"بْراھنگیں اُفّارگانی توار"

۔۔۔۔کمالان بیبگر۔۔۔۔۔۔

شانزدہ ستمبر اِنت، پسنی اناگت ءَ رش اِنت، دریا ورد، شپانک، سرمچار، شائر، گشندہ دْرست پسّنی ءِ دمکانی تہ ءَ یل ءَ اَنت، مردمانی بلائیں مُچّی یے یکجاہ اِنت۔۔۔ بلے توار نیست، انچیں بے تواری یے ءَ مانشانتگ کہ گُشئے کس کس ءَ میم کنگا نہ اِنت کہ ھبرے کُت بہ کنت. اِینچو مردم کہ یکجاہ بے توار بہ بیت تاں بِزاں کہ آیانی نیام ءَ چہ باز تمردیں توارے ءَ سَپر کُتگ ۔۔۔

ھما کماش کہ آئی ءَ را نمیرانیں داستانے گون اَت، آئی ءَ وتی پَتّر پیتک، اے ھمے پُر زیمریں توارے وشبو اِنت کہ مروچی تیوگیں ھما شہر ءُ میتگاں شِنگ اِنت کہ اُودا "بلوچے" ساہ زورگءَ اِنت، پمشکہ ھر ھما جاہ مرچی ویران اِنت کہ اودا بلوچے ھست۔ اے وَ ھمائی کمال اَت کہ آئی ءَ اے وڈیں نیم ساریں چاگردے ءَ ھما وڈ زندگی کُتگ اَت کہ آئی دل ءَ لوٹ اِت. سیاستدان، مُلا، میر، سرکار آئی کِرا درستانی مانا یک اَت، ھرکس ءَ گوں یکّیں زُبان ءَ ھبر ئے کُت... بوت کنت آ دراھینانی بستار ءَ سرپد اَت...

آئی واستہ کہ ھرچ تُپنگے پیش تِیر کنگ بوت تاں آ تُپنگ ءَ اے اَلّم جیڑ اِت کہ منا باریں آس برگی اِنت کہ ناں؟

"جی تئی شھدیں کندگ ءُ ٹہکانی توار"

آ ٹہک گار اِتنت (گار اِتنت؟) بلے مرچی بلوچ درست در کپتگ اِتاں، عاشق، لپنگہ، جنگول، بُزدل، دلیر، مُلا، وانندہ، جَٹّ درست ھما بے تواریں مُچّی ءِ بھر اِتاں... ھر نیما پورا مردمانی زرابے اَت۔۔۔

"پہ نشانی پشت نہ کَپتگ جور ءِ ناکامیں برے

دھل زرد ءِ درد ءِ ھار ءَ گْوتکگاں واتر بکن"

دریا ابیتک، گوات ھیران، دمک ویران، کوہ مُلور، کوچگ رنجور... انچو گُشئے تیوگیں گیدی مھشر اَت۔۔۔ آئی ءَ بلوچانی دل ءَ اَنچو سوب مندی ءَ گوں جاگہ کُتگ اَت کہ تَنی وھدی ھچ نظریہ ءَ جاگہ کُت نہ کُتگ اَت، دین، دنیا، سیاست، فلسفہ، اَدب... بلکیں ھمے نیم بُندگیں آسراتی ھمائی کُمک ءَ وتارا شرپ بکشگ ءِ جھد ءُ کوشست ءَ اِتنت۔

"من جُنزاں جُنزاں پہ منزل ءَ چہ گِس ءَ در اَتکاں

پدا ھما زندگی ءِ مانترّ، سفر نہ کُٹّ اِیت"

بلے مُبارک... آئی ءَ وتی کٹوکیں سپر توام کُتگ اَت ءُ ھلاس نہ بوکیں سپر ءِ اَولی گامے ماں زمین ءِ شھرگ ءَ اِیر کُتگ اَت، ھما زمین کہ مُبارک مُدام آئی واب دیستگ اَت، ھما زمین کہ آئی مُبارک رودینتگ اَت ءُ مزن کُتگ اَت۔۔۔ مرچی آئی ءَ پہ شانے وتی نمیرانیں بچّ ھمباز اِتگ اَت... آئی بوسہ دیگا اَت...