مئے پیمنسٹ

نبشتہ کار: جی ایم بلوچ  

مئے پیمنسٹ وت سریں پیمنسٹ انت ادا "مئے" مراد اش انت کہ پاکستانی پیمنسٹ. انچو سما بیت کہ مئے پیمنسٹ دنیا ءِ  پیمنسٹ ءِ  لیکہ آں سرپد نہ انت   اشانی گورا پیمنسٹ ءِ  معنا سرجم ءَ  دگہ رنگ ءَ  انت. دنیا ءِ  تہا پیمنسٹ ءِ  لیکہ ءِ   مول ءُ  مراد اش انت کہ جنین آدم ءِ  ھقانی پچ گرگ. ھما ھق کہ پدر سری نظام ءَ  چہ جنین آدم ءَ  پُلیتگ انت ءُ  جنین آدم ءِ  زند ءِ  پیسلہ جنین ئے جند ءِ  دستا دئیگ بہ بیت۔

بلئے مئے (پاکستانی) پیمنسٹانی   مستریں مول ءُ  مراد اش انت کہ مردین ءَ  ایر بہ جن ،  اگاں ما ڈاکٹر طاہرہ کاظمی ءِ کتاباں بواناں ءُ  بچاراں مارا اے چیز سک گندگ ءَ  کئیت . ھالاں کہ پاکستان ءِ  تہا ڈاکٹر طاہرہ کاظمی  منی یک دوستگیں نبشتہ کارے  ، من طاہرہ ءِ کتاباں وانگ آں بانک طاہرہ سک وش نبشتہ کنت زالبولانی  سرا ارچ زلم ءُ  زوراکیاں دیم ءَ  کار ایت وتی نبشتانکانی تہا ، اگاں تو طاہرہ ءِ کتاباں بہ وان ئے ترا اے سما بیت کہ وتی نبشتانکانی تہا مردین ءِ زات ءَ  سک ایر جنت اے چیز ھم چارگ لوٹ ایت کہ درست مردین آدم یک پیم نہ انت گڈا مردین آدم ءِ  زات ایر جنگ مہ بیت۔  

منی گشگ ءِ  معنا اش انت کہ اے( مئے)  پیمنسٹ دنیگا  پیمنسٹ ءِ  لیکہ آں سرپد نہ انت کہ پیمنسٹ ءِ  مول مراد چی انت؟ ، منی ھیال ءَ پیمنسٹ ءِ  مستریں مول مراد ھمیش انت کہ جنین آدم ءَ  وتی پیسلہ کنگ ءِ  ھق دئیگ بہ بیت بلئے بلوچ چاگرد ءَ  بلوچ ءَ  وتی پیسلہ کنگ ءِ  ھق ھم داتگ۔  وھد ءِ  جنک وتی پیسلہ ءَ وت کنت ءُ  جنزاں یا کاروناں  ھوار بیت ءُ وت ءَ پشت نہ گیج ایت ءُ مردین ءِ بروبری ءَ جھدے ءَ ھوار بیت گڑا پاکستانی فیمینسٹاں چہ متاثر بوتگیں فیمینسٹ پدا وت جنین ءَ گِستا کن انت ءُ ھمے تاثُر دیاں کہ جنین زور پہ بروبری ءَ گِرینگ بئیگ ءَ اَنت۔  ءُ مردین ءِ جہل جنگ ءِ  واستہ مردین ءَ  اے پیسلہ ءِ  زمہ وار گش انت  ھالاں اے جنین ءِ  وتی پیسلہ انت کہ بلوچ چاگرد ءَ  پہ جنین ءَ  داتگ انت کہ پہ وتا کجام راہ ءَ  کجام چیز ءَ  دوست کنت ھما کار ءَ  کہ بلوچ چاگرد ءَ  مردین کنگ ءَ  انت آ کارا جنین ھم کنگ ءَ  انت۔ 

اگاں بلوچ زالبول پاکستان ءِ  آ دگے صوبہانی پیمنسٹانی نبشتانکاں وان انت ءُ  ھما وڈیں ھرکت کن انت اے سکیں ردیں کارے پرچہ کہ مئے چاگرد چہ پاکستان ءِ  آ دگے صوبہانی چاگرد ءَ  چٹ جتا انت آ جنین ءَ  انسانے سر پد  نہ بنت (وان ڈاکٹر طاہرہ کاظمی ءَ )، لاہور ءَ  پگر داں کراچی ءَ   اے ھلکانی تہا جنین آدم ایوک ءَ  گرد اِت کُت  نہ کن انت۔ مردین ءِ دست ءَ  ایر جیگ انت ، گُڈا باید مئے پیمنسٹ ھم آ پیمنسٹ ءَ  جتا بہ بنت ھما کہ مئے چاگرد ءَ  پہ جنین آدم ءَ  زلورت انت ھما چیزانی سرا کار بہ کن انت  ءُ  وھدے  جنین آدم وتی پیسلہ ءَ وت کنت پدا ھمے پیمنسٹ  اے پیسلہ ءِ  زمہ وار مردین ءَ  مہ گش انت۔ 

(من پیمنسٹ ءِ  ھلاپ نہ آں بلئے ردیں  ھیال ءُ  کار  رد انت)