کتاب "تہزیبی نرگسیت"ءِ سرا چمشانکے

کتاب "تہزیبی نرگسیت"ءِ سرا چمشانکے

 وھاب مجید 

ڈاکٹر مبارک حیدر ءِ کتاب "تہزیبی نرگسیت" منی دوستیگیں کتابانی تہ ءَ یکّے۔ کتاب ءِ ہشتمی ایڈیشن 2020 ءَ چہ سانجھ پبلیکیشنز لاھور ءَ چھاپ بیتگ۔ اے کسانیں کتابے۔ کتاب ءِ بیست ءُ شش در ءُ 139 تاکدیم اَنت۔ اے کتاب پولیٹیکل ساہنس ءُ راجدپتر ءِ نودربر ءُ وانوکانی واستا مزنیں مڈّی یے۔ 

ڈاکٹر مبارک حیدر مُلک ءِ نامی ایں دانشور ءُ نبشتہ کارے۔ تہزیبی نرگسیت ءَ چہ ابید ہم آہی ءَ کتاب نویستگ۔ بلے اینچو گپ ءُ باوست کہ تہزیبی نرگسیت ءِ سرا مسلمانانی سنجیدہیں حلقہانی تہ ءَ بیگ ءَ اِنت آہی ءِ ہچ کتاب ءَ چُشیں ارزشت نہ رستگ۔ اے کتاب ءَ بازیں مردمانی ھیال ءُ لیکہ بدل کُتگ اَنت۔ نی آھاں مسلمانانی سیاسی ءُ چاگردی پدمنتگی گوں جزباتاں ناں بلکینہ راجدپتر ءِ ساہنسی ءُ معروضی چشمک ءَ گوں چارگ بِنا کُتگ۔ 

سادہیں لپزاں نرگسیت ءِ مانا وتی جِند ءَ گوں عشق کنگ ءُ وتی جِند ءِ دوست دارگ اِنت۔ وتی راج ءِ گوست ءَ ساڈاھگ ءُ آہی ءِ ہمُک َشّر ءُ شِرّ ءِ سرا پہر بندگ اِنت۔ 

تہزیب ربیدگ اِنت۔ ڈاکٹر مبارک حیدر ءِ مُتابک ءَ تہزیبی نرگسیت ءِ متلب اِش اِنت کہ بیست ءُ یکمی کرن ءِ مسلمان وتی پیرینانی گوست ءُ راہ ءُ راہ بند ءُ کُہنیں رسماں انچش دوست دارگ ءَ اَنت کہ آ یک رندے پدا وتی سداں سال ساریگیں کُہنیں سیاسی ءُ چاگردی نظام ءَ واتر کنگ لوٹ اَنت. 

تہزیبی نرگسیت ءِ بُنکّی ھیال ءُ تھیسس ہمیش اِنت کہ مرچیگیں عہدءِ مسلمان زند ءِ ہمُک پِڑ ءَ باز پَشت کپتگ اَنت بلے آ وتی پدمنتگی ءُ بے علمی ءِ زمہ وار روایربرکتی مُلکاں سرپد بنت۔ وتی عیباں نہ گِنداَنت. اے نگیگیں جاورھالانی تہ ءَ مسلمان روایربرکتی مُلکانی نوکیں عہد ءِ سیاسی، مالی ءُ چاگردی نظام ءَ چہ در برگ نہ لوٹیت بلکینہ آ وتی اڑ ءُ جنجالانی گِش ءُ گیوار ءَ وتی سدانی سال کُہنیں نظام ءَ سرپد بیت اِنت ءُ وتی گوست ءَ واتر کنگ لوٹیت۔ 

آہی ءِ ھیال ءَ منی پیرینانی دور وشھالیں دورے بیتگ ءُ اگاں ما یک رندے پدا ہما ربیتاں بِزیرایں ءُ وتءَ یکجاء ءُ یک مُشت بکنیں ءُ دُنیاءِ کافریں مُلکانی ھلاپءَ جہاد بکنیں گُڑا ما یک رندے پدا دُنیاءِ سرا ھاکمی کُت کنیں۔ 

ڈاکٹر مبارک حیدرءِ گوشگ اِنت کہ اے یوٹوپیاہی ھیالے۔ بیست ءُ یکمی کرنءِ وتی جیڑہانی گِش ءُ گیوارءَ وتی گوستءِ تہءَ شوہازگءَ آ "تہزیبی نرگسیت"ءِ نام دنت۔ 

مبارک حیدر گوشیت کہ سید قطب ءُ مولانا مودودیءِ وڑیں عالماں مسلمانانی دماگءَ اے گپ نادینتگ کہ آ روچ دیر نہ اِنت کہ اسلام تیوگیں دُنیاءِ دین بیت اِنت۔ آ سرپد بنت کہ اول سرا پاکستان ءُ اوگانستانءَ اسلامی ریاست ے جوڑ بیت اِنت۔ اے "خلافتِ اسلامیہ" دیمترا ایران ءُ عرب مُلکاں وتی تہءَ ھوار کنت۔ آہیءَ چہ پد انڈیا ءُ بنگلہ دیش ایر دست کنگ بنت۔ پدا چینءِ باریگ کیت اِنت. دیمترا یورپ ءُ امریکہءِ سرا قبضہ کنگ بیت اِنت۔ گُڑ سرا افریقہ ءُ آسٹریلیا ہم ہمے خلافتءِ بہر جوڑ بنت اِنت۔  اے وڑا تیوگیں دُنیاءَ "خلافتِ اسلامیہ"ءِ ھکومتی بیت اِنت۔ 

ڈاکٹر مبارک حیدرءِ گوشگ اِنت کہ چوناہا اے یک ھیالی کِسہّ ے گِندگءَ کیت اِنت بلے داعش، القاعدہ ءُ طالبانءِ وڑیں سِلاہ بندیں گلانی نیمگءَ چہ روایربرکتی مُلکانی تہءَ بم تراک ءُ جنگ کنگءِ پُشتءَ ہمے پِگر کارمرز بیگءَ اِنت. 

چوناہا تہزیبی نرگسیت یک کسانیں کتاب ے بلے مبارک حیدرءَ اے کسانیں کتاب ءِ تہءَ ہستیں عہدءِ مسلمان ءُ ھاس سِلاہ بندیں سیاسی ءُ مزہبی اسلامی گلانی پگر ءُ عملءِ سرا لہتے مزنیں سوال چِست کُتگ۔ مبارک حیدرءِ ھیالءَ مسلمانانی تہزیبی نرگسیت بزاں کہ بیست ءُ یکمی کرنءِ سیاسی ءُ چاگردی اڑ ءُ جنجالانی گِش ءُ گیوارءَ گوستءِ تہءَ شوہازگ ءُ تلوارءَ گوں مرچیگیں دُنیاءِ سرا قبضہ کنگءِ ھیال مرچیگیں مسلمانءِ مستریں مستریں ردی اِنت پرچا کہ سداں سال ساریگیں سیاسی ءُ چاگردی جاورھال ءُ مرچیگیں بیست ءُ یکمی کرنءِ لوٹانی تہءَ زمین ءُ آزمانءِ فرق اتکگ. ءُ دومی اِش کہ جہادی گلّ یورپ، امریکہ ءُ چینءِ وڑیں فوجی، معاشی ءُ جنگی ٹیکنالوجیءِ سُپر پاوراں چہ پیم گوں وتی سگار ءُ سِی تیریاں پروش دات کن اَنت؟ 

پمشکا مرچیگیں مسلمان جنگءِ فلسفہءَ یلہ بکنت. گوستگیں سے دھکّاں تو دیست کہ اے جنگانی تاوان گیشتر مسلمانءَ رستگ۔ تو گوں سی تیریءَ ڈرون ءُ میزاہلاں چون پروش دات کنے؟ وتی دیمروہیءَ پہ ہما بکن کہ دُنیاءِ ایندگہ غیر یوروپی مُلک کنگءَ اَنت چُش کہ چین، جاپان، کوریا ءُ لاطینی امریکہءِ لہتے مُلک کنگءَ اَنت۔ بزاں کہ دُرستاں چہ ساری وتءَ معاشی وشھالیءِ نیمگءَ برگ المّی اِنت۔ دُرستاں چہ پیش وتءَ نوکیں علم، ساہنس ءُ ریشنلیں پِگرءَ گوں ہمگرنچ بکن۔ روایربرکتی مُلکانی علمءَ چہ در بہ بر ءُ نوکیں دورءِ لوٹانی مُتابکءَ یک وشھالیں چاگردےءِ بُنیادءَ ایر بکن. بلے اِشیءَ پہ دُرستاں چہ پیش تہی پِگری بدلی اولی شرت اِنت۔