نبشتہ کار: نسیم گُل
مار سک بیم ناکیں لُلوکے ءُ بلوچستان ءَ ایشی ءِ بازیں قسم است۔ ایشی نسل دنیا ءَ ہزارانی حساب ءَ انت۔ ایشی قسماں من ہمنکس زانین کہ ہر کجام کہ پہ چم دیستگ، کسمانک، تامر یا چہ وتی کماش ءُ دگہ مردمانی دپ ءَ اُشکتگ۔ پیر مرد وتی نماسگ ءَ مارانی بابت ءَ سرپدی دئیگ ءِ جُہد کنگ ءَ ات۔
نماسگ: پیروک اے مار چیازہرناک بنت؟
پیروک: نماسگ زہر ایشی فطرت ءَ مان انت ءُ ہمے ایشی نام ءُ بیم ناکی ءِ سبب انت۔
نماسگ: پیروک تو چنکس مار ءِ قسم زان ئے یا کہ وتی چم وت دیستگ ئے؟
پیروک: ھمےکہ مئے علاقہ ءَ است انت ہمیشان من پہ وتی چم دیستگ۔
نماسگ: بزاں منی جست ءِ مول ءُ مراد ایشانی نام مئے علاقہ ءَ چے انت؟
پیروک: ہر علاقہ ءَ ایشانی وتی نام بنت۔ مئے علاقہ ءَ ایشانی نام اے وڈ انت، دستونکو، کہ سک برادار ءُ ڈولدار انت گْوَستگیں وہدا مئے بَلُک کہ دری، شیکین، تہگرد کہ تونیتگ انت گڈا ہمے دستونکو ءِ نکش اِش کار مرز کرتگ۔ دومی گواز مار انت کہ سک شیپ کنت ءُ سادگیں مارے کسے تاوان نہ دنت۔ ہمے پیما ڈونبو ءُ اُشتر مار اے سک دراج بنت اگاں گوں کسے ءَ مٹ بہ کپ انت گڈا آئی ءَ الما تاوان دئیگ ءِ جہد کن انت سک ضدی بنت۔
نماسگ: پیروک ءِ ھبر ءَ داران ءَ، پیروک مرچاں دنیا ءِ توکا اے ماران جہلگ ءُ دارگ بیت بزان رکینگ بیت۔
پیروک: ھو بچ من ہم اُشکتگ بلئے اے ہم اُشکتگ کہ ایشانی زہران کشگ بیت ءُ پہ بازیں مقصد ءَ کارمرز کنگ بیت۔
نماسگ: پیروک اے بےدم این مار کجام انت گش انت سک بیم ناک انت؟
پیروک: ھو بچ من شموشت اے مار ءِ بازیں نام انت، بے دم، کَر، لنڈو ءُ دیگہ دیگہ۔ ءُ اے سک زہر ناک ءُ بیم ناک انت گشگ ہمیش انت کہ اگاں ایشی وروک 24 کلاکانی توکا درمان جاہ ءَ نہ رست گڈا آئی زندگ بوہگ سک مشکل انت ءُ ایشی ءِ خاصیت ھم باز انت۔ اے اگاں بہ وسپی یا اگاں وتی وراک ءُ شکار ءِ ھاترا ودار بکنت گڈا وت ءَ را ریک ءِ توکا کَل کنت ءُ وتی سرا ایوکا پہ دم گرگ درا کنت گوں ڈگار ہم رنگ انت ۔ ءُ وہد ءُ زمانگ ءَ کہ جوگی کاتنت گڈا ایشی گوں چمٹا گپت اِت ۔پیروک گپ ءَ برجا داران ءَ بلئے منی نماسگ مرچاں بلوچستان ءَ بے دم این مار سک باز انت ءُ ادا بازیں مردم ایشانی گورسی کنگ ءَ انت ءُ ایشانی زہر ہم نہ گشیتگ انت دومی چمٹا جوگی وتی کرا ائیر کرتگ۔ اے بد بخت لالچ ءُ تاقت ءِ نشہ ءَ گیرام کرتگ کہ یک روچے چو مہ اے اژدھا جوڑ بیت ایشانی جندا مہ وارت۔
نماسگ: پیروک من مدام اُشکین انت کہ آستونک ءِ مار سک حطرناک انت؟
پیروک: ھو منی بچ اے چہ بے دم ءُ ایندگہ درائیں ماران بیم ناک انت بس دعا ہمیش انت کہ اللہ ترا درا انساناں چہ اے مار ءَ بہ رکینیت۔
No comments:
Post a Comment