئیر اے زرمبشت ءِ تہ ءَ ھواریں ورنائیں شاعر، ازمکار، وانندئیں ورناہ ءُ قوم پرستیں سروک راج ءَ سدکّی دینت کہ اے زرمبشت دریاوردانی زرمبشت انت ناکہ جماعت اسلامی ءِ ۔
اے دراجیں مُدتے ءَ پد بیت کہ بی ایس او ءَ پد کساس دہ دوازدہ سال ءَ پد گْوادر ءِ دمکانی تہ ءَ لینڈ مافیا، میر ءُ ٹیکھدار ءُ اسٹیٹ ایجنسی والیانی دست ءَ چی سْیاست درکیت ءُ لس دریاورد ءُ زالبول ھوار بنت۔
زالبولانی دو مزنیں روانک در کیت، ھزارانی کساس زالبول بھر زور انت۔ اشانی تہ ءَ کالج ءُ یونیورسٹیانی جنک، بیگواھیں مردمانی کھول ءُ بلوچ راجی جھد ءَ رنگ ءُ سان زُرتگیں جَنِک دیم دیم ءَ بنت، نہ زاناں پہ زانت یا انّاں بلے ھک بہ دئے زرمبشت ءِ نیم ءَ ھردیں کہ زالبولانی روانک ءِ پوسٹر ءُ اکس جوڑ کنگ بنت گڑا آیانی سر ءَ بلوچ زالبولانی دروشم ءِ چادر ءُ دبوکہ ءِ بدل ءَ جماعت اسلامی ءِ عورت مارچ ءِ اکس جنگ بنت بلے روانک ءِ روچ ءَ کہ زالبول کاینت ابید چہ درزنے جماعت اسلامی والا جنیناں آ دگہ ھزاراں جنین وت ءَ بانک کریمہ ءُ سمی ءِ رنگ ءَ دیم ءَ کار انت، ءُ اے بلوچ زالبول ھمے ھک بہ دئے زرمبشت ءِ لوگانی زالبولاں۔۔۔۔ ھمے ورنایانی گُھار، لوگ بانک یا مات انت، بلکیں مولانا ھدایت الرحمٰن ءِ جند ءِ مکھیں مات کہ دیم دیم ءَ اِنت آ ھم گوں بلوچی دروشم ءَ انت ناکہ جماعت اسلامی ءِ عورت مارچ ءَ۔ بلکیں اگاں اشانی جاگہ یاں میر، ٹیکھدار، اسٹیٹ ایجنسی والا یک زالبول روانکے بہ کش اَنت، اول وَ اشانی جند ءِ لوگ ءِ زالبول گون نہ بنت چیاکہ آیاں ناں کدی بے آپی ءَ آنڈو سر ءَ کُتگ، ناکہ پہ گُژن وتی چُک گریوگ ءَ دیستگ انت۔ دومی اگاں بْیا انت ھم فُل جماعت اسلامی والا اسکارپ ءُ پوشاک ءَ بنت دانک ءِ آیاں روچ مہ سوچ ایت۔
مرچیگیں گْوادر ءَ زالبولانی روانک ھک بہ دئے زرمبشت ءِ گْوَستگیں روانکاں چہ نزور تریں روانکے بوتگ کہ اشیی ءِ تہ ءَ مردمانی کساس گْوَستگیں دو ایں روانکاں چہ کمتر بوتگ۔ اشیی ءِ بازیں سبب بوت کن انت بلے یک مستریں سببے جماعت اسلامی ءِ سینئٹر مشتاق ءِ بھر زورگ بوت کنت، پمشکہ مردمانی کساس ءِ گیشتر پیش دارگ ءُ روانک ءِ دراجتر کنگ ءَ اے روانک ءِ راہ مٹ کنگ بوتگ اَت ءُ پدی زِر شھدگ ءِ پراہ ءُ شاھگانیں دگ ءِ بدل ءَ موسیٰ موڑ ءِ تنکیں دگ ءَ چی شھید لالا ھمید سے راھی ءَ برگ بوتگ۔
اشیی ءِ نزور بوھگ ءِ دگہ یک سببے اے ھم بوت کنت کہ "ھک بہ دئے زرمبشت" ءَ نی وتی عھدگ گپتگ انت بلے انگت مظلومیت ءِ کُکار ءُ زاری ءَ کنگ ءَ اِنت وھدے کہ نی ڈیلیور کنگ، کنگ ءُ پیشدارگ ءِ وھد اِنت۔ مولانا ھدایت الرحمٰن یک لیڈرے بلے ناں گچین بوتگیں کونسلرے ءُ ناں کہ آئی ءِ سْیاست ءِ سر ءَ بندش جَنگ بوتگ۔ ناں آ یک انچیں زندانے ءَ بند اِنت کہ اود ءَ آئی ءِ سر ءَ جسمانی زوراکی کنگ بئیگ ءَ اِنت۔ آ یک سْیاسی بندیگے، وتی پیشی یاں روگ ءَ اِنت، عدالت ءَ پیش بوھگ ءَ اِنت، آ وت ھمے راھبند ءُ کانود ءِ منوک انت ءُ درستیں چیز ھمے راھبندانی رِد ءَ بئیگ ءَ اَنت ءُ اے بندیگ بوھگ آئی ءِ سْیاست ءَ گیشتر نامدار ءُ پاپولر بوھگ ءَ کمک کنگ ءَ اِنت۔ پمشکہ مردم نی کار ءُ ھما گپانی سر ءَ تیاری گندگ لوٹ انت پیسر ءَ "ھک بہ دئے زرمبشت ءَ'' کُتگ انت ناکہ روانک ءِ سر ءَ روانک۔
No comments:
Post a Comment