__ اباشکو

سلال ساوڑ

همے  روچ  ءُ  ماہ  یات  نہ  بَنت،  سال  کِساس  ءَ 2011  ءِ پُشت ءُ دیم  ءِ  گپّے  کہ  مَں  بے سَمائی  ءِ  دَمکاں  ویل  ءُ  وتی  کودکی  ءِ  درک ءُ دؤران  اِتاں  ناں  کہ  کتابے  ونت  کُت  ءُ  دُنیا  یے  زانتگ  اَت  ناں   لبزانک  ، رِدانک‌،  لچّہ  ءُ  دستونک  ءِ  چُشیں  گالبنداں  آژناگی  یے  هَست  اَت ،

همے  کودکی  ءِ  باریگ  ءِ  یاتانی  جَلشکاں  کازی  مُدام  گِندگ  بیت،  اِے  رنگیں  روچ  سک  باز   اِتنت  آ  هُدامُرزی ایں ناکو  'طاهر پیشُکانی'  ءِ  گْور  ءَ  ماں  لوگ ءَ  اتک  ءُ  شُتگ  اَت،  اے  میان  ءَ  باز  رَند  ءَ  دیستگ  اَت - اِے  وتی  لوگ  اِت ئےِ ،

ملاران  اِنت  درویش ایں  داب  ءُ  مسکرا  ایں اَدا یاں بَرانڈه  ءِ  ڈیکّی  ءِ  سرا  یَلہ  اِنت ،  لوگ  ءِ  تہا  گوں  طاهر  ءَ  نِشتگ  ءُ  وش گپّی  ءَ  اِنت  

کدی نیمروچ  ءِ  ٹاکے  ءَ  رَسیت  ءُ  کئیت  لوگ  ءَ  توار  جَنت - '' بیا طاهر اَتکگ آں  رؤگ آں بیٹک ءَ --- "  چَبَٹّ ئےِ پاداں  اَنت  سیاهیں  بلوچی  چادر ئےِ  کوپگانی  سَر ءَ  لونجان اِنت رؤگ ءَ اِنت - 

آ  روچ  پَما  سک  وشّ  اَت،  ائیدے  ءَ  کمّ  نہ اَت  چو  بُگش دوستیں  مردُمے ، پِتے  یا  لوگ ءِ  کَسے  چہ  دَر ءَ  واتر  بئیت  انچیں  گَلے  چِتگ  اَت  وهدے  هال  ءَ  گِپت  مرچی  کازی  آهگی  اِنت،    

 همے  ساهت  اِتنت،  بیگاه  یے  ءُ  بیٹک  ءَ  کدّهانی  چراگ  روک  اِتنت،  گانا  ءُ ساز  ءُ  زیمل  اَت  مَں  ڈنّ  ءَ  چہ  دَریگ  ءَ  کازی  ءِ  تماشا  ءَ  سَئیل  کنگ  ءَ  آں -  ناگت ءَ  چمّ ئےِ  کَپ  اَنت، گوں  دست  ءِ  اِشاره  ءَ  آواز دَنت. '' پُلّو!  بیا ناں ---''

   توک  ءَ  نِندوک  باں  اَنچو  ڈُهل ءُ  گانا  کہ  دارَنت  طاهر  دیم  ءَ  تَرّین  ایت  گِپت  من  ءَ  ءُ  درّائین  ایت : '' بیا  تو  اِد ءَ ،   کازی!  اِے  اوں  گانا  جاں   گوژداری ____  کازی  ءَ  زانئے ؟  کازی  ءِ  شئر ءَ  بجن. --'' 

 

  دو  ارس  چہ وتی  کریاب ایں  چمّاں  وام کناں

زهیر   ءِ   لُنجیں   شَپاں   شادہانی   بام  کناں 

 

  کازی  ءِ  کَش  ءَ  نِشتگ  آں،  چو  یات اِنت  اِے  گانا  ءِ  تہا  لبزانی  گُشگ  ءِ  رَدی  کنگ  ءَ  آں،  ماں  نیام  ءَ  کازی  شَرّ  کَنگ  ءُ  چِنَگ  ‎ءُ  دپ  ءَ  دئیگ  ءَ  اِنت  اِش،  گانا  کُٹّ  ایت  دست  ءِ  دل ءَ  شہاریت  منی  نیم ءَ  ءُ  اَنچو  دست  ءَ  آئی  ءِ  دست  ءِ  تہا  اِیر  کناں  هما  دمان  ءَ  من ءَ  ژَپّ  ایت،  گِپت  ءُ  وتی  امبازاں  کنت  ءُ  مہر  دئیگ  ءَ  لَگّ  ایت _ 

 

پہ  مَن  ءَ  چُشیں  ندارگ  ءُ  ماهول  نوک  اَت  کازی  ءِ  کَش  ءَ  ءُ اینچو  مردُم  ءِ  میان  ءَ  نِشتگ  آں ،  بَرّ  ءُ  بانگ  آں.  کازی  ساهت  ءُ  دمان  وتی  دیم  ءَ   گوں مَں  کنت  گپ  ءَ  بیت  ءُ  سُٹُک  جَنگ  ءَ  اِنت  بلے  منی  دلگوش  ءُ  چمّ  گوں  بَرے  ڈُهل ، باجا ، نِشتگیں  مردُم  ءُ  کدی  طاهر  ءَ   بَنت -     تاں  آ  توار  پِر  جَنت

"طاهر!  اِے  گونڈو  اباشکو  اِنت ---''

وهد  گْوزان  بوت  رَند  ءَ  کازی  ءِ  اوں  رؤ  ءُ  آ  بند  بیت - اُمر ءِ  پاس  ءُ  دمان  کِنزان  اِتنت  ءُ روچے  اتک  کہ  طاهر  ءَ  اِمبروز  ءِ  سَپر  جَت  ءُ  گوں  رَوگ  ءَ پیشی  دابانی  دلنوا  ءُ  گِہیں نیاد،  زَرینتگیں  ساز  ءُ  زیمرانی  اوں  پَتّر  ئےِ  گوں  وتا  پیتک  ءُ  رَپت،  هما  بیٹک  کہ  زمانگے  ءَ  پُر مزگ ایں  مجلس جاه یے  اَت،  مُدام  ءَ  رؤ ءُ آ  ءُ  رَشّ ءُ کش  اَت ، دائمی کَئیپ  ءُ  کُمارانی  سَنج  ءَ  جَتگ اَت ،  ٹَہک  دیوکائی  مَزاک  ءُ  توازا  ءِ  دیوان  جَم اِتگ  اِت اَنت  ،  تران  ءُ  رنگ  ءَ  رنگیں  کسّہ  ءِ  بُنجاه  ءُ  بُنجلے  اَت  کہ  باریں  کئی  بَدیں  نگاه  ئےِ  کَپت  هورک  ءُ  ابیتک تَرّ  اِت ، اِنسَرت  ءُ  ویرندانے  جوڑ  بوت -

زَراں ، زنزراں  تلوس  آں  پہ  هزاری 

گہـ   ءُ  منگہ ایں  مجلساں  اللّہ  اللّہ 

کازی  میان  ءَ  گِندگ  نہ  بوت  داں  زند  ءِ  دراجیں   پَندے   ءِ   گْوازینگ  ءَ  رَند  کہ  کمّے  اِے  سَما  اوں  رُست  ءُ  ورنا  بیت  دوبر  گوں  آئی  ءَ  2020 ءِ  هما  وهد  ءَ  کہ  نوک  شال  ءَ  وانگ  ءَ  اتک  آں  کازی  اوں  همد  ءَ اَت  مگربے  ءَ ''  پرنس روڈ ''  ءَ  گوں  سنگتاں  گِندگ  ءَ  ئےِ  شُتیں -

پیشی  ایں  هساب  ءَ  لاگرتر  بیتگ  اَت،  رنج  اِتگ  اَت  بلے  کوچرائی  ءُ  وژدلیں  تران ،  ملنگ  ءُ آجزی  ئےِ  هما  وڑ  ءَ  اَت -   'عارف'  ءُ  'طاهر'  ءِ  مَرگ  ءَ  بژن  ئےِ  درشانت  ءُ  گوں  طاهر  ءَ  گوازینتگیں  کوهنیں  ساهتانی  گپ  ءُ  کسّہ  ئےِ  هم  جَت  اَنت -

 پاداهگ  ءُ  وشّی  کنگ  ءِ ساهت  ءَ  من  کہ  دست  دات،  دست  ئےِ  گِپت  ءُ  گْوشت  ئےِ :  اووو__ چو  سرد  اَنت  تئی  دست --- " 

 '' اهو،  سرد  اِنت  چونہا --'' 

"اهو!  کادِرداد  ءِ  کاتِل----'' هاهاهاها  هَردُکاں ٹَہک دات _

چو  کازی  ءِ  ازم  ءَ  آئی  ءِ  'شَکسیت'  ءُ  کِرد  ءِ  دُروشُم  ءُ  سپت  هم  بے کِساس  اَنت  -  آ  چو  'کافکا'  ءِ  رنگیں  کارستے  ءَ  اَت  کہ  نبشتہ کنت " اِے  جہان  نکاب  جَتگیں  مردُمانی مجلسے  ءُ  من  گوں  وتی  پَچیں  دیم  ءَ  اَتکگ  آں__" چو  سارتر  ءِ  دُروشُم  ءَ  هم گِندگ  بیت، گُشیت " بِہـ  من  دِگرانی  پسُند  وتی  زندگی  ءِ  راه  ءُ  رَهبند  جوڑ  نہ  کُتگ  اَنت - " 

 یا  اِے  شئر  چنکدر  گوں  آئی  ءِ  تَب  ءُ  زند  ءَ  هم تئیل  اَت 

 '' من ءَ هچ مال ءُ میراس ءِ تلب نیست

   من  ءَ  را    گنج   داتگ    بادشاه   ءَ 

یا  آ  ماں  اِے  رنگ  ءَ  هم  گِندگ  بیت 

من دل ءَ مهر ءِ سَبک داتگیں پُلّے کِشتگ 

گوں من کسّی بدی ءِ گپ  نہ بیت توبہ کن

من  ءَ  درگْوز  کن  کازی  کہ  نگدی  بود  ءُ  چُشیں  زانشتے  نیست  تئی  ساچشتی تَک  ءُ  پہناتاں  گِیشّینت  کُت  ءُ  شابیت  ایں  ازم  ءِ  کد  ءُ  بستار  دَرا  کُتیں، من  ئےِ  نودربرے  ءِ  کار  اوں  نہ  اِنت -

منی  گْور ءَ گپّے  بہ  بیت  تہنا  تئی  ساچشتانی  درگت  ءَ  همے  دوئیں  کم بود  ءُ  ناکامل  ایں  هبر  بَنت  کہ 

هما  زمانگ  ءُ  دؤر  ءَ  کہ  ماں  جهان  ءَ  'دیمروہی  دوستی'  ءِ  جُنز  بنا  بیت  ءُ   مارکسی پَلسپہ  ءِ  پلّہ مرزی  ءُ  دوستی  ءَ  ادب  ساچگ  بئیگ  ءَ  بیت  ' ادب برائے زندگی ' ءِ  اوگام  سَر کشّیت،  داں  اِے  جُنز  بلوچی  لبزانک  ءَ  هم  وتی  پانچُلاں  کنت  کہ  چہ  نوکیں  لبزانک  ءِ  بندات  ءَ   ماں  همے  پگر  ءِ  پَد  ءَ  نبشتہ  ءُ  ساچشتکاری  ءِ  مئیلے  جُنزگ  ءَ  اِنت -

ءُ چَما  وهد  ءَ  نگدکار   'مارکسی نگد'  ءِ  دبستان ءِ  سر  ءَ  ساچشت  ءَ  سَئیل کنت  ءُ  تپّاس ایت  کہ  باریں  اود  ءَ چے رنگ  ءَ  زُلم ءُ زوراکی  ءِ  هلاپ  ءَ  توار  چِست  کنگ، جؤزگ ، ہمّت  ءُ  اُمیت، جاگیرداری  ءُ  سرداری  رَهبند ایرجَنگ، وتن دوستی،  مزاهمتی رنگ  پیژدارگ  ءُ  پوریاگر  ءُ  دہکان کارے  ءِ  سکّی ءُ سوری  بیان کنگ بیتگ  اَنت -

اِے  نگدی نگاه  ءِ  جہت  ءَ  کازی  چارگ  بہ  بیت  تہ  اِے  دُرائیں  سرهالانی  رِد  ءَ  آئی  ءِ  گْور ءَ  شیرکن  ءُ  براهداریں  گالانی  وتی  دُنیا یے آباد  اِنت  

اَنچو  اِد  ءَ  آ  یک  دہکان  ءُ  جاگیرداریں  سردارے  ءِ سیادی  ءِ  جاور  ءَ  چو  درنگاز ایت :

  چنچو هزابی کار کنت چنچو وتا کریاب کنت 

  ارمان  کہ  دہکانے ءِ بَرورد سردار  ءَ  رَسیت

یا  ایش  بُگش  آ  وهدی  وجودی پلسپہ  ءِ  کہ  سان  لبزانک  ءِ سرا  کپ اَنت  لبزانک  ءِ  دُنیا  ءَ  اِشی  ءِ  مئیلے  چِست  بیت  ءُ  همے  لیکہ  ءِ  رِد  ءَ ناول ، آزمانک ، کسمانک  ءُ  شئر ساچگ بیت  

تہ  کازی ءِ گور ءَ  اِے  پلسپہ  ءِ  دُروشُم ءَ  بہ گند 

'' وتی  دل  ئیگ  ءَ  بہ  کن  تو  زمانگ  ءَ  یَلدئے "

یا ایش :

 زمانگ ءَ کنئے اِیرجیگ یا وتا چہ گْوز ئے

 کُمارجاه ءِ دو دَروازگاں کُجا  چہ گْوز ئے

 

   ماں آئی  ءِ  سپاداریں  شئرانی  اوتاگ  ءَ  کماتگیں  شْدر ءُ مُرواردیں  چہر ءُ شبینانی  سَہر  ءَ  کئے  اِنت  وتا  بوتک  کنت -  

بیا  پہ  درور  شئرے  ءَ  'شپ ءُ چراگ'  ءِ  چَہر  ءَ  سئیل  کنیں : 

 شپ ءِ گُباریں انیچگ ستر تہاردیم اِنت

 من ءَ چراگ  ءِ  وڑ ءَ بر چراگ تہنا اِنت

وتی  روانی  ءُ  پُر ربت  ایں  شئرانی  اندر  ءَ  چونیں  یکتا  ءُ  زیبداریں  ترکیب  گرنچ  ئےِ  داتگ  ءُ  آؤرتگ  اَنت

انچو آئی  ءِ  شئرے ءَ  'کندهاری انارک'  ءُ  'گترانگیں لب'  ءِ آؤرتگیں  اِے  جوڑشت گال  ءُ  ترکیبانی  دلکشی ءَ  بچار 

  مارا  تئی  کندهاری انارکاں  رنجینتگ 

  مارا  تئی  گترانگیں  لَباں  بیمار  کُتگ

انچو  آئی  ءَ  وتی گال  ءُ  لچّہاں 'تلمیحات' بے شُمار آؤرتگ  ءُ  ڈؤلداری  ءَ  گوں  رِد  کُرتگ  اَنت

آئی  ءِ  اِے  شئرے  ءَ  کارمرز  کُتگیں  'هاتم تاهی ' ءِ  'تلمیح'  ءَ  چمّے  جَنیں  ءُ  هیال  ءِ  زیبائی  ءَ  چاریں --- 

 دَز پچی شر اِنت  بلے  هر مُرگ کازی بال ء وت

تو کہ 'هاتم تاهی' ءِ سوج ءَ گِرئے نان ءَ  کپ  ئے

بلے  کازی!  تئی  ازم  ءِ  کدّ  ءُ  بالاد  اَچ  مئے  گْونڈیں  دیدن  ءُ  چہ  اِے  هبراں انگت  باز  بُرز  اِنت ، اود ءَ  رَسگ  مئے  وس  ءَ  چہ  بالا  اِنت -

 اِے  لهتیں  نابود  ءِ  زندمان  ءِ  کچکول  ءَ  پَشت  کپتگیں  تهتال  ءُ  چندے  دانک  اِتنت  پہ  تو  نبشت  اَنت -    

اَچ  تو  اجازت  لوٹاں!  تئی اباشکو - 

 شال  بلوچستان یونیورسٹی  24ستمبر ، 2023