تاکبند ملگزار ءِ سر ءَ چمشانکے

تاکبند ملگزار ءِ سر ءَ چمشناکے

نبشتہ کار: اِزت عارف

 تاکبند ملگزار بلوچی زُبان ءِ تاکبنداں چہ یکے ءُ اے تاکبند روبار ءُ روبار ءِ کش کِر ءِ لبزانکی سنگتانی جُہد ءَ چہ چاپ ءُ شنگ کنگ بُوتگ۔ تاکبند ملگزار ءِ اولی تاک سال دوہزار پانزده ءَ چاپ ءُ شنگ کنگ بیتگ کہ آئی ءِ شونکار واجہ ستار کریم اِنت ءُ تاکبند ءِ شونگال ءِ تہ ءَ نبشتہ انت کہ ہر راج ءِ پجار آئی ءِ زُبان ءُ دود ءُ ربیدگ ءَ اَنت اگاں یک راجے ءِ زُبان گار ءُ بیگواه بہ بیت گُڑا آ راج نہ مان ایت ءُ آ راج بیگواه بیت۔

 

 وتی زُبان ءِ هزمت کنگ ہر بلوچ ءِ سرا ءَ پرز اِنت ءُ مئے هاکم ہچبر وش نہ اَنت کہ مئے زُبان دیمروی بہ کنت پمشکا وانگ جاه یاں وانیگ بوہگ ءَ نہ اِنت۔ اے بلوچ ءِ وتی جُہد انت کہ وتی زُبان ئے گار ءُ بیگواه بوہگ ءَ نہ اِشتگ اِت۔ ھمے وڈا تاکبند ملگزار ءِ لڑ ءِ تہا بلوچی زُبان ءِ مزن نامیں شائرانی شعر  ءُ آزمانک ءُ نبشتاک زورگ بوتگ انت۔ تہنا مزنیں شائرانی ناں بلکیں نودربرانی هم آزمانک ءُ نبشتاک ءُ شعر زورگ بوتگ انت۔ اے پہ مئے وڈیں نودربراں مزنیں دلبڈی یے۔ 

 

تاکبند ملگزار ءِ لڑ ءِ تہا تژن ءُ بچکند ءُ رجانک هم هوار گیجگ بوتگ کہ آئی تہا بلوچی زُبان ءِ جوانیں رجانکار برکها بلوچ ، امین ضامن، عارف محمود ءُ عبدالیم امبر ءِ رجانک هوار اَنت۔ ھمے وڈا تژن ءُ بچکند ءِ تہا بلوچی زُبان ءِ نمیرانیں شائر واجہ اکرم صاحب حان ءِ تژن ءُ بچکند گوانکو زورگ بوتگ ءُ بلوچی زُبان ءِ زالبولیں نبشتہ کار شیما بخش ءِ تژن ءُ بچکند لال ءُ مرواردیں بتل هم زوراگ بوتگ انت کہ پہ راج ءِ زالبولاں مزنیں دلبڈی ءُ سیکنے۔

 تاکبند ملگزار ءِ لڑ ءِ تہا تہنا روبار ءِ نہ بلکیں مکران ءِ بازیں دمگانی نبشتہ کارانی نبشتاک زورگ بوتگ انت ءُ تاکبند ملگزار ءِ تہا زند ءِ بازیں جیڑہ ءُ جنجالانی سرا نبشتہ کُتگیں نبشتانک مان اَنت بلے بژنی گپ ایش اِنت کہ تاکبند ملگزار اولی تاک ءَ چہ پد ہما انت کہ اوشت ءِ آماچ انت۔ من نہ زاناں کہ سوب چی اِنت؟ بلے من گُڈ سر ءَ بس ھمے گُشاں کہ اے وڈیں تاکبند باید انت کہ اوشت ءِ آماچ مہ بنت بلیکیں ہر میتگ ءُ بازار ءَ چاپ ءُ شنگ کنگ بہ بنت پرچا کہ اے وڈیں تاکبند مئے نودبریں زھگاں گیش کُمک کن انت پہ گیش وتی ماتی زُبان ءِ دربرگ ءُ پہ وتی ماتی زُبان ءِ وانگ ءَ ہُب ءُ واهگ دار اَنت.