چندن ساچ: قاضی ءِ میت

قاضی ما تئی گڈی دیدار کت۔ ھمے وھد ءَ کہ تئی میّت اِش چہ لوگ ءَ کش اِت ءُ ڈن ءَ آؤرت اِش۔ تئی دیم اِش پدّر کرت۔ گوشت اِش کہ اگاں کسے چارگ لوٹیت بئیت۔ من چد ءُ پیسر ھچبر کسّی میّت ءِ گڈی دیدار نہ کرتگ ات۔ اولی مردم تو ات ئے کہ من تئی گڈی دیدار کرت۔ 

من ترا دو رند ءَ چاِرت۔ اولی رند ءِ چارگ ءَ انچش گمان بوت کہ تو واب ئے ءُ من تئی سرون ءَ اوشتاتگ ءُ گوشگ ءَ یاں کہ پاد ءَ ھور گوارگ ءَ اِنت۔ 

مردم رش ءُ کش ات۔ من کنز اتاں۔ پدا دومی رند ءَ تئی دیدار ءَ کہ شتاں چماں دروہ اِت۔ من نہ لوٹ اِت کہ بگریواں بلئے ارس ات اَنت کہ وت ءَ داشت اِش نہ کت۔ من زُو زُوت ءَ دیم تَرّینت انچیں وڑے ءَ ارس پہک کرت اَنت کہ کس مہ گِندیت۔ قاضی اولی مردم تو ات ئِے کہ من آئی ءِ مِیّت ءِ سرا وت ءَ گریوگ ءَ دیست۔ مُچی ءِ تہ ءَ من ءَ گریوگ ءَ مدام لج بوتگ بلئے مروچی گوش ئے زانا من مُچّی ءِ تہ ءَ ھم تھنا اوشتاتگ ات ءُ گریوگ ءَ اتاں۔ 

قاضی تئی نواسگ تئی شود ءَ بگر داں تئی کبر ءِ ایر دئیگ ءَ گون ات اَنت۔ ساوڑ ھلاس ات۔ چہ پِشّیاں یکے گِندگ نہ بوت۔ بگندئے پِشّی مروچی شپ ءَ تئی لوگ ءَ بیاینت ءُ بگریونت۔ بگندئے پِشّی مروچی شپ ءَ تئی کوٹی ءَ دیوانے بہ ٹاھین اَنت ءُ وتی وڑ ءَ ترا یات بکن اَنت۔ بگندئے شائر تبیں پِشی یے تئی شئیرے بوانیت ءُ پِشّی پِشّی یے گوں وش گٹی ءَ تئی شئیر شئیرے دپگال بکنت۔ 

17 ستمبر 2023 

چندن ساچ