زُبان ءِ ارزِشت

نبشتہ کار: شکراللہ ازیم 

ھر راج ءِ  زُبان آئی ءِ  واستا بلاھیں ارزِشتے دار اِیت۔ 

چہ زُبان ءِ  ارزِشت ءِ سرا گپ کنگ ءَ پیسر ما ھمے جسُت ءِ پسو ءَ  دَیِاَن کہ زُبان چے یے؟ 

زُبان مردمانی نیام ءَ  گپ ءُ ترْان ءُ  وتی ھالءُ اھوالانی رسائینگ ءِ یک  وسیلہ یے۔ دگنا ءِ درائیں راجاں جِتا جِتائیں زُبان ھست ۔ انچوش کہ بلوچی، انگریزی، پارسی، اُردو، سندھی ءُ  دگہ بازیں زُبان است اَنت۔ زُبان مدام چہ وانگ ءُ  نَبِیسگ ءُ پٹ ءُ پول ءَ  چہ دیمرئی کنت۔

چوناھا بودناک ایں ملک ءُ راج ھمے گشاں کہ بازیں زُبان متلب   ایردستں کومانی زُبان پدمنتگ اَنت بلئے منی ھیال ءَ  دگنا ءِ  درائیں زُبان وت وتی جاگہ ءَ بودناک اَنت۔ اے گپ ءِ  سرا بلاھیں زانت کار ھم باور کن اَنت۔ 

زُبان یک کومے ءِ  پجّار اِنت ۔ زُبان کومے ءِ دود ءُ ربیدگ ءَ  پدر کنت۔ زُبان چونا ھا گوں سُست رپتاری ءَ دیمرئی کنت بلئے ھمے سُست رپتاری ءَ  گوں آ باز دیمرئی کنت ءُ  بلاھیں منزلے ءَ  سر بیت۔ دگنا ءِ ھر زُبان ءِ وتی 

بُن راھبند (Grammar) ھست اَنت۔  انچوش کہ انگریزی ءِ  بُن ءُ راھبند(English grammer) اردو ءِ  بُنراھبند (اردو قواعد) ءُ دگہ بازیں زبانانی بُن راھبند است اَنت۔انچو کہ من بار بار گشگ ءَ آں کہ زُبان چہ پٹ ءُ پول نبشتہ کنگ ءَ دیمرئی کنت ۔ امِنچو  زُبان ءَ  وان ئے ءُ نبشتہ کن ئے زبان امینچو دیمرئی کنت۔ ما زُبان ءِ ارزشت ءِ  واستا کمو تاریخ ءِ  سرا گپ کن ایں کہ وھدے مھکم ایں راجاں کوزہ گیری کتگ گڈاں آیاں چی کتگ؟  پورپ ءُ  برتانیہ ءَ  وتی کوزہ گیری ءُ وتئ وت  بادشاہی ءِ برجم دارگ ءَ  وتی زانتکار رواں داتگاں تانکہ آ سُست ایں  کومانی  دُود ءُ ربیدگ ءُ  آھانی زبان ءَ ھتم بکن اَنت ءُ ھما کوم وتئ اَسل زُبان ءُ پَجّار ءَ ھچ بر مہ زانت  ۔اے چیز ءَ  چہ پدر بیت کہ زُبان بلاھیں ازریشتے دار اِیت۔ اگاں کوم ءِ  زُبان  گار ءُ بیگواہ بیت گڈاں آھستہ آھستہ کوم ءِ  جِند ھم گار ءُ بیگواہ بیت۔ 

اگاں ما زانیں کہ زُبان بلاھیں ارزیشتے  دار اِیت گڈاں ما پرچا وتی زُبان ءَ  دیمرئی نہ دائیں ۔ مئے زُبان ھما وھد ءَ  دیمرئی کنت کہ ما وتی ھر نبشتانک ءُ  سوشل میڈیا ءَ ، پیسبوک، ٹوئیٹر، انسٹاگرام ءُ دگہ بازیں جاھاں وتی راجی زُبان ءَ نبشتہ بہ کن اِنت۔ ما ھمے گندیں کہ سوشل میڈیا ءَ اے دگہ راج وت وتئ جِندئے زبان ءَ وتئ کلوہ ءُ ھالاں نبشتہ کن اَنت بلئے ما اردو ءُ انگریزی ءَ  نبشتہ کن انت۔ آ راجانی زُبان  ھمے واستا تواناہ بوتگ اَنت پرچیکہ  آھان وتی زُبان نبیستگ ءُ وانتگ ھمے واستا دیمرئی  کرتگ ۔ اگاں ما بلوچی زُبان ءِ  دیمرئی ءَ  لوٹ اِنت گڈاں مارا لوٹّیت کہ ما مدام بلوچی بِوان ءُ  نبشتہ بہ کن اِنت۔ اَلم نہ اِنت کہ ھرکس بلوچی ءَ زانتکار بہ بیت بلیے ھر کس وتی کچ ءَ وتئ جھد ءَ  برجم بہ دار اِیت  گڈاں ھا ھم  زبان ءِ شریں زانتکار جوڈ بیت کن اِنت ءُ مئے زبان ھم دیمرھی کُتگیں زبانانی پِڑ ءَ ھوار بیت کنت۔