عبدالحلیم حیاتاننبشتہ کار۔۔۔
گْوادر ءِ رودرآتکی تْیاب بزاں دیمی زِر ءِ لمب ءَ گزروان وارڑ ءِ
میتگ ءَ ماھیگ ءِ مارکیٹ گْوادر شھر ءِ نی چیدگاں چی یک چیدگ ءِ زانگ بیت۔ چیدگ
پمشکہ کہ استیں وھد ءَ اے ماھیگ ءِ مارکیٹ ڈُریتگ ءُ ھلاس بیتگ۔
مرچی مَن ءُ عطاء حیدر کہ سیل ءَ پہ دیمی زِر ءِ سروس دَگ گپت داں
ڈوریا ءَ شُت ایں ءُ پد ءَ ما واتر بیگ ءِ واست ءَ کریمُک ھوٹل ءِ کِرا چی
در کپتیں دمکاں جنان داں ہمے ماھیگ ءِ مارکیٹ سر بیت ایں۔ اے مارکیٹ ءِ نام کسانیں
مارکیٹ بیتگ۔ اے جاگہ پاسار ھم گُشتگے۔ پاسار ءِ بزانت سید گنج ءَ اے وڑ بْیان
کنَگ بیتگ:
"پاسار:(پَا۔ سَا۔ رْ) ھما جاگہ ءَ کہ تاجگ یا سوریں ماھیگ بھا
کنگ بیت بلے اے گال گیشتر پہ تاجگیں ماھیگ ءِ بھا کنگ ءِ جاگہ ءَ گْوشگ بیت"۔
مزنیں ماھیگ ءِ مارکیٹ ڈوریا ئے کِرا بیتگ۔
عطاء گپ اَت کہ اُود ءَ شابی ماھیگی ءِ بُنجل بیتگ۔ اشی کش ءَ یاسین
ءِ۔ اے جاگہ میا ماھیگی ماھیگ بھا کُرتگ۔
بلے اے درست ایں جاگہ نی ڈُرتگ ءِ تاں۔ کمے دیم ءَ مارا میا ماھیگی
دُوچار کَپت۔ عطاء ءَ جست کُرت منا پجا کارے؟ میا ءَ پسہ دات او تر ءَ پجا کاراں۔
اے ماھیگ ءِ مارکیٹ کہ سھب ءَ بِگر تا روچ زَرد ءَ رش کش بیتگ۔ اِد
ءَ وڑ وڑیں ءُ تام داریں ماھیگ ءِ بَاپَار کَنگ بیتگ نی پہ چیدگ پش کپتَگ۔
اے وھد ءَ اِد ءَ بس یک ماھیگ ءِ دکان برجاہ اِنت کہ اِشی ءِ ھدا
بُند مجید اِنت۔
میا ماھیگی نی آجز ءُ کماش اِنت۔ مرچاں ماھیگ بھا نہ کَنت۔ ہمے جاگہ
کہ میا ءَ ماھیگ بھا کُرتگ نی ہمے جاگہ ءَ میا ءَ گیم ءِ دکان کُرتگ کہ اُود
گونڈیں چُک گیمی لیب کَن اَنت۔
وھد تیزی ءَ گوازان اِنت بلے اے تیزی گْوادر ءِ چیدگاں گوں وتی پادا
بران اِنت۔ کریمُک ءِ ھوٹل ءَ بِگر داں شاھی بازار ءَ بْیا ءُ اے
ماھیگ ءِ مارکیٹ بچار۔ درست گْوَست ءِ شون ءَ دینت۔ گْوادر گُشے گْوَست ءِ کسہ ئے
جوڈ بوھان اَنت۔
No comments:
Post a Comment