بلوچستان ءِ تھا نشہ ءِ آماچی

نبشتہ کار: شکراللہ ازیم

آماچ بوھگ  ھما  چیزءَ  گشاں کہ آ چیز مردم ءَ وتی آتراپ ءَ بہ گپت ۔  ھمے وڈا  بلوچستانءِ  تہا نشہءِ  آماچی گوں تیزیءَ  روان انت۔

اے وھدءَ  بلوچستانءِ  تہا 280000 مردم نشہءِ  آماچ انت ءُ انگت دیما روگ ءَ انت۔

 نشہ یک انچیں سیل ایں نادراہی یے کہ انسانءِ  دِلءُ  دماگ ءُ  جسمءَ پورا ھتم کنت۔ وھدے  کہ مردم ایشی ءَ ھدءَ  چہ زیادہ کارمرز کنت گڈاں ھا مردمءَ  کوشیت۔ ھما وھدا کہ یک کومے  دوئمی کوم ءَ ھتم کنگ لوٹیت گڈاں آئیءِ  چیربوریءِ  واست آ کومءَ را نشہ دیگءَ  بندات کنتءُ آئی ءِ واندہ ءُ  شریں مردماں ایشی ءِ آماچ کنت ءُ  ایشاں ھتم کنت گڈاں آ راجءِ  سرا بادشاہی کنت۔ اے وھد ءَ  بلوچستانءِ  ہر دمگءَ  نشہ ءِ آس بون گپتگ ۔ تُربَت،آواران ءُ اے دگہ ڈیسٹرک نشہءِ  آماچ انت، تُربَت ءِ ہر دمگءُ شہراں نشہءِ  کارمرز کنوک گندگءَ  کاینت۔ مرچی راشد دیدارءِ  وڈیں نامداریں شائِر  کہ آ مرچی نشہءِ  آماچ انت ءُ  وتی ھیالءَ  نہ انت سڈکانی سرا گردیت۔ اگاں ہمے وڈا نشہ بلوچستانءِ تہا وتی کِشک ءَ  راست کرتاں گڈاں اے دیگہ شائِر  ہم راشد دیدار ءِ   وڈا نشہءِ  آماچ بنتءُ بلوچستانءَ  را  بلاھیں توانے  دیاں ۔ ہمے وڈا آوارانءِ  تہا ھم نشہ سرِ عام بوھگءَ  انت ۔ اے وھدا بلوچستانءِ  دُراہیں نشہ  ، شراب، چرس، سگریٹ ، نسوار، شیشہ ءُ اے دیگہ نشہ ھم بوھگ انت۔  نشہ کنوک ھما وھدا داں نشہ کنت کہ آہیءِ  کِرا زرءُ مال است ،اگاں آہی ءِ  زرءُ مال ھتم بنت گڈاں دُزیءُ ڈکھیتی کنت ، مردماں لوٹّیت ، گسے ساماناں بہا کنت پہ وتی نشہءِ  ھاترءَ ۔ برے برے  روڈءِ  سر کپتگاں کس جُست اِش ھم نہ کنت۔ اے وھدا بلوچ راجءِ  بازییں نودربر ، کلمکار ءُ  دگہ بازیں مردم نشہ ءِ آماچ انت ۔ آؤکیں  وھدءَ بلوچستان ءِ  واستءَ   بلاھیں نُکس بوت کنت۔  ایشیءِ  مزنیں ھرابی ھمیش انت کہ اے یل دیگ نہ بیت ۔  اے مئے وتی نابودی انت کہ مئے کوم ءِ ورنہ زوال بوئگ  انتءُ  مارا ایشانی پکر نیست۔  نشہءِ  آماچیءِ  بازیں وجہ بوت کنت، انچو کہ ناوانندگی، بے روزگاری ، ءُ  نشہءِ  آماچ ایں مردمانی ھمرا داری ءُ  دیگہ وجہ ھم است ان۔

ناوانندگیءَ   چہ مردم دگنیاءَ  سرپد نہ بیت ، نزانت کہ منا چہ کنگی انت؟ ءُ وتی زندءِ  اسل مکسد ءَ  نزان انت۔ ایشی ءَ چہ آ گوں  وڈ وڈیں چیز وتءَ  ھوار دنت ، اے سببءَ  آ نشہءِ  آماچ بنت، ءُ ناوانندگیءِ وجہءَ آ ایشی ءِ  ھترناکیں اثراں سرپد نہ بنت  ۔ دومی بےروزگاری ، بے روزگاری ھم ناوانندگیءِ   وجہ ءَ زیادہ انت ،بلوچستان ءِ  تہا بازیں نودربر است انت کہ آھان ونتگءُ  وتی ڈگری گپتگان بلئے انگت آیان اں نوکری نہ رسیت  ایشی وجہءَ  چہ آ نااُمید بنت آکر کار نشہ ءِ  آماچ بنت ، ءُ برے آ مجبوریءَ  پہ لاپءِ  شوھازگ ءَ گاڈی یانی ڈرئیوری ءُ کلینڈّری کن انت  ،   وھد کہ اے چیزءَ  ھوار بنت گڈاں آ الم  نشہءِ  آماچ بنت ، مرچی بے کساس  ورناہ است انت کہ آھان وتی وانگ در بُرتگ بلئے انگت بے روزگار انت ءُ  ہمے وڈا نشہءِ  آماچ انت۔  

ایشیءِ  ھتم کنگءِ  واستءَ  مارا کومءَ  را سرپدی دیگ لوٹیت، نشہءِ  آماچیں نادریانی علاج کنگ لوٹیت۔ سرکارءَ  را لوٹیت کہ آ نودربراں نوکری بدنتءُ  نشہءِ  علاج کنوکیں سنٹراں ناں سامان شریں وڈیا بدنت دانکہ ما اے نشہءِ  آماچیءَ  ھتم بکن انت۔