مئے درسی کتابانی دو مزنیں عیب

مئے درسی کتابانی دو مزنیں عیب

                  وھاب مجید

ما یک انچیں مُلکے ءَ جاہ منند اِیں کہ اِشی ءِ واکدارانی گوشگ اِنت کہ "مئے رودرتکی نیمگ ءَ دُژمنیں ملک ءِ پندلانی سبب ءَ مارا دُرستاں چہ ساری وتی جِند ءُ زِند رکینگی اِنت۔ وت ءَ سیکورٹی دیگی اِنت۔ وانگ ءُ زانگ ، جان سلامتی، لوگ ءُ زند ءِ ایندگہ بُنکّی آسراتی رندا کاینت"۔ ما اے پگر ءِ واجہ اِیں۔ پمشکا تو گِندئے کہ تیوگیں دُنیا ءِ مُلکانی تہ ءَ وانگ ءُ زانگ، جان سلامتی، روزگار ءُ وشھالیں زندے ءِ ھساب ءَ ما چہ دُرستاں نِزور تریں مُلک ایں ءُ افریقہ ءِ ہمشامیں مُلکانی صف (سرپ) ءَ اوشتاتگیں۔ 

بلے ہبکّہی گپ اِش اِنت کہ ہما واکدار کہ ہپتاد ءُ پنچ سال اِنت سیکورٹی ءُ دُژمن ءِ پندلانی کِسّہاں آرگ ءَ اَنت ءُ لس مھلوک ءَ سادگی ءُ گیرت ءِ زند گوازینگ ءِ درس دیگ ءَ اَنت آھانی وتی زند وشھال ءُ آباد اَنت۔ ہمے واجہ کارانی دومی لوگ دبئی ءُ کاروبار امریکہ ءُ یورپءِ تہ ءَ اِنت۔ بلے لس مھلوک ءَ گیرت ءُ ڈکّیں نان ءِ ورگ ءِ سِکین ءَ دینت۔ 

اے وڑیں جاورھالانی تہ ءَ کہ ہمُک سال تئی بجٹ ءِ یک مزنیں تَکے آئی ایم ایف ءِ وامانی دیم ءَ روت، دومی مزنیں بھرے سیکورٹی ءُ سیمی نان ڈیولپمنٹ سیکٹر ءَ روت گُڈا لس مھلوک ءِ وانگ ءُ زانگ، جان سلامتی ءُ روزگار ءِ آسراتی وتی جاگہ ءَ آھاں دو وھد ءِ ڈکّیں نان ءِ رسگ گران کپگ ءَ اِنت۔ 

اے وڑیں نگیگیں ملکی مالی ءُ سیاسی جاورھالانی تہ ءَ وھدے کہ ما وتی وانگ ءُ زانگی جاور ءُ وانگجاہانی اڈ ءُ جنجالاں چاریں تہ گِندیں کہ وانگ ءُ زانگ ءِ ھساب ءَ ہم ما چہ دُرستاں پشت کپتگیں مُلکانی تہ ءَ ھوار اِنت چُش کہ افریقہ ءِ بازیں مُلک، اوگانستان ءُ ما دُنیا ءِ ہما ملک اِنت کہ مئے گورا کروڑانی ھساب ءَ اسکول ءِ عمر ءِ چُک اسکولاں چہ ڈنّ اَنت پرچا کہ آھاں پہ اُستاد ءُ اسکول ءِ آسراتی نیست اَنت۔ 

چوناہا مئے وانگجاہانی وانگ ءُ زانگ ءِ جیڑہ سک باز اَنت چُش کہ وانگ ءِ سرا جی ڈی پی ءِ ایوک دو درسد ہرچ بیگ، دو کروڑ ءَ چہ گیش چُکانی اسکول ءَ چہ ڈن بیگ، وانگجاہ ءُ ماسٹرانی کمی، کوچگاں جنکّیں چُکانی واستا پراہمری ءَ چہ پد اسکول ءِ نہ بیگ، کریکولم ءِ آوٹ ڈیٹڈ بوھگ، پراہمری ءَ ماتی زبان ءَ نہ وانینگ، ٹیچر ٹریننگ ءِ نہ بوھگ، اے دُرا ہما جیڑہ اَنت کہ ایشانی سبب ءَ مئے چاگرد ءَ وانگ ءُ زانگ ءِ عمل اوشت ءِ آماچ ءُ آوٹ ڈیٹڈ اِنت۔ پمشکا ما پہ وتی چاگرد ءُ پہ دُنیا ءَ جوانیں ساہنسدان، ڈاکٹر، انجینیر، آئی ٹی پروفیشنل ءُ سوشل ساہنٹسٹ پیداک کنگ ءَ نہ اِیں۔ 

اگاں ما وتی درسی کتابانی دُراھیں نِزوری ءُ عیباں یک کِرّا ایر بکنیں ءُ ایوک دو مستریں جیڑہانی بابتءَ بہ جیڑیں گُڑا آھانی تہ ءَ یکّے "روٹ لرننگ" اِنت۔ بزاں کہ اسکولی چُکاں سبک زبانی ءُ پہ دل یات کناہینگ ءُ دومی اِش اِنت کہ آھاں ہرچی وانینگ بیت اِنت آئی ءِ سرا المّ سِتکّ ءُ ایمان آرگی اِنت بزاں کہ "ڈوگما" منّگی اِنت۔ 

مئے وانگجاہ ءُ درسی کتابانی یک مزنیں عیبے اِش اِنت کہ سبکّ ءُ چکاّس ءِ بنیاد زبانی یات کنگ ءُ حفظ کنگ ءِ سرا ایر اِنت۔ اِدا چُکّءِ سرپدی دیگ یا "کنسپچول انڈراسٹینڈنگ" گار اِنت۔ ءُ مئے واکدار ءُ واجہ ہم ہمے لوٹ اَنت کہ ہمُک سال وانگجاہاں چہ انچیں نودربر ءُ ورنا دربیا اَنت کہ آ یک ھاسیں پِگرے ءَ گوں بندوک بہ بنت۔ آ یک نیمگے چات ءِ پُگل بہ بنت ءُ دومی نیمگ ءَ مِٹّو بہ بنت پرچا کہ چات ءِ پُگل ءِ ھیال ءَ تیوگیں جہان ایوک آئی ءِ چات اِنت ءُ مِٹّو ایوک دومی ءِ گوشتگیناں گوشیت۔ 

دومی عیب نیچرل ءُ سوشل ساہنس ءِ گیشتریں درسی کتابانی تہ ءَ یک ھاسیّں سِتکّ ءُ پِگرے ھوار کنگ اِنت کہ آ ہم ترا فری تھینکنگ  ءُ کریٹکل تھینکنگ  ءِ اجازت ءَ نہ دنت پمشکا ما گِندیں کہ مئے کالج ءُ یونیورسٹیانی وانندہ ءُ چاگرد ءِ ناوانندہانی تہ ءَ ھاسیں تپاوت نیست وھدے کہ لہتے چیزانی سرا چماں بند کنگ ءُ بیسہ کنگ ءِ گپ کیت اِنت توری ہچ وڑیں ثبوت ءُ ریشنلیں گپّے مہ بیت اِنت۔ پہ درور، گوستگیں کورونا ءِ سال ءَ چاگرد ءِ ناوانندہ وتی جاگہ ءَ مئے گیشتریں وانندہاں ہم باور نہ کُت کہ کورونا ءِ وڑیں نادراھی یے است۔ سوشل میڈیا ءَ مشہور اَت کہ کورونا ہچ وڑیں نادراھی یے نہ اِنت ۔ اے مسلمانانی ھلاپ ءَ امریکی ءُ یہودی پندلے۔ ادا چہ پدّر بیت کہ مئے وانگجاہ ءُ درسی کتاباں مئے نودربر ءُ وانندہانی صحت ءِ سرا ہچ وڑیں اثرے دور نہ داتگ۔ 

ما وتی حرکتاں چہ وت ءَ ایسوپ ءِ کتب ءَ رسینتگ۔ بلے دُنیا ءَ اے سبک دیر اِنت در بُرتگ کہ تنا وھدی تو وتی وانگجاہانی تہ ءَ نودربراں فری تھینکنگ ءُ نیچرل ءُ سوشل سائنس ءِ ہمُکّ سرھال ءِ سر ءَ ہر وڑیں باوست ءُ جُست ءِ اجازت نہ دئے گُڑا ناں تو مزنیں دماگ پیداک کُت کن ئے ءُ ناں کہ دیمروہی ءُ راستی ءَ سر بیت کن ئے۔