اسلام آباد ھم بلوچستان جوڑ بوان اِنت، اھوالکارانی بگیری ءَ 140 وئیل رپورٹ
پاکستان ءَ اھوالکارانی جَنَگ، تُرسینگ ءُ کُشگ ءِ کیسانی تہ ءَ 60 درسد گیشی بوتگ. پاکستان ءَ اھوالکاری ءِ سر ءَ کار کنوکیں گَلّ "فریڈم نٹ ورک" ءِ رِد ءَ اے سال ءَ اھوالکارانی جَنَگ، تُرسینگ ءُ کُشگ ءِ تہ ءَ شست درسد گیشی اتکگ ءُ 140 وئیل رپورٹ کنگ بوتگ۔
گْوَستگیں سال ءَ 86 وئیل بوتگ انت کہ اے سالی آیانی تہ ءَ شست درسد گیشی اتکگ۔ اے وئیلانی تہ ءَ اسلام آباد ءَ 56۔ پنجاپ ءَ 35 ءُ سندھ ءَ 23 کیس رپورٹ کنگ بوتگ۔
اے رِد ءَ رپورٹ ءِ رِد ءَ بلوچستان ءَ اے سالی اھوالکارانی بگیری ءَ 3 کیس رپورٹ کنگ بوتگ بلے چُشکہ بلوچستان پاکستانی میڈیا، اھوالکاری ادارگ ءُ جھان ءِ دیم ءَ یک تھاریں چاتے کہ چہ اد ءَ ھچ چیز میڈیا ءِ دیم ءَ رپورٹ کنگ نہ بیت۔ ھمے ھاتر ءَ بلوچستان ءِ جاور پہ اھوالکاراں گیشتر تُرسناکتر انت۔
بلوچستان ءِ جاورانی سبب ءَ چہ اد ءَ بازیں اھوالکار دراں ڈیھ بوھگ ءَ لاچار انت۔
ڈیجیٹل جھان ءَ بلوچستان ءِ بابت ءَ بازیں پیج ءُ ویب سائیٹ انچیں ھست انت کہ آ چہ سرکاری زرّاں چلائینگ بئیگ ءَ انت دانکہ آ وتگڑیں شرّی ءُ دیمرئی پیش بہ دار انت۔ اے رِد ءَ مردمانی نٹ ورک ءُ ٹولی پہ پگار ھم دارگ بوتگ انت کہ آ کارکنوکیں اھوالکاراں آن لائن ٹرول بہ کن انت، بہ تُرسین انت ءُ ھاموش بہ کن انت۔
بلوچستان اھوالکاری ءِ ھاتر ءَ بیم ناک تریں جاگہ اِنت کہ ادا ھچ وڑیں ڈیٹا دست نہ کپیت۔ بلے فریڈم نٹ ورک ءِ نوکیں رپورٹ ھمے پیش داریت کہ بلوچستان ءِ بابت ءَ گُنگ ءُ ھاموشیں پاکستانی اھوالکار ءُ میڈیا ءِ ادارگانی واستہ نی اسلام آباد ھم بلوچستان جوڑ بئیگ ءَ اِنت۔
No comments:
Post a Comment