مئے لھتیں فیمنسٹ چہ بلوچ زالبولاں نا بلد اَنت

نبشتہ کار: ایسپ بلوچ

چیزے روچ پیسر من ٹویٹر ءَ چارگ ءَ اِتاں کہ مئے فیمنسٹے ءَ پہ بلوچ سیاست ءَ وتی گوھریں دانک نبشتہ کتگ اتنت ءُ لھتیں راجکار بد گشتگ ات۔

ھمے فیمنسٹے ءَ کمّو وھد پیش گشتگ ات منا گوں سیاست ءَ ھچ کار نیست پمشکہ بلوچستان ءِ سیاسی جیڑہ آں اگاں جنین اوں اثر مند انت تہ من ھاموش آں۔ جواز دئیگ بوتگ ات منا گوں تھی کاراں ھچ سیادی نیست۔

ایشی ءَ چہ پیسر مئے فیمنسٹ یک آزاتیں بلوچ زالے ءِ پیسلہ ءَ ایر جنگ ءَ اتنت ءُ گشگ ءَ اتنت کہ اے پیسلہ زور سرا دئیگ بوتگ ءُ مردین ءِ اثر ایشی ءَ ھوار انت بلے ھمے فیمنسٹ آں یکبرے گشتگ ات بلوچ جنین ءَ مردین ءِ کِرّا کار کنگ ءِ آزاتی ءَ ابید وتی پیسلہ کنگ ءِ آزاتی دئیگ بہ بیت۔

اے درستیں پیسلہ کہ بلوچ جنین ءَ زُرتاں تہ مئے فیمنسٹاں کوکار کت کہ اے وڈ کنگ مہ بیت۔ من ھردیں وتی ھمے وڑیں فیمنسٹاں گنداں تہ اجکّہ باں کہ وتی واھگانی پدا جنین ءَ کار ءَ اوں نئیل انت بلے ھردیں جنین کار مہ کنت تہ کوکار کن انت کہ بلوچ ءَ جنین ءَ آزاتی نہ داتگ، مردین جنین ءَ چہ زورمند تریں، آئی ءَ وتی ھمراھی ءَ کار کنگ مکن کنت۔

یکروچے سنگتے ءَ نبشتہ کتگ ات کہ مئے فیمنسٹ ”مگرب زدگ“ آں۔ من اے گالرد لھتیں روچ بیت پھم اِت کہ بلوچ جِنّک بارکھان ءَ بُنّکی وانگی لوٹانی واستہ زھرشانی کنگ ءَ اتنت، ننداک اِش جتگ ات تہ من ھمے فیمنسٹانی سوشل میڈیا والا ھچ پوسٹ نہ دیست ءُ زی سندھ پولیس ءَ بلوچ جنینانی سرا اُرش کت، کم شرپ کت انت، تہ مئے فیمنسٹ ھاموش اتنت۔

نوں من سما کنگ ءَ آں کہ مئے فیمنسٹ بلوچ ءِ زمینی راستی آں گوں یورپ ءَ ھوار کن انت ءُ چمشانک دی انت کہ پلاں کار مارا کنگی انت، پلاں کنگی نہ انت بلے ھچبر بلوچ ءُ یورپ ءِ زمینی راستی آں پوہ نہ بنت۔

یورپ ءَ جنیں لٹ نہ وارت، یورپ ءِ جنیں پہ وانگ ءِ واستہ چیھانٹ دئیگ ءَ بُرز تِر شتگ، یورپ ءِ جنیں وتی گِس ءَ محفوظ ایں، یورپ ءِ جنیں پہ وتی برات ءُ پِت آں شھدگانی سرا زھرشانی نہ کنت۔

بلوچستان ءُ یورپ دو جتائیں زمین انت کہ آھانی زمینی راستی یکشل جتا انت، بلوچستان ءُ یورپ یکیں چشمک ءَ کدی اوں چارگ نہ بنت پمشکہ مئے فیمنسٹ ءُ یورپ ءِ فیمنسٹے ءِ جیڑہ چہ روتگ آں جتا بیت۔

من داں جیڑاں مئے فیمنسٹ چیا یورپ ءِ چھرگ ءُ ساہ ءَ زندگ انت۔ فیمنزم تھنا یورپ ءَ وَ نیست انت ءُ نئیکہ اے جنز ءِ واھند یورپی انت، اے یک جھانی جنزے، بلے مئے کِرّا اے جنز چیا جھانی رنگے ءَ دیما نہ یتکگ؟

منا مدام ابسار عالم یاد کئیت،آ جاگھے گشیت ”پنجاب ءِ ذہنیت پمشکہ سَنٹ انت کہ آ نئیکہ یورپ ءِ چھرگ ءَ جنت ءُ نئیکہ مغل سلطنت ءِ، جیڑہ ایش انت کہ اے دوئیں نظام پاکستانی پنجاب ءَ ھما وھدا سر بوتگ انت کہ ایشانی ھلاسی بوتگ، پمشکہ پنجاب اجکّہ انت کہ منا چی کنگی انت۔

بلوچ فیمنسٹ ءِ ھمے ھالیں، مئے گیشتر فیمنسٹ اگاں ایلیٹ کلاس ءِ مردم نہ انت بلے ایلیٹ کلاس ءِ مردماں گوں جاھے نہ جاھے، وڈے نہ وڈے نزّیک بوتگ انت، یا وَ ایشانی وانگ ھنچیں جاھاں بوتگ کہ اُودا بلوچ ءِ زمینی راستی جتا بوتگ انت یا کہ آھاں انچیں ھنداں زِند گوازینتگ کہ آ بلوچستان ءَ یکشل جتا انت۔

اگاں جیڑہ اے نہ انت تہ اے گیشتر مزن بیت پرچا کہ تئی زمین ءِ سرا یک جنزے ءِ دیما بروکے تئی زمینی راستی ءُ زالبولے ءِ مزنیں جیڑہ آں سرپد نہ انت تہ اے پریشانی ءِ ھبر یے۔

فیمنزم یک علاقائی جیڑے  نہ انت، نپری جیڑہ یے نہ انت، مخسوسیں کھولے ءِ اوں جیڑہ نہ انت۔ فیمنزم زالبول جُنزے آ ھچ پئیم چار زالبول ءِ نپری جیڑہ بوت نہ کنت۔ کسے اگاں فیمنزم ءِ ھبر ءَ کنت تہ آئی ءِ مُراد مچّی بہ بیت۔ آئی ءِ جیڑہ مچّی ءِ جیڑہ بہ بنت، آئی ءِ گامگیج مچّی لوٹ ءُ واھگانی مانزمان بہ بنت۔

بارکھان ءَ جِنّکانی وانگی جنز مزنیں گپّے، پدمنتگیں زمینے ءِ سرا راجے کہ وانگ ءَ اہمیت دنت تہ ایشی ءَ مستریں شے نیست بلے اجب ایش انت کہ مئے گیشتریں فیمنسٹ اے بابت ءَ ھاموش انت بلے ھردیں ایشاں مراگشے ءَ ”پبلک مائیک“ یے دئیگ بہ بیت تہ اے گشگ ءَ اِچّ چکّ ءُ پد نباں کہ بلوچ وتی چکّاں نہ وانین اِیت۔

بلوچ زالبولے اگاں زندگ مانیت تہ آ وتی گیشیں لوٹ ءُ واھگ آنی واستہ جھد کنت۔ مرچی  بلوچ زالے ءِ مستریں جیڑہ آئی ءِ سیکورٹی انت۔آ دگانی سرا لٹ دئیگ بیت، کم شرپ کنگ بیت، بیھار دئیگ بیت، تُرسینگ بیت، مایوس کنگ بیت، بلیں چِست کنگ ءُ پد ءَ آئی ءِ کُنٹ ویرانگاں چگل دئیگ ھم بیت۔

من داں ھما روچ ءَ گش آں کہ مئے فیمنسٹ بس ”اسٹ“ ءَ داں آیانی جھد گوں بلوچستان ءِ زمینی راستی آں ھمگرنچ نہ بیت، آیانی لوٹ ءُ گزر گوں یک لس بلوچ زالے ءَ یک نہ بنت۔