پیشکان ءِ ازمکاریں شہزاد شاه بخش

نبشتہ کار: سلال ساوڑ

شال  اِنت  چہ  بلوچستان یونیورسٹی  ءِ  هاسٹل  ءَ  د‍َر  کَپاں  ءُ  دیم  پہ  'بازار'  ءِ  "جان مهمد روڈ"  ءَ  رواں ،  پیشُکان  ءِ  بازیں  بچک  ءُ  کسان سالیں  سنگت  اِد ءَ وانگ  ءَ  اتکگ  اَنت  ءُ  ماں  اود  ءَ  کمره  یے  ءَ  یکجاه  انت۔ چہ  اِشاں  جِتائیں  یونیورسٹی  ءِ  ڈیپارٹمنٹانی  نودربراں  هَوار  گیشتر  هما  اَنت  کہ  میڈیکل  ٹیسٹ  ءِ  تیاری  ءُ  'اِنٹر'  ءِ  کورس  ءُ  دگہ، دگہ  شُعبہ  ءُ  ڈیپارٹاں  سَر  بوئگ  ءِ  هاتر  ءَ  اکیڈمیاں  کِلاس  گِرگ  ءَ  اَنت۔

 من  وهد  وهد  ءِ  سَر  ءَ  یونیورسٹی  ءَ  موکلے  یا  آنگوْری  کارے  کہ  کَپ  ایت  تاں  بچکّانی  گْور  ءَ  سَرے  جَناں۔ اَنچو  اِے  بَری  سَر کپت،  گِند آں   کوٹی  ءَ   گوں  دست  کَشّ  اِتگیں  بلوچی  ءِ  مزن نامیں  نبشتہ کار  سید  ہاشُمی   ءُ  نامی  ایں  دگہ  لَهتیں  گُشندهانی  بازیں  'اسکیچ'  ءُ  اَکس  اَنت  دْرتکگ  اَنت -

هَبکّہ  بوتاں  اِے  براهداریں  اَکسانی  جوڑ  کنوک  وت  چہ  اِشاں  پیشُکان  ءِ  کسان  سالیں  نودربرے  "شہزاد"  اَت -

مئے  بَدبهتی  ایش  اِنت  وتا  وَ  مُلکے  نیست  ءُ  پہ  انچا  نامے  ءَ  جوڑینتگیں  ریاستے  ءَ  چُشیں  ازمکارانی  دلبڈّی  ءُ  درآهگ  ءِ  واستہ  در  ءُ  آسراتی  نیست  کہ  وتی  ازم  ءَ  دیمروہی  دات  کُت،  دراَتک  ءُ  دیم  ءَ  شُت  بہ  کن  اَنت۔

چونہا  آ  دیمروہی  کُرتگیں  ءُ  پَلاهی  ریاستاں  رَهبند  ایش  اِنت  زهگے  ماں  دربرجاه  ءَ  سَر  بیت  آئی  ءَ  نپسیاتی  پَد  ءَ  تپّاسگ   ءُ  آہانی  تَب  ءَ  چارگ  بیت  کہ  زهگ  آرٹ ، زیمر ، سائنس  یا  کُجام  هم  پِڑ  ءِ  مئیل  ءُ  بودشت  داریت  تاں  هما  نیمگ  ءَ  بَرگ  ءُ  آسراتی  دَیگ  بیت - بلے  مئے  گْور  ءَ  جاور   ایش اِنت  چہ  بندات  ءَ  هرچی  یے  بیت ،  تَب  ئیگ  اِنت  یا  ناں سَر  ءَ  مُشگ  بیت  ءُ  وانگی  اِنت،  ءُ  پدا هر یکّے  پہ  وتی  آسراتی  ءَ  همود  ءَ   'اسکوپے'  گِندیت  هما  پِڑ  ءَ  اِیر  کئیت  ءُ  گِرّوکان  بیت۔

شہزاد  سرجم  ءَ  ازم  ءُ  آرٹ  ءِ  مردُم  اِنت -     

آ  نزّیکی  ءَ  من  دیست،  اِے  کسانیں  بالاد  ءَ  کہ  نوک  تنیگہ  وتی  اَول  گام  اِنت  گوں  دست  ءِ  پِنسل ‎ءُ 'مارکر'  ءَ  نیم  ساهت  ءِ  تہا  ماں  تاکے  ءَ  اسکیچ  ءِ  جوڑ  کنگ  ءِ  کرتب  ءَ  بلد  ءَ  اِنت _  دگہ  بَهمانگی  گپّے  ایش  اِنت  آ   انچو  کہ  اَکس کَشی  ءِ  هُنَر  ءَ  تہنا  گوں  وتی  هُبّ  ءُ سِنج  پَد ءَ  ءُ  بیدئے  اُستاد  ءُ  سوجکارے  ءِ  ساهگ  ءَ  بوئگ  ءَ   زَبْر  اِنت  همے  رنگ  ءَ  'باجا' Harmonium  ءَ  چہ  کَسے ءَ  سِکّگ  ءُ  راگ_راگنیانی زانگ  ءَ  ابید  هم  جُوان  ''پِلے''  کنت،  باجا  آئی  ءَ  وت  چہ  موبائل  ءِ  تہا  ہارمونیم ءِ اِپلیکیشنے  ءَ  هیل  گِپتگ  چونائیں  تَرزے  ءَ  گِپت  کُت ءُ  جَت کنت

چُشیں  سِلاهیت  ءُ  بودناکی  یے  ءِ  هُدابندیں  زهگ  ‎ءِ   مئے  بے سوب  ایں  ریاست  کُشندگ  ءُ  آہانی  کُدرتی  سِنچ  ءُ  ٹیلنٹانی  چیر تَرّینگ  ءُ   زیان  کنگ ءِ  ذمّہ وار  اِنت -

اِے  هما  شْدر  اَنت  تراشگ  ءِ  زلورت  اِنت  اِشانی  درپش  ءُ  جَڑشک  جہان  ءَ  گُڈین  اَنت  ءُ  هیران  کن  اَنت  لیونارڈو ڈاونچی ، ونسنٹ وان گوگ  ءُ  پابلو پِکاسو  ءِ  وڑیں  آرٹسٹ  ایں  کارست  جوڑ  بَنت  ءُ  دیم ءَ  کایَنت.